കൊല്ലം: ഭർത്താവിനെ കഴുത്തില്‍ ബെല്‍റ്റ് മുറുക്കികൊലപ്പെടുത്തിയ സംഭവത്തില്‍ പ്രതിയായ ഭാര്യ ലേഖ മേരിക്കു (48) നേരെ അസഭ്യവർഷവും ചീമുട്ടയേറും.
ചെറുമൂട് സ്വദേശി രാജു എഡ്വേഡിനെ (56) കൊലപാതക കേസിൽ
തെളിവെടുപ്പിനെത്തിച്ചപ്പോഴാണ് ശാപവാക്കുകളുമായി രാജുവിന്റെ സഹോദരിയും നാട്ടുകാരും രംഗത്തെത്തിയത്.
നാട്ടുകാരുടെ പ്രതിഷേധത്തിനിടെ ഏറെ പ്രയാസപ്പെട്ടാണ് പോലീസ് ലേഖയുമായി കൊലപാതകം നടന്ന വീട്ടില്‍ പ്രവേശിച്ചത്.
ചീമുട്ട കൊണ്ട് തലയു‌‌ടെ പിൻഭാഗത്ത് ഏറുകിട്ടിയതോ‌ടെ പൊട്ടിക്കരഞ്ഞുകൊണ്ടാണ് ലേഖ നാട്ടുകാർക്കു മുന്നിലൂടെ നടന്നു നീങ്ങിയത്.
അതേസമയം ഈ മാസം മൂന്നിനാണ് രാജു എഡ്വേഡ് മരണപ്പെട്ടത്.
സ്വത്തുതർക്കത്തെത്തുടർന്നു ബെല്‍റ്റ് കഴുത്തില്‍ മുറുക്കി കൊലപ്പെടുത്തുകയായിരുന്നെന്നു പോലീസ് പറയുന്നു.
3ന് പുലർച്ചെ ലേഖയും വീടിനടുത്തു താമസിക്കുന്ന ഭർതൃസഹോദരൻ ബൈജുവും ചേർന്നു രാജുവിനെ കുണ്ടറയിലെ സ്വകാര്യ ആശുപത്രിയിലെത്തിച്ചു.
അപ്പോഴേക്കും മരണം സംഭവിച്ചിരുന്നു. കട്ടിലില്‍നിന്ന് എഴുന്നേല്‍ക്കുന്നതിനിടെ കുഴഞ്ഞുവീണെന്നാണു ലേഖ ആശുപത്രിയില്‍ അറിയിച്ചത്.
എന്നാല്‍ രാജുവിന്റെ കഴുത്തില്‍ പാട് കണ്ടതിനെത്തുടർന്ന് ആശുപത്രി അധികൃതർ പോലീസില്‍ വിവരം അറിയിച്ചു.
ബന്ധുക്കളും മരണത്തില്‍ ദുരൂഹത ആരോപിച്ച്‌ രംഗത്തെത്തി.
