കോട്ടയം: അധികാര പദവികളുടെ വീതം വയ്പിനെ ചൊല്ലി കേരള കോണ്ഗ്രസ് ജോസഫ് വിഭാഗത്തില് കടുത്ത ഭിന്നത.
കെ.എം മാണിയുടെ നിര്യാണത്തെ തുടര്ന്ന് മാണി ഗ്രൂപ്പ് വിട്ട് ജോസഫിനൊപ്പം കൂടിയ മുതിര്ന്ന നേതാവായ തോമസ് ഉണ്ണിയാടന് എംഎല്എ, ജോസഫ് എം പുതുശ്ശേരി എക്സ് എംഎല്എ എന്നിവരാണ് കടുത്ത ഭിന്നതയെ തുടര്ന്ന് പാര്ട്ടി പരിപാടികളില് നിന്നും പൂര്ണമായി വിട്ടുനില്ക്കുന്നത്.
കഴിഞ്ഞ ദിവസം ചേര്ന്ന ചരല്ക്കുന്ന് ക്യാമ്പില് നിന്നും വിട്ടുനിന്ന ഇരുവരും പ്രതിഷേധം തുടരാന് തന്നെയാണ് തീരുമാനം.
തുടര്ന്നും കേരള കോണ്ഗ്രസിന്റെ ഒരു പരിപാടികളിലും പങ്കെടുക്കേണ്ടതില്ലെന്ന നിലപാടിലാണ് തോമസ് ഉണ്ണിയാടന് എന്നാണ് സൂചന.
സീനിയര് എംഎല്എ ആയിട്ടും തന്നെ അവഗണിച്ച് പുതുമുഖമായ അപു ജോണ് ജോസഫിന് ചീഫ് വിപ്പ് സ്ഥാനം നല്കിയതാണ് ഉണ്ണിയാടനെ ചൊടിപ്പിച്ചത്.
മന്ത്രിസ്ഥാനത്തിനു പുറമെ പാര്ട്ടിക്ക് ലഭിച്ച ക്യാബിനറ്റ് പദവി സ്വാഭാവികമായും തനിക്ക് ലഭിക്കണമെന്ന നിലപാടായിരുന്നു മോന്സ് ജോസഫ് കഴിഞ്ഞാല് പാര്ലമെന്ററി പാര്ട്ടിയില് ഏറ്റവും സീനിയറായ തോമസ് ഉണ്ണിയാടന്റേത്. 10 വര്ഷം മുമ്പ് ഐക്യകേരള കോണ്ഗ്രസിന്റെ കാലത്ത് ചീഫ് വിപ്പ് പദവി ലഭിച്ചത് ചൂണ്ടിക്കാട്ടിയായിരുന്നു ഉണ്ണിയാടന്റെ നിലപാട്.
എന്നാല് ചീഫ് വിപ്പ് സ്ഥാനത്തേയ്ക്ക് പാര്ട്ടി ചെയര്മാന്റെ മകനെ പരിഗണിക്കാനായിരുന്നു പാര്ട്ടി തീരുമാനം. ആദ്യം എംഎല്എ ആയ അപുവിനെ ചീഫ് വിപ്പാക്കുന്നതില് ഒരു വിഭാഗത്തിന് ശക്തമായ വിയോജിപ്പുണ്ടായിരുന്നു.
എന്നാല് പിജെ ജോസഫിന്റെയും മോന്സ് ജോസഫിന്റെയും പിന്തുണ കിട്ടിയതോടെ അപുവിന് ചീഫ് വിപ്പ് പദവി ലഭിച്ചു. കാലുമാറ്റക്കാരനായ ഉണ്ണിയാടനെ പരിഗണിക്കരുതെന്നും ഒരു വിഭാഗം വാദിച്ചു. ഇതോടെ ഉണ്ണിയാടന് പാര്ട്ടിയുമായി അകന്നു.
ഉണ്ണിയാടന്റെ എംഎല്എ ഓഫീസ് ഉദ്ഘാടനത്തിന് ആഭ്യന്തര മന്ത്രി രമേശ് ചെന്നിത്തലയെ ആണ് വിളിച്ചത്. കേരള കോണ്ഗ്രസില് നിന്നാരെയും പരിപാടിക്ക് ക്ഷണിച്ചതുമില്ല. ചരല്ക്കുന്ന് ക്യാമ്പ് ബഹിഷ്കരിച്ച അദ്ദേഹം മേലിലും കേരള കോണ്ഗ്രസ് പരിപാടികളില് പങ്കെടുക്കില്ലെന്നാണ് സൂചന.
അതിനിടെ കേരള കോണ്ഗ്രസിന്റെ ചരല്ക്കുന്ന് ക്യാമ്പിന്റെ രണ്ടാം ദിവസം മന്ത്രി മോന്സ് ജോസഫ് ഒഴികെയുള്ള എംഎല്എമാരും പങ്കെടുക്കാത്തതിനെതിരെയും വിമര്ശനം ഉയര്ന്നു.
ചരല്ക്കുന്ന ്ക്യാമ്പില് പാര്ട്ടിക്ക് കീഴില് 'ബിസിനസ് ഫ്രണ്ട്' എന്ന പേരില് പോഷക സംഘടന ഉണ്ടാക്കണമെന്ന ആവശ്യം കോട്ടയം നിയോജക മണ്ഡലം പ്രസിഡന്റ് എബി പൊന്നാട്ട് ഉയര്ത്തിയത് മറ്റൊരു കൗതുകകരമായ ചര്ച്ചയ്ക്ക് വഴി തുറന്നു.
ഇപ്പോള് തന്നെ മൊത്തം ബിസിനസ് ആണല്ലോ.., പിന്നെന്തിന് വേറെ സംഘടന എന്ന ചോദ്യം മുതിര്ന്ന നേതാവ് കൊട്ടാരക്കര പൊന്നപ്പന് ഉയര്ത്തിയത് സദസില് ചിരി പടര്ത്തി. ഇനി അങ്ങനൊന്ന് തുടങ്ങിയാല് അത് പാര്ട്ടിയെ കടത്തിവെട്ടുന്ന സംഘടനയായി മാറുമെന്നായിരുന്നു മറ്റൊരു നേതാവിന്റെ കമന്റ്.
