ഡല്ഹി: തെരഞ്ഞെടുപ്പ് കമ്മീഷനില് ഭിന്നത രൂക്ഷമാകുന്നതിനിടെ മുഖ്യ തെരഞ്ഞെടുപ്പ് കമ്മീഷണർ ഗ്യാനേഷ് കുമാറിന്റെ പൊതുപരിപാടികള് റദ്ദാക്കി.
ഉത്തർപ്രദേശിലെ മീററ്റില് യുവാക്കളെയും ബൂത്ത് ലെവല് ഓഫീസർമാരെയും പങ്കെടുപ്പിച്ച് നടത്താനിരുന്ന ഗ്രാൻഡ് ഡയലോഗ് പരിപാടിയാണ് റദ്ദാക്കിയത്.
തിങ്കളാഴ്ച വാരാണസിയില് നടത്താനിരുന്ന പരിപാടിയും റദ്ദാക്കിയിട്ടുണ്ട്. വോട്ടർപട്ടിക പുതുക്കലുമായി ബന്ധപ്പെട്ട് തെരഞ്ഞെടുപ്പ് കമ്മീഷനില് തർക്കം നിലനില്ക്കുന്നുവെന്ന് റിപ്പോർട്ടുകളുണ്ടായിരുന്നു. എസ്ഐആറുമായി ബന്ധപ്പെട്ട് മറ്റ് രണ്ട് തെരഞ്ഞെടുപ്പ് കമ്മീഷണർമാർ സിഇസിക്ക് രേഖാമൂലം വിയോജിപ്പ് അറിയിച്ചിരുന്നു. ഇതിനു പിന്നാലെയാണ് രാജ്യതലസ്ഥാനത്ത് നാടകീയ നീക്കങ്ങള് അരങ്ങേറുന്നത്.
കഴിഞ്ഞ പത്തുമാസത്തിനിടെ വോട്ടർപട്ടികയില്നിന്ന് വ്യാപകമായി പേരുകള് നീക്കം ചെയ്ത നടപടിയെ ചോദ്യം ചെയ്ത് തെരഞ്ഞെടുപ്പ് കമ്മീഷണർമാരായ സുഖ്ബീർ സിംഗ് സന്ധുവും വിവേക് ജോഷിയും 14 തവണ കത്തുകള് നല്കിയിരുന്നു. കോടിക്കണക്കിന് പേരുകള് നീക്കം ചെയ്തതുമായി ബന്ധപ്പെട്ടായിരുന്നു കത്തുകള്.
വോട്ടർമാരെ പട്ടികയില് നിന്ന് പുറത്താക്കിയെന്ന് ആരോപിച്ച് രാഹുല് ഗാന്ധി, മമത ബാനർജി അടക്കമുള്ള പ്രതിപക്ഷ നേതാക്കള് മുഖ്യതെരഞ്ഞെടുപ്പ് കമ്മീഷണറുടെ രാജി ആവശ്യപ്പെട്ടിരുന്നു. അതേസമയം ഗ്യാനേഷ് കുമാറിന്റെ തീരുമാനങ്ങള് റദ്ദാക്കണമെന്ന ആവശ്യവുമായി ബോംബെ ഹൈക്കോടതിയില് ഹർജി സമർപ്പിച്ചിട്ടുണ്ട്.
