തിരുവനന്തപുരം : ശ്രീകാര്യം പാങ്ങപ്പാറയില്‍ പ്ലസ് വണ്‍ വിദ്യാർത്ഥി അഭിറാമിനെ കൊലപ്പെടുത്തിയ സംഭവത്തില്‍ പ്രത്യേക സംഘം അന്വേഷണം തുടങ്ങി.
ഡെപ്യൂട്ടി കമ്മിഷണറുടെ നേതൃത്വത്തിലുള്ള 16 അംഗ സംഘമാണ് അന്വേഷണത്തിന് നേതൃത്വം നല്‍കുന്നത്. പ്രണയപ്പകയ്ക്ക് അപ്പുറം മറ്റ് കാരണങ്ങള്‍ കൊലപാതകത്തിന് പിന്നിലുണ്ടോ എന്ന് പൊലീസ് പരിശോധിക്കുന്നു. ചില സ്വകാര്യ വീഡിയോ ദൃശ്യങ്ങള്‍ ചോർന്നതുമായി ബന്ധപ്പെട്ട തർക്കങ്ങഴും കൊലയ്ക്ക് പിന്നിലുണ്ടെന്നാണ് പൊലീസ് നല്‍കുന്ന സൂചന. കേസില്‍ പിടിയിലായവരുടെ വാട്‌സാപ്പ് ചാറ്റുകളിലും ഫോണിലെ ഫോള്‍ഡറുകളിളും നടത്തിയ പരിശോധനയിലാണ് ഇത് സംബന്ധിച്ച്‌ പൊലീസിന് സൂചന ലഭിച്ചത്. കൊല്ലപ്പെട്ട അഭിറാമിന്റെ സുഹൃത്തിനെ പ്രതികള്‍ വിളിച്ചുവരുത്താൻ ശ്രമിച്ചത് ഇതേക്കുറിച്ച്‌ സംസാരിക്കാനാണെന്നും പൊലീസ് കരുതുന്നു.
അതേസമയം അഭിറാമിന്റെ ഇൻസ്റ്റഗ്രാം അക്കൗണ്ടില്‍ നിന്ന് നിരവധി ചാറ്റുകള്‍ അപ്രത്യക്ഷമായതായി സൈബർ സെല്‍ കണ്ടെത്തി. ചാറ്റുകള്‍ എങ്ങനെ ഡിലീറ്റ് ചെയ്യപ്പെട്ടുവെന്ന് പരിശോധിച്ച്‌ വരികയാണ്. സംഭവത്തില്‍ കഴിഞ്ഞ ദിവസം അറസ്റ്റിലായ ഉമർമുഫ്താർ,ആനന്ദ എന്നിവരെ റിമാൻഡ് ചെയ്തു.
കേസിലെ ഒന്നാം പ്രതിയായ 17 കാരനെ ജുവനൈല്‍ കോടതിയില്‍ ഹാജരാക്കിയശേഷം ചൊവ്വാഴ്ച വൈകിട്ട് തന്നെ ഒബ്‌സർവേഷൻ ഹോമിലേക്ക് മാറ്റിയിരുന്നു. പ്രതികളുമായെത്തി ഇതിനകം തെളിവെടുപ്പ് നടത്തിയ സാഹചര്യത്തില്‍ കൂടുതല്‍ ഡിജിറ്റല്‍ തെളിവുകള്‍,സാഹചര്യത്തെളിവുകള്‍ എന്നിവ ശേഖരിക്കുകയാണ് അന്വേഷണ സംഘം. മൃതദേഹം കണ്ടെത്തിയ ഭാഗത്ത് ഇന്നലെയും പൊലീസ് പരിശോധന നടത്തി. അതിനിടെ അഭിറാം കൊല്ലപ്പെട്ട ദിവസം വീട്ടില്‍ നിന്ന് പുറത്തേക്ക് പോകുന്നതിന്റെ ദൃശ്യങ്ങളും പുറത്തുവന്നു.
