കൊച്ചി; നെട്ടൂർ വാട്ടർ മെട്രോ ടെർമിനലിനെ പ്രധാന ടെർമിനലായി വികസിപ്പിക്കാനൊരുങ്ങി കൊച്ചി മെട്രോ റെയില്‍ ലിമിറ്റഡ് (കെ എം ആർ എല്‍).
തേവരയിലും എറണാകുളം ടെർമിനലിലും പ്രവർത്തന കേന്ദ്രങ്ങള്‍ സജ്ജമാക്കാനുള്ള നീക്കം പരാജയപ്പെട്ടതിനെ തുടർന്നാണ് പുതിയ നടപടി.
ഇടക്കൊച്ചി, കുമ്പളം, തൈക്കൂടം, വൈറ്റില എന്നീ പ്രദേശങ്ങളുമായി ബന്ധപ്പെട്ട് കിടക്കുന്ന നെട്ടൂരിനെ ഒരു ഇടക്കാല ഹബ്ബായിട്ടായിരിക്കും വികസിപ്പിക്കുക.
നെട്ടൂർ വികസിപ്പിക്കുന്നതോടെ കാക്കനാട്-ഇൻഫോപാർക്ക് എന്നിവിടങ്ങളിലേക്കുള്ള യാത്ര എളുപ്പമാകും. മാത്രമല്ല ഇവിടുത്തെ ദേശീയപാത-66 ലെ തിരക്ക് കുറക്കാനും ഇത് സഹായിക്കും.
അതിനിടെ ലാഭകരമല്ലാത്ത ആസ്റ്റർ, അമൃത, കോതാട്, തേവര, ചെറിയന്തുരുത്ത്, മൂളവുകാട് എന്നീ ആറ് ടെർമിനലിനെ മാസ്റ്റർ പ്ലാനില്‍ ഒഴിവാക്കാനും ഗതാഗത വകുപ്പ് അംഗീകാരം നല്‍കിയിട്ടുണ്ട്. നേരത്തേ 15 റൂട്ടുകളിലായി 38 ടെർമിനലുകള്‍ക്കായിരുന്നു ഭരണാനുമതി ലഭിച്ചത്.
പരിഷ്കരിച്ച പുതിയ പ്ലാനില്‍ ആറ് ടെർമിനലുകള്‍ ഒഴിവാക്കിയതായി വ്യക്തമാക്കിയിട്ടുണ്ട്. പ്രവർത്തനപരവും സാങ്കേതികപരവും ഭരണപരവുമായ തടസങ്ങളാണ് ഇതിന് കാരണമായി ചൂണ്ടിക്കാട്ടുന്നത്.
മെട്രോയുടെ സഞ്ചാരപാതയില്‍ ഗുരുതരമായ സാങ്കേതിക പ്രശ്നങ്ങള്‍ ഉണ്ടെന്ന് കെഎംആർഎല്‍ പറയുന്നു. ആസ്റ്റർ ഭാഗത്ത് ചാനലിന് വീതിയും ആഴവും ഇല്ലെന്നതാണ് ഒന്നാമത്തെ കാരണം. മാത്രമല്ല പാലത്തിന് താഴെ ഉയരക്കുറവും ഉണ്ടെന്നും കൂടാതെ പ്രദേശത്ത് ചീനവലകള്‍ ധാരാളമായി വിന്യസിച്ചിട്ടുണ്ടെന്നും അധികൃതർ പറഞ്ഞു.
