കോട്ടയം : ഓൾ കേരള കാറ്ററിംങ് അസോസിയേഷൻ സംസ്ഥാന സമ്മേളനം സെപ്റ്റംബർ 28 നും 29 നും നടക്കും. കോട്ടയത്ത് നടക്കുന്ന സമ്മേളനത്തിൽ പ്രതിനിധി സമ്മേളനവും , പ്രകടനവും, പൊതുസമ്മേളനവും നടക്കും. കോട്ടയം കെ.സി മാമ്മൻ മാപ്പിള ഹാളിൽ പ്രതിനിധി സമ്മേളനവും, കോട്ടയം നഗരത്തിൽ പ്രകടനവും, തിരുനക്കര മൈതാനത്ത് പൊതുസമ്മേളനവും നടക്കും.
സെപ്റ്റംബർ 28 തിങ്കളാഴ്ച രാവിലെ ഒൻപതിന് കോട്ടയം കെ.സി മാമ്മൻ മാപ്പിള ഹാളിൽ രജിസ്ട്രേഷൻ ആരംഭിക്കും. രാവിലെ 10.00 ന് സംസ്ഥാന പ്രസിഡൻ്റ് ഏലിയാസ് സഖറിയ പതാക ഉയർത്തും. തുടർന്ന് സംസ്ഥാന സർക്കാരിൻ്റെ ലഹരി വിരുദ്ധ പ്രവർത്തനങ്ങൾക്ക് പിൻതുണ നൽകി , ഓപ്പറേഷൻ തൂഫാൻ പ്രതിജ്ഞ എടുക്കും. തുടർന്ന്, സ്മൃതി മണ്ഡപത്തിൽ പുഷ്പാർച്ചന നടത്തും. തുടർന്ന് മാമ്മൻമാപ്പിള ഹാളിൽ നടക്കുന്ന പരിപാടി മുൻ എം.പി സുരേഷ് കുറുപ്പ് ഉദ്ഘാടനം ചെയ്യും. തുടർന്ന്, 10.30 ന് ജറുസലേം മർത്തോമാ പള്ളി ഹാളിൽ പൊതുസമ്മേളനം നടക്കും.
തുടർന്ന് നടക്കുന്ന പ്രതിനിധി സമ്മേളനത്തിൽ സംസ്ഥാന ജനറൽ സെക്രട്ടറി റോബിൻ കെ.പോൾ റിപ്പോർട്ട് അവതരിപ്പിക്കും. ഉച്ചകഴിഞ്ഞ് രണ്ടു മണി മുതൽ കോട്ടയം മാമ്മൻമാപ്പിള ഹാളിൽ കലാപരിപാടികൾ നടക്കും. വൈകിട്ട് നാലു മണി മുതൽ നടക്കുന്ന സമ്മേളനത്തിൽ മെറിറ്റ് അവാർഡ് വിതരണവും വിവിധ വ്യക്തികൾക്ക് ആദരവും നൽകും. വൈകിട്ട് അഞ്ചിനു നടക്കുന്ന പ്രതിനിധി സമ്മേളനം നിയമസഭാ സ്പീക്കർ തിരുവഞ്ചൂർ രാധാകൃഷ്ണൻ ഉദ്ഘാടനം ചെയ്യും. സർക്കാർ ചീഫ് വിപ്പ് അപു ജോൺ ജോസഫ് ലോഗോ പ്രകാശനം ചെയ്യും. ജോസ് കെ.മാണി എം.പി മുഖ്യപ്രഭാഷണം നടത്തും.
സംസ്ഥാന സമ്മേളനത്തിൻ്റെ രണ്ടാം ദിവസമായ സെപ്റ്റംബർ 29 ചൊവ്വാഴ്ച രാവിലെ ഏഴിന് സംസ്ഥാന സർക്കാരിൻ്റെ ലഹരി വിരുദ്ധ പദ്ധതികൾക്ക് പിൻതുണയുമായി തൂഫാൻ വാക്കത്തോൺ നടത്തും. രാവിലെ 10 ന് മോട്ടി വേഷൻ ക്ലാസിൽ അന്താരാഷ്ട്ര മോട്ടിവേഷണൽ സ്പീക്കർ സുരേഷ് ബാബു ക്ലാസ് എടുക്കും. 11.30 ന് യുവ സംരംഭകർക്കായുള്ള ടോക്ക് ഷോയിൽ പൂഞ്ഞാർ എം.എൽ.എ എം.ജെ സെബാസ്റ്റ്യൻ ക്ലാസ് എടുക്കും. ഉച്ചയ്ക്ക് രണ്ടരയ്ക്ക് നാഗമ്പടം നെഹ്റു സ്റ്റേഡിയത്തിനു സമീപത്തു നിന്നും റാലിയ്ക്ക് തുടക്കമാകും. വൈകിട്ട് അഞ്ചിനു തിരുനക്കര മൈതാനത്ത് ചേരുന്ന പൊതുസമ്മേളനം ആഭ്യന്തരമന്ത്രി രമേശ് ചെന്നിത്തല ഉദ്ഘാടനം ചെയ്യും. സംസ്ഥാന പ്രസിഡൻ്റ് ഏലിയാസ് സഖറിയ അധ്യക്ഷത വഹിക്കും. വിവിധ ജനപ്രതിനിധികൾ പരിപാടികളിൽ പങ്കെടുക്കും.
സംസ്ഥാനത്തെ അംഗീകാരമുള്ള മുഴുവൻ കേറ്ററിംഗ് മാരുടെ പട്ടികയും സംസ്ഥാന സമ്മേളനത്തിന്റെ ഭാഗമായി പ്രസിദ്ധീകരിക്കും. ഇത് സമ്മേളനവേദിയിൽ പ്രസിദ്ധീകരിക്കുകയും സമ്മേളനത്തിന് എത്തുന്ന മന്ത്രിമാരും എംഎൽഎമാരും അടക്കമുള്ള ജനപ്രതിനിധികൾക്ക് സമർപ്പിക്കുകയും ചെയ്യും. സംസ്ഥാന സമ്മേളനത്തിന്റെ പ്രചാരണാർത്ഥം ഏറ്റുമാനൂരിൽ നടത്തിയ പാചക മത്സരത്തിലെ വിജയികൾക്ക് സംസ്ഥാന സമ്മേളനത്തിൽ സമ്മാനങ്ങൾ വിതരണം ചെയ്യും. സമ്മേളനത്തിന്റെ ഭാഗമായുള്ള സാംസ്കാരിക ഘോഷയാത്രയിൽ 14 ജില്ലകളിലെയും സാംസ്കാരിക തനിമ വിളിച്ചോതുന്ന നിശ്ചലദൃശ്യങ്ങൾ അണിനിരക്കും. പാരമ്പര്യ പാചക ഉപകരണങ്ങളുടെ പ്രദർശനവും സമ്മേളനത്തിന് ഭാഗമായി നടക്കുമെന്ന് അസോസിയേഷൻ ഭാരവാഹികൾ പത്രസമ്മേളനത്തിൽ അറിയിച്ചു.സംസ്ഥാന പ്രസിഡൻ്റ് ഏലിയാസ് സഖറിയ, സംസ്ഥാന രക്ഷാധികാരി പ്രിൻസ് ജോർജ് , കോട്ടയം ജില്ലാ പ്രസിഡൻ്റും സമ്മേളനത്തിൻ്റെ ജനറൽ കൺവീനറുമായ സജി ജേക്കബ്, കോട്ടയം ജില്ലാ സെക്രട്ടറിയും സമ്മേളനത്തിൻ്റെ ജോയിൻ്റ് കൺവീനറുമായ ബിജു തോമസ് , സംസ്ഥാന വൈസ് പ്രസിഡൻ്റ് മനോജ് മാധവശേരി , സംസ്ഥാന വൈസ് പ്രസിഡൻ്റ് കെ. കെ കബീർ , കോട്ടയം മേഖല പ്രസിഡൻ്റ് ബിനോയ് ആണ്ടൂർ എന്നിവർ പത്രസമ്മേളനത്തിൽ പങ്കെടുത്തു.
