തിരുവനന്തപുരം: ലോകകപ്പ് ഫുട്ബോള് ആവേശത്തിനിടെ അർജൻറീനയേയും ഫിഫയെയും ട്രോളി കേരള പൊലീസ്. വിവാദമായതിന്റെ പിന്നാലെ പോസ്റ്റ് പിൻവലിച്ചു.
അർജൻറീനയുടെ സൂപ്പർ താരം ലയണല് മെസ്സിയും മത്സരത്തിന്റെ റഫറിയും നില്ക്കുന്ന ചിത്രമുള്പ്പെടെ പങ്കുവെച്ചുകൊണ്ടുള്ള പോസ്റ്റ് കടുത്ത വിമർശനങ്ങളെ തുടർന്നാണ് പിൻവലിച്ചത്.
റഫറിക്ക് ഒപ്പം മെസ്സി നില്ക്കുന്ന ചിത്രത്തില് കേരളത്തിന്റെ ഭൂപടം കൂടി ഗ്രാഫിക്സ് വഴി കൂട്ടിച്ചേർത്താണ് പൊലീസ് പോസ്റ്റ് തയ്യാറാക്കിയത്. 'നിങ്ങള്ക്ക് ഞങ്ങളുണ്ട്' എന്ന ടാഗ് ലൈനോടെയാണ് ചിത്രം പങ്കുവെച്ചത്. ഒപ്പം 'അടിയന്തരസഹായങ്ങള്ക്ക് വിളിക്കാം 112' എന്ന സന്ദേശവും നല്കിയിരുന്നു.
കളിക്കളത്തില് അർജൻറീനയ്ക്ക് റഫറിയുടെ സഹായം ലഭിക്കുന്നുണ്ടെന്ന രീതിയിലുള്ള ട്രോളുകളെ ഓർമിപ്പിക്കുന്നതായിരുന്നു പൊലീസിന്റെ ഈ പോസ്റ്റ്. പോസ്റ്റ് കുറഞ്ഞ സമയത്തിനുള്ളില് തന്നെ വൈറലായെങ്കിലും അർജൻറീന ആരാധകരില് നിന്ന് കടുത്ത എതിർപ്പാണ് ഉയർന്നത്.
ഒരു സർക്കാർ സംവിധാനത്തിന്റെ ഔദ്യോഗിക പേജില് നിന്ന് ഏതെങ്കിലും ഒരു ടീമിനെയോ ഫിഫയെയോ പരിഹസിക്കുന്ന തരത്തിലുള്ള ട്രോളുകള് പങ്കുവെയ്ക്കുന്നത് അപക്വമാണെന്ന് പലരും കമന്റുകളിലൂടെ ചൂണ്ടിക്കാട്ടി. ഒരു വിഭാഗം ആളുകള് പോസ്റ്റിനെ തമാശയായി കണ്ട് സ്വീകരിച്ചിരുന്നെങ്കിലും വിമർശനങ്ങള് ശക്തമാവുകയായിരുന്നു. സോഷ്യല് മീഡിയയില് ഫുട്ബോള് ആരാധകർ തമ്മിലുള്ള വലിയ വാക്പോരിന് ഈ പോസ്റ്റ് കാരണമായി. പ്രതിഷേധം ശക്തമാവുകയും സംഭവം വിവാദത്തിലേക്ക് നീങ്ങുകയും ചെയ്തതോടെയാണ് കേരള പൊലീസ് ഔദ്യോഗിക ഫേസ്ബുക്ക് പേജില് നിന്ന് പോസ്റ്റ് പിൻവലിക്കാൻ തീരുമാനിച്ചത്.
