കൊച്ചി: രണ്ടു മതക്കാർ തമ്മിലുള്ള വിവാഹത്തെയും മിശ്രവിവാഹ സംവരണ ആനുകൂല്യങ്ങള് പരിഗണിക്കുമ്പോള് കണക്കിലെടുക്കണമെന്ന് കേരള ഹൈക്കോടതി.
വ്യത്യസ്ത മതങ്ങളില്പ്പെട്ടവർ തമ്മിലുള്ള വിവാഹം മിശ്രവിവാഹമായി കണക്കാക്കാനാവില്ലെന്ന വില്ലേജ് ഓഫീസ് മാനുവലിലെ സാങ്കേതിക തടസ്സവാദം തള്ളിയാണ് ഹൈക്കോടതിയുടെ സുപ്രധാന ഉത്തരവ്. കോട്ടയം സ്വദേശിനി ജിഷ (40) സമർപ്പിച്ച ഹർജി തീർപ്പാക്കിക്കൊണ്ട് ജസ്റ്റിസ് ഹരിശങ്കർ വി. മേനോനാണ് സെപ്റ്റംബർ 15-ന് ഈ വിധി പ്രസ്താവിച്ചത്.
റോമൻ കാത്തലിക് ക്രിസ്ത്യൻ വിഭാഗത്തില്പ്പെട്ട ജിഷ, പട്ടികജാതി വിഭാഗത്തിലെ ഹിന്ദു മതസ്ഥനായ നിഷു സോമനെയാണ് വിവാഹം കഴിച്ചത്. കോട്ടയം പ്രിൻസിപ്പല് അഗ്രികള്ച്ചറല് ഓഫീസർക്ക് കീഴില് ഫാം ജീവനക്കാരിയായി 'മിശ്രവിവാഹിത' സംവരണ കോട്ടയിലാണ് ജിഷയ്ക്ക് നിയമനം ലഭിച്ചത്. തുടർന്ന് സംവരണം തെളിയിക്കുന്ന രേഖ ഹാജരാക്കാൻ അധികൃതർ ആവശ്യപ്പെടുകയായിരുന്നു.
2007 ഫെബ്രുവരി 1-ന് വൈക്കം തഹസീല്ദാർ നല്കിയ സർട്ടിഫിക്കറ്റാണ് ജിഷ ഹാജരാക്കിയത്. എന്നാല് പിന്നീട് സമീപകാലത്തെ സർട്ടിഫിക്കറ്റ് വേണമെന്ന് ഉദ്യോഗസ്ഥർ നിർബന്ധം പിടിച്ചതോടെ ജിഷ മീനച്ചില് തഹസീല്ദാരെ സമീപിച്ചു. ഭർത്താവും ഭാര്യയും വ്യത്യസ്ത മതങ്ങളില്പ്പെട്ടവരായതിനാല് ഇത് മിശ്രവിവാഹമായി പരിഗണിക്കാൻ കഴിയില്ലെന്ന് കാട്ടി തഹസീല്ദാർ അപേക്ഷ നിരസിച്ചു. പകരം, 2022 ഒക്ടോബറില് ഇരുവരുടെയും മതം വ്യക്തമാക്കുന്ന സർട്ടിഫിക്കറ്റാണ് നല്കിയത്.
കോഴ സ്റ്റേറ്റ് സീഡ് ഫാമിലെ സീനിയർ അഗ്രികള്ച്ചറല് ഓഫീസർ ഈ സർട്ടിഫിക്കറ്റും നിരസിച്ചതോടെയാണ് ജിഷ ഹൈക്കോടതിയെ സമീപിച്ചത്. 2022 നവംബറില് സർട്ടിഫിക്കറ്റ് താത്കാലികമായി സ്വീകരിച്ച് ജിഷയെ ജോലിയില് പ്രവേശിക്കാൻ അനുവദിക്കാൻ കോടതി ഉത്തരവിട്ടിരുന്നു. എന്നാല് കേസ് നിലനില്ക്കുന്നതിനാല് നിയമനം സ്ഥിരപ്പെടുത്തി നല്കിയിരുന്നില്ല.
വില്ലേജ് ഓഫീസ് മാനുവലിലെ വ്യവസ്ഥകള് ചൂണ്ടിക്കാട്ടി, ജിഷയുടേത് ഒരു മതാന്തര വിവാഹം മാത്രമാണെന്നും അതിനാല് മിശ്രവിവാഹ സംവരണത്തിന് അർഹതയില്ലെന്നുമായിരുന്നു സംസ്ഥാന സർക്കാരിന്റെ വാദം. എന്നാല് ഈ വാദം തള്ളിയ ഹൈക്കോടതി, ഹർജിക്കാരിയുടെ നിയമനം 'മിശ്രവിവാഹിത' വിഭാഗത്തിന് കീഴിലായതിനാല് അവർ ഹാജരാക്കിയ സർട്ടിഫിക്കറ്റുകളുടെ അടിസ്ഥാനത്തില് ആനുകൂല്യം നല്കണമെന്ന് വ്യക്തമാക്കി.
"ഒരു മിശ്രവിവാഹ സംവരണ ആനുകൂല്യം നല്കുമ്പോള് മതങ്ങള് തമ്മിലുള്ള വിവാഹവും കണക്കിലെടുക്കേണ്ടതുണ്ട്," എന്ന് ജസ്റ്റിസ് ഹരിശങ്കർ വി. മേനോൻ നിരീക്ഷിച്ചു. ജിഷ ഹാജരാക്കിയ സർട്ടിഫിക്കറ്റുകളുടെ അടിസ്ഥാനത്തില് അവരുടെ നിയമനം എത്രയും വേഗം സ്ഥിരപ്പെടുത്താനും അനുബന്ധ ആനുകൂല്യങ്ങള് നല്കാനും സീനിയർ അഗ്രികള്ച്ചറല് ഓഫീസർക്ക് ഹൈക്കോടതി കൃത്യമായ നിർദേശം നല്കി.
