കൊച്ചി: കൊല്ലം തുറമുഖം വഴി കാനഡയിലേക്ക് അനധികൃതമായി കടക്കാന്‍ ശ്രമിച്ച കേസില്‍ 15 ശ്രീലങ്കന്‍ പൗരന്മാര്‍ക്ക് എന്‍ഐഎ കോടതി തടവുശിക്ഷ വിധിച്ചു.
15 ദിവസത്തെ തടവും 5,000 രൂപ പിഴയുമാണ് എന്‍ഐഎ പ്രത്യേക കോടതി ജഡ്ജി ഹഫീസ് മുഹമ്മദ് വിധിച്ചിരിക്കുന്നത്. പിഴയടയ്ക്കുന്നതില്‍ വീഴ്ച വരുത്തിയാല്‍ പ്രതികള്‍ 15 ദിവസം കൂടി അധിക തടവ് അനുഭവിക്കേണ്ടി വരും.
വിദേശ പൗരന്മാരെ സംബന്ധിക്കുന്ന വിവിധ നിയമവകുപ്പുകള്‍ പ്രകാരമാണ് നടപടി. കോടതിയില്‍ പ്രതികള്‍ കുറ്റം സമ്മതിച്ചിട്ടുണ്ട്.
തമിഴ്നാട്ടിലെ പുഴല്‍, തിരുച്ചിറപ്പള്ളി, ഡിണ്ടിഗല്‍, മധുര, തിരുനെല്‍വേലി തുടങ്ങിയ വിവിധ അഭയാര്‍ഥി ക്യാംപുകളില്‍ താമസിച്ചിരുന്നവരാണ് ശിക്ഷിക്കപ്പെട്ടവര്‍.
വി.പ്രസന്ന, പ്രശാന്ത്, ചന്ദ്രതാസന്‍ ശിവം, ദിനേശ് കുമാര്‍, മതിവര്‍ണന്‍, നവനീതന്‍, യു.പ്രകാശ് രാജ്, ക്വീന്‍സ് രാജ്, അജയ് മോഹന്‍, യതൂസന്‍ ജ്ഞാനവേല്‍, ശരവണന്‍, കമല്‍രാജ്, വിനോദ് രാജ് എന്നിവരുള്‍പ്പെടെയുള്ള 15 പേരാണ് കേസില്‍ പ്രതികളായിട്ടുള്ളത്. അധികൃതരുടെ യാത്രാനുമതി ലംഘിച്ച്‌ ക്യാംപുകള്‍ക്ക് പുറത്തുപോയി ഇവര്‍ കാനഡയിലേക്ക് കടക്കാന്‍ പദ്ധതിയിടുകയായിരുന്നു.
2022 സെപ്റ്റംബര്‍ 6നാണ് കൊല്ലം തുറമുഖത്തുനിന്ന് യാനത്തില്‍ (ബോട്ട്) കടക്കാന്‍ ശ്രമിക്കുന്നതിനിടെ പ്രതികള്‍ പൊലീസിന്റെ പിടിയിലാകുന്നത്. തുടര്‍ന്ന് എന്‍ഐഎ ഏറ്റെടുത്ത കേസിന്റെ വിചാരണയ്ക്കുശേഷം പ്രതികള്‍ കുറ്റക്കാരാണെന്ന് കണ്ടെത്തുകയായിരുന്നു.
അന്വേഷണ കാലയളവില്‍ ജയിലില്‍ കഴിഞ്ഞ ദിവസങ്ങള്‍ ശിക്ഷാകാലയളവില്‍ നിന്നും ഇളവ് ചെയ്യും. കേസിന്റെ വിധിയുടെ പകര്‍പ്പ് തിരുവനന്തപുരത്തെ ഫോറിനേഴ്സ് റീജനല്‍ റജിസ്‌ട്രേഷന്‍ ഓഫിസര്‍ക്ക് കൈമാറാന്‍ കോടതി നിര്‍ദ്ദേശിച്ചിട്ടുണ്ട്.
പ്രോസിക്യൂഷനു വേണ്ടി ഡപ്യൂട്ടി ലീഗല്‍ അഡൈ്വസര്‍ അര്‍ജുന്‍ അമ്പലപ്പറ്റ, സീനിയര്‍ പബ്ലിക് പ്രോസിക്യൂട്ടര്‍ ജയിംസ് കാരണത്ത്, പബ്ലിക് പ്രോസിക്യൂട്ടര്‍ എസ്.ശ്രീനാഥ് എന്നിവര്‍ ഹാജരായി.
