.കോട്ടയം: വിവാഹവാഗ്ദാനം നല്‍കി വഞ്ചിക്കുകയും, തെറ്റ് ബോധ്യപ്പെടുത്തിയപ്പോള്‍ ധാര്‍ഷ്ട്യം കാണിക്കുകയും ചെയ്ത കാമുകനെ ജര്‍മനിയില്‍നിന്ന് നിയമവഴിയിലൂടെ നാട്ടിലെത്തിച്ച്‌ ജയിലിലടച്ചിരിക്കുകയാണ് ഒരു യുവ അഭിഭാഷക.
കോട്ടയം പുതുപ്പള്ളി മാങ്ങാനം പത്മവിലാസത്തില്‍ ഉണ്ണിക്കൃഷ്ണന്‍ (29) എന്ന യുവാവാണ് നിയമത്തിന്റെ പിടിയിലായത്. പ്രണയവും ചതിയും അതിജീവനത്തിന്റെ കരുത്തും ഒരുപോലെ ഇഴചേര്‍ന്ന ഈ കേസ് വലിയ ചര്‍ച്ചയായി മാറിയിരിക്കുകയാണ്.
2023-ല്‍ സോഷ്യല്‍ മീഡിയയിലൂടെയാണ് ഉണ്ണിക്കൃഷ്ണനും ഈ യുവ അഭിഭാഷകയും പരിചയപ്പെടുന്നത്. താനൊരു വിധവയാണെന്നും തനിക്ക് ഒരു കുട്ടിയുണ്ടെന്നുമുള്ള യഥാര്‍ത്ഥ വസ്തുതകള്‍ യുവതി ആദ്യമേതന്നെ തുറന്നുപറഞ്ഞിരുന്നു. എന്നാല്‍ ഇതൊന്നും ഒരു പ്രശ്‌നമല്ലെന്നും താന്‍ വിവാഹം കഴിച്ചു സംരക്ഷിക്കാമെന്നും ഉണ്ണിക്കൃഷ്ണന്‍ ഉറപ്പുനല്‍കുകയായിരുന്നു. ഈ വാഗ്ദാനത്തില്‍ വിശ്വസിച്ച്‌ വീട്ടുകാരുടെയും ബന്ധുക്കളുടെയും അറിവോടെയും സമ്മതത്തോടെയും അവരുടെ ബന്ധം മുന്നോട്ടുപോയി. എന്നാല്‍ ഒരൊറ്റ ചിത്രം മതിയായിരുന്നു ആ ബന്ധത്തിന്റെ കള്ളത്തരം വെളിച്ചത്തുകൊണ്ടുവരാന്‍.
2024 ഒക്ടോബറില്‍ ഉപരിപഠനത്തിനായി ഉണ്ണിക്കൃഷ്ണന്‍ ജര്‍മനിയിലേക്ക് പോകാന്‍ തീരുമാനിച്ചു. യാത്രതിരിക്കുന്നതിന് തൊട്ടുമുമ്പ് ഇരുവരും ഒന്നിച്ചുള്ള ഒരു ചിത്രം അദ്ദേഹം സമൂഹമാധ്യമങ്ങളില്‍ പങ്കുവെച്ചിരുന്നു. ഈ ചിത്രമാണ് കേസില്‍ നിര്‍ണായക വഴിത്തിരിവായത്. ചിത്രം കണ്ട മറ്റൊരു യുവതി ഉടന്‍തന്നെ അഭിഭാഷകയെ ഫോണില്‍ ബന്ധപ്പെടുകയും, ഉണ്ണിക്കൃഷ്ണനുമായി തനിക്കും ബന്ധമുണ്ടെന്ന് വെളിപ്പെടുത്തുകയും ചെയ്തു. തന്റെ ജീവിതം തകര്‍ത്തുകൊണ്ട് മറ്റൊരു പെണ്‍കുട്ടിയെക്കൂടി ചതിക്കുകയാണെന്ന് മനസ്സിലാക്കിയ യുവതി ഉടന്‍തന്നെ ഉണ്ണിക്കൃഷ്ണനെ ബന്ധപ്പെട്ട് ഇക്കാര്യം ചോദ്യം ചെയ്തു. എന്നാല്‍ തെറ്റ് ഏറ്റുപറയുന്നതിന് പകരം മോശമായ രീതിയിലാണ് പ്രതി സംസാരിച്ചത്. ഈ അപമാനവും വഞ്ചനയും തന്നെ തളര്‍ത്തിയില്ലെന്നും മറിച്ച്‌ നിയമപരമായി നേരിടാന്‍ തന്നെ പ്രേരിപ്പിച്ചെന്നും യുവ അഭിഭാഷക വ്യക്തമാക്കുന്നു. 'ഒരു സോറി പറയുന്നതിനു പകരം അയാള്‍ മോശമായി സംസാരിച്ചതുകൊണ്ടു മാത്രമാണ് എനിക്ക് ഈ പോരാട്ടം നടത്തേണ്ടി വന്നത്,' എന്നാണ് അവര്‍ ഈ സംഭവത്തെക്കുറിച്ച്‌ പ്രതികരിച്ചത്.
തുടര്‍ന്ന് അന്നത്തെ ജില്ലാ പൊലീസ് മേധാവിക്ക് യുവതി പരാതി നല്‍കുകയും, തുടര്‍നടപടിയായി കോട്ടയം വെസ്റ്റ് പൊലീസ് ഇന്‍സ്പെക്ടര്‍ അനൂപ് ജോസിന്റെ നേതൃത്വത്തിലുള്ള സംഘം കേസ് രജിസ്റ്റര്‍ ചെയ്യുകയും ചെയ്തു. തുടര്‍ന്ന് വിദേശത്തേക്ക് കടന്ന പ്രതിക്കായി പൊലീസ് 'ബ്ലൂ കോര്‍ണര്‍ നോട്ടിസ്' പുറപ്പെടുവിക്കുകയുണ്ടായി. ബ്ലൂ കോര്‍ണര്‍ നോട്ടിസ് നിലവില്‍ വന്നതോടെ നിയമക്കുരുക്കിലായ ഉണ്ണിക്കൃഷ്ണന്‍ നാട്ടിലെത്താന്‍ ഹൈക്കോടതിയെ സമീപിക്കുകയായിരുന്നു. സംസ്ഥാനത്തെ പ്രമുഖരായ സീനിയര്‍ അഭിഭാഷകരെയാണ് പ്രതി ഇതിനായി രംഗത്തിറക്കിയത്. എതിര്‍ഭാഗത്തിന്റെ സ്വാധീനവും പ്രതാപവും കണ്ട് യുവതിയോടൊപ്പം നില്‍ക്കേണ്ട സുഹൃത്തുക്കളായ മറ്റു വക്കീലന്മാര്‍ പോലും പിന്മാറുന്ന സാഹചര്യമുണ്ടായി. എന്നാല്‍ അതൊന്നും തന്നെ തളര്‍ത്തിയില്ലെന്ന് യുവതി പറയുന്നു. ഒട്ടും പതറാതെ അവര്‍ നേരിട്ട് ഹൈക്കോടതിയില്‍ ഹാജരായി കേസിന്റെ യാഥാര്‍ത്ഥ്യങ്ങള്‍ അക്കമിട്ടു നിരത്തി. തുടര്‍ന്ന് പ്രതി അന്വേഷണ ഉദ്യോഗസ്ഥന് മുന്നില്‍ ഹാജരാകാന്‍ ഹൈക്കോടതി നിര്‍ദ്ദേശം നല്‍കി. ബ്ലൂ കോര്‍ണര്‍ നോട്ടിസ് ഹൈക്കോടതി മരവിപ്പിക്കുകയും ചെയ്തു.
ഹൈക്കോടതി നിര്‍ദ്ദേശപ്രകാരം ജര്‍മനിയില്‍നിന്ന് നാട്ടിലെത്തിയ ഉണ്ണിക്കൃഷ്ണന്‍ വെസ്റ്റ് പൊലീസ് സ്റ്റേഷനില്‍ കീഴടങ്ങി. പൊലീസ് അദ്ദേഹത്തെ ജുഡീഷ്യല്‍ ഫസ്റ്റ് ക്ലാസ് മജിസ്ട്രേറ്റ് കോടതിക്ക് മുന്നില്‍ ഹാജരാക്കി. കോടതിയില്‍ പ്രതിക്കായി വന്‍നിര സീനിയര്‍ വക്കീലന്മാര്‍ ജാമ്യാപേക്ഷയുമായി എത്തിയിരുന്നു. എന്നാല്‍ ഇതിനെതിരെ ഒട്ടനവധി തെളിവുകളും രേഖകളുമായി യുവ അഭിഭാഷക വീണ്ടും കോടതിയില്‍ നേരിട്ടെത്തി ശക്തമായി വാദിച്ചു. നീണ്ട മൂന്ന് മണിക്കൂറോളമാണ് കോടതി രേഖകള്‍ വിശദമായി പരിശോധിച്ചത്. ഒടുവില്‍ ഉണ്ണിക്കൃഷ്ണന്റെ ജാമ്യാപേക്ഷ തള്ളിയ മജിസ്ട്രേറ്റ് കോടതി അദ്ദേഹത്തെ റിമാന്‍ഡ് ചെയ്യുകയായിരുന്നു. ഉണ്ണികൃഷ്ണന് പിന്നീട് ജാമ്യം ലഭിച്ചു. പ്രണയത്തിന്റെ പേരില്‍ വഞ്ചിക്കപ്പെടുന്ന സ്ത്രീകള്‍ക്ക് സ്വന്തം അറിവും ആത്മവിശ്വാസവും ഉപയോഗിച്ച്‌ എങ്ങനെ ശക്തമായി നീതി നേടിയെടുക്കാം എന്നതിന്റെ മികച്ച ഉദാഹരണമായി മാറിയിരിക്കുകയാണ് ഈ യുവ അഭിഭാഷകയുടെ നിയമപോരാട്ടം
