കോട്ടയം: നിലവിലുണ്ടായിരുന്ന കൊല്ലം-കോട്ടയം മെമു ട്രെയിൻ എറണാകുളത്തേക്ക് നീട്ടിയതിനെ തുടർന്ന് കോട്ടയത്ത് നിന്ന് കൊല്ലത്തേക്ക് പുതിയ മെമു ട്രെയിൻ അനുവദിക്കണമെന്ന് ആവശ്യം.
കോട്ടയം-കൊല്ലം പാതയില്‍ യാത്രാക്ലേശം രൂക്ഷമായ സാഹചര്യത്തിലാണ് ഫ്രാൻസിസ് ജോർജ് എം.പി ഉള്‍പ്പെടെയുള്ളവർ ആവശ്യവുമായി രംഗത്തെത്തിയത്.
റെയില്‍വേ മന്ത്രിക്ക് നല്‍കിയ നിവേദനത്തില്‍ എം.പി ഇക്കാര്യം ഉന്നയിച്ചിട്ടുണ്ട്. വൈകിട്ട് 5.30നും ആറിനും ഇടയ്ക്ക് സർവീസ് ആരംഭിക്കണമെന്നാണ് ആവശ്യം.
അതേസമയം എറണാകുളത്തേക്ക് നീട്ടിയ മെമുവിന് മുളന്തുരുത്തി, കടുത്തുരുത്തി, കുമാരനല്ലൂർ എന്നി സ്റ്റേഷനുകളില്‍ സ്റ്റോപ്പ് അനുവദിക്കണമെന്നും ആവശ്യം ഉയരുന്നുണ്ട്.
ട്രെയിൻ സർവീസുകളുടെ സമയക്രമത്തിലും സ്റ്റോപ്പുകളിലും മാറ്റം വരുത്തുന്നതിനൊപ്പം സ്റ്റേഷനിലെ അടിസ്ഥാന സൗകര്യങ്ങള്‍ മെച്ചപ്പെടുത്തണമെന്ന ആവശ്യങ്ങളും ഉള്‍പ്പെടുത്തി റെയില്‍വേ മന്ത്രിക്ക് എം.പി നിവേദനം നല്‍കി.
നിവേദനത്തിലെ ആവശ്യങ്ങള്‍,
ശബരിമല തീർത്ഥാടനത്തിന്റെ ഭാഗമായി വിവിധ സംസ്ഥാനങ്ങളില്‍ നിന്ന് കോട്ടയത്തേക്ക് സ്‌പെഷ്യല്‍ ട്രെയിൻ അനുവദിക്കണം.
റെയില്‍വേ സ്റ്റേഷനില്‍ അനുബന്ധ സൗകര്യങ്ങള്‍ ഒരുക്കണം.
കോട്ടയം റെയില്‍വേ സ്റ്റേഷനില്‍ പുതുതായി അനുവദിച്ച ലിഫ്റ്റുകളുടെയും എസ്‌കലേറ്ററുകളുടെയും നിർമാണം വേഗം ആരംഭിക്കണം.
ശബരിമല തീർത്ഥാടകരുടെ തിരക്ക് കണക്കിലെടുത്ത് റെയില്‍വേ സ്റ്റേഷനില്‍ കൂടുതല്‍ സൗകര്യങ്ങള്‍ ക്രമീകരിക്കണം
