കോട്ടയം: ജില്ലയിലെ കിടങ്ങൂരിൽ അമിത വൈദ്യുതിപ്രവാഹത്തെ തുടർന്ന് വീടുകളിലെ ഇലക്ട്രോണിക് ഉപകരണങ്ങൾ കത്തി നശിക്കുന്നതായി പരാതി.
കിടങ്ങൂർ സബ് സ്റ്റേഷന്റെ പരിധിയിലുള്ള പ്രദേശങ്ങളിലാണ് തുടർച്ചയായി ഇത്തരത്തിലുള്ള സംഭവങ്ങൾ ഉണ്ടാകുന്നതെന്നും അപകടഭീഷണിയും നിലനിൽക്കുന്നതായും നാട്ടുകാർ പറയുന്നു. 33 കെവി ലൈൻ കടന്നുപോകുന്ന ഇരുമ്പുതൂണുകളിലാണ് പല സ്ഥലങ്ങളിലും സാധാരണ വൈദ്യുതി വിതരണത്തിനുള്ള കമ്പികളും സ്ഥാപിച്ചിരിക്കുന്നത്. തൂണുകളിൽ വളർന്നുകയറുന്ന വള്ളിച്ചെടികൾ 33 കെവി ലൈനിന്റെ എർത്ത് ലൈനും സാധാരണ വിതരണ കമ്പികളും തമ്മിൽ സമ്പർക്കത്തിലാകുന്നതാണ് അമിത വൈദ്യുതിപ്രവാഹത്തിന് കാരണമാകുന്നതെന്നാണ് ചൂണ്ടിക്കാട്ടുന്നത്.
വർഷങ്ങളായി സബ് സ്റ്റേഷൻ റോഡ് മേഖലയിലെ 25-ലേറെ വീടുകളിലെ ഇലക്ട്രോണിക് ഉപകരണങ്ങൾക്ക് ഇതുമൂലം നാശനഷ്ടം സംഭവിക്കുന്നതായി നാട്ടുകാർ പറയുന്നു. പ്രശ്നത്തിന് ശാശ്വത പരിഹാരമായി സ്വന്തം ചെലവിൽ തൂണുകൾ സ്ഥാപിച്ച് പുതിയ കമ്പികൾ വലിക്കണമെന്നാണ് കെഎസ്ഇബി അധികൃതർ നിർദേശിക്കുന്നതെന്നും അവർ ആരോപിക്കുന്നു.
അടുത്തിടെ തൂണുകളിലെ വള്ളിച്ചെടികൾ വെട്ടിമാറ്റിയെങ്കിലും അത് ഫലപ്രദമായില്ലെന്നാണ് പ്രദേശവാസികളുടെ പരാതി. സബ് സ്റ്റേഷൻ റോഡിലെ 33 കെവി ലൈനിന് അപകടഭീഷണിയുയർത്തി നിൽക്കുന്ന മരങ്ങളും ശിഖരങ്ങളും മുറിച്ചുമാറ്റണമെന്ന് പലതവണ അപേക്ഷ നൽകിയിട്ടും ഇതുവരെ നടപടിയുണ്ടായിട്ടില്ലെന്നും നാട്ടുകാർ ആരോപിക്കുന്നു. വൈദ്യുതിപ്രവാഹത്തിലെ ഈ പ്രശ്നത്തിന് അടിയന്തര പരിഹാരം കാണണമെന്ന ആവശ്യമാണ് പ്രദേശവാസികൾ ഉയർത്തുന്നത്.
