കട്ടപ്പന: ഇന്നലെ പെയ്ത കനത്ത മഴയില്‍ കട്ടപ്പന പുതിയ ബസ് സ്റ്റാന്റ് വെള്ളത്തില്‍.
വൈകിട്ട് അഞ്ചോടെയാണ് കട്ടപ്പന പ്രദേശത്ത് കനത്ത മഴ പെയ്തത്. ഒരു മണിക്കൂറോളം നീണ്ടു നിന്ന മഴയില്‍ കട്ടപ്പന പ്രദേശത്ത് പലയിടങ്ങളിലും വെള്ളക്കെട്ടുണ്ടായി.
പുതിയ ബസ് സ്റ്റാന്റിനുള്ളില്‍ വെള്ളം കെട്ടികിടന്നത് ബസുകള്‍ക്കും യാത്രികർക്കും ഏറെ ബുദ്ധിമുട്ടുണ്ടാക്കി. മുമ്പും ബസ് സ്റ്റാന്റില്‍ സമാനമായി വെള്ളം കെട്ടിക്കിടന്ന് പ്രതിസന്ധി സൃഷ്ടിച്ചിട്ടുണ്ട്.
ഓടകളില്‍ നീരൊഴുക്ക് സുഗമമല്ലാത്തതാണ് വെള്ളം കെട്ടിക്കിടക്കാൻ കാരണമാകുന്നത്. ഇക്കാര്യം വ്യാപാരികള്‍ അടക്കം നിരവധി തവണ നഗരസഭയെ അറിയിച്ചിട്ടുണ്ടെങ്കിലും കാര്യമായ നടപടികള്‍ ഉണ്ടായിട്ടില്ല.
ഇന്നലെ മണിക്കൂറുകളോളമാണ് ബസ് സ്റ്റാന്റില്‍ വെള്ളം കെട്ടിക്കിടന്നത്. ബസ് സ്റ്റാന്റിലെ ഷോപ്പിങ് കോംപ്ലക്സും ഇതോടെ ചെളിക്കുണ്ടിലായി. യാത്രികർ ഏറെ പണിപ്പെടാണ് വാഹനങ്ങളില്‍ കയറാൻ എത്തിയത്.
മഴയെ തുടർന്ന് കട്ടപ്പനയാറ്റില്‍ അനിയന്ത്രിതമായി ജലനിരപ്പ് ഉയർന്നിരുന്നു. ഇന്നലത്തെ മഴയില്‍ കട്ടപ്പന വള്ളക്കടവില്‍ ചക്കുംമൂട്ടില്‍ ജോണിയുടെ വീടിനു മുകളിലേക്ക് മരം വീണ് വീടിനു കേടുപാടുകളുണ്ടായി.
