അമരാവതി: ആന്ധ്രാപ്രദേശ് - യാനം തീരങ്ങളില്‍ 'അര്‍ണബ്' ചുഴലിക്കാറ്റ് പൂര്‍ണ്ണമായി കരതൊട്ടു. മണിക്കൂറില്‍ 135 കിലോമീറ്റര്‍ വരെ വേഗതയിലും ചില അവസരങ്ങളില്‍ 150 കിലോമീറ്റര്‍ വരെ ഉയര്‍ന്ന വേഗതയിലും ആഞ്ഞടിച്ച കാറ്റോടെയാണ് ചുഴലിക്കാറ്റിന്റെ കേന്ദ്രഭാഗം കരയിലേക്ക് പ്രവേശിച്ചതെന്ന് ഇന്ത്യന്‍ കാലാവസ്ഥാ വകുപ്പ് സ്ഥിരീകരിച്ചു.
ഇന്ത്യയുടെ ഇന്‍സാറ്റ്-3ഡി.എസ് ഉപഗ്രഹം പകര്‍ത്തിയ തത്സമയ ചിത്രങ്ങളില്‍, ഉപഭൂഖണ്ഡത്തിന്റെ ഏകദേശം പകുതിയോളം ഭാഗത്തെ മറയ്ക്കുന്ന രീതിയില്‍ വിസ്തൃതമായി പടര്‍ന്നുപന്തലിച്ച കൂറ്റന്‍ മേഘപടലങ്ങളാണ് ദൃശ്യമാകുന്നത്.
ഒക്ടോബര്‍ 28 ബുധനാഴ്ച പുലര്‍ച്ചെ 2 മണിക്കും രാവിലെ 8 മണിക്കും ഇടയിലാണ് അതിതീവ്ര ചുഴലിക്കാറ്റായി അര്‍ണബ് കര തൊട്ടത്. നര്‍സാപൂരിന് 20 കിലോമീറ്റര്‍ കിഴക്ക്-വടക്കുകിഴക്കായും യാനത്തിന് 40 കിലോമീറ്റര്‍ തെക്കുപടിഞ്ഞാറായും കാക്കിനടയ്ക്ക് 60 കിലോമീറ്റര്‍ തെക്കുപടിഞ്ഞാറായുമാണ് കാറ്റിന്റെ കേന്ദ്രം സ്ഥിതി ചെയ്തിരുന്നത്.
ഉപഗ്രഹത്തില്‍ നിന്നുള്ള ഇന്‍ഫ്രാറെഡ് ചിത്രങ്ങള്‍ പ്രകാരം ചുഴലിക്കാറ്റിന്റെ ആഘാതമേഖല തെക്കേ ഇന്ത്യയിലും പൂര്‍വ്വ ഇന്ത്യയിലും ബംഗാള്‍ ഉള്‍ക്കടലിലും വന്‍തോതില്‍ പടര്‍ന്നു കിടക്കുകയാണ്.
ചുഴലിക്കാറ്റ് പൂര്‍ണ്ണമായും കരതൊട്ടതോടെ കടലില്‍ നിന്നുള്ള ഊര്‍ജ്ജലഭ്യത കുറയുകയും കരയിലെ തടസ്സങ്ങള്‍ കാരണം വരും മണിക്കൂറുകളില്‍ ഇതിന്റെ വേഗത ക്രമേണ കുറയുകയും ചെയ്യുമെന്ന് കാലാവസ്ഥാ നിരീക്ഷണ കേന്ദ്രം വ്യക്തമാക്കുന്നു.
എങ്കിലും, കാറ്റിന്റെ കേന്ദ്രത്തിന് വളരെ അകലേക്ക് വരെ പടര്‍ന്നുനില്‍ക്കുന്ന മഴമേഘങ്ങള്‍ കാരണം കനത്ത മഴയ്ക്കും പെട്ടെന്നുണ്ടാകുന്ന വെള്ളപ്പൊക്കത്തിനും സാധ്യത നിലനില്‍ക്കുന്നുണ്ട്.
