തക്കല: പത്മനാഭപുരം കോടതി സമുച്ചയത്തിന് മുന്നില്‍ നടുക്കുന്ന ആക്രമണ സംഭവം. കുടുംബകോടതിയില്‍ വിചാരണയ്ക്കെത്തിയ ഭാര്യയെ ഭര്‍ത്താവ് പരസ്യമായി അരിവാളുകൊണ്ട് വെട്ടി പരിക്കേല്‍പ്പിച്ചു.
പൊന്മന ചെമ്പൊന്‍കാലവിള സ്വദേശിനിയായ ജെര്‍ലിന്‍പ്രേമയ്ക്ക് നേരെയാണ് ഭര്‍ത്താവ് മേക്കാമണ്ഡപം ഈത്തവിള സ്വദേശി വിന്‍സെന്റ് രാജിന്റെ ജീവനെടുക്കാനുള്ള വധശ്രമം നടന്നത്.
എട്ടു വര്‍ഷം മുമ്പ് വിവാഹിതരായ ഇരുവരും തമ്മില്‍ അഭിപ്രായവ്യത്യാസങ്ങളെ തുടര്‍ന്ന് വേര്‍പിരിഞ്ഞ് കഴിയുകയായിരുന്നു. ബന്ധം വേര്‍പെടുത്തുന്നതിനായി പത്മനാഭപുരം കുടുംബകോടതിയില്‍ കേസ് നിലവിലുണ്ട്. ചൊവ്വാഴ്ച കേസിന്റെ വിചാരണയ്ക്കായി എത്തിയതായിരുന്നു ജെര്‍ലിന്‍പ്രേമ. കോടതി വളപ്പിന് പുറത്തുവെച്ച്‌ കാത്തുനിന്ന വിന്‍സെന്റ് രാജ്, ഒളിപ്പിച്ചു വെച്ചിരുന്ന അരിവാളെടുത്ത് ഭാര്യയെ വെട്ടിപ്പരിക്കേല്‍പ്പിക്കുകയായിരുന്നു.
അക്രമം കണ്ടു തടയാന്‍ ഓടിയെത്തിയ അഭിഭാഷകര്‍ക്ക് നേരെയും ഇയാള്‍ അരിവാള്‍ വീശി ഭീകരാന്തരീക്ഷം സൃഷ്ടിച്ചു. എന്നാല്‍ ഭയം കൂട്ടാക്കാതെ ഒത്തുചേര്‍ന്ന നാട്ടുകാരും അഭിഭാഷകരും ചേര്‍ന്ന് വിന്‍സെന്റ് രാജിനെ ബലപ്രയോഗത്തിലൂടെ കീഴ്‌പ്പെടുത്തി തക്കല പോലീസിന് കൈമാറുകയായിരുന്നു.
വെട്ടേറ്റ് ഗുരുതരമായി പരിക്കേറ്റ ജെര്‍ലിന്‍പ്രേമയെ ഉടന്‍ തന്നെ ആശാരിപള്ളം മെഡിക്കല്‍ കോളേജ് ആശുപത്രിയില്‍ പ്രവേശിപ്പിച്ചു. ഇവര്‍ നിലവില്‍ അത്യാഹിത വിഭാഗത്തില്‍ ചികിത്സയിലാണ്. സംഭവത്തില്‍ തക്കല പോലീസ് കേസെടുത്ത് പ്രതിയെ വിശദമായി ചോദ്യം ചെയ്തു വരികയാണ്
