കണ്ണൂര്: വിവാഹബ്യൂറോയില് രജിസ്റ്റര് ചെയ്ത് ഒന്പത് വര്ഷം പിന്നിട്ടിട്ടും വധുവിനെ കണ്ടെത്തി നല്കാത്തതിനെ തുടര്ന്ന് യുവാവിന് നഷ്ടപരിഹാരം നല്കാന് ഉപഭോക്തൃ കോടതി ഉത്തരവിട്ടു.
സേവനത്തില് വീഴ്ചവരുത്തിയ ബ്യൂറോ പരാതിക്കാരന് 8,000 രൂപ നല്കണമെന്നാണ് ജില്ലാ ഉപഭോക്തൃ ഫോറത്തിന്റെ വിധി.
പങ്കാളിയെ കണ്ടെത്തുന്നതില് ബ്യൂറോ പരാജയപ്പെട്ടതിനെ തുടര്ന്ന് യുവാവ് രജിസ്ട്രേഷന് തുക തിരികെ ചോദിച്ചെങ്കിലും അധികൃതര് നല്കാന് തയ്യാറായിരുന്നില്ല.
ഇതിനെതിരെയാണ് യുവാവ് കോടതിയെ സമീപിച്ചത്. മാനസിക വിഷമം ഉണ്ടാക്കിയതിന് 3,000 രൂപയും കോടതി ചെലവുകള്ക്കായി 2,000 രൂപയും രജിസ്ട്രേഷന് തുകയായ 3,000 രൂപയും ഉള്പ്പെടെയാണ് ആകെ 8,000 രൂപ നല്കാന് ഫോറം വിധിച്ചത്.
കേസിന്റെ പശ്ചാത്തലം- 2016ല് തന്റെ നാല്പ്പതാം വയസ്സിലാണ് യുവാവ് വിവാഹ പരസ്യം കണ്ട് കണ്ണൂര് ടൗണില് പ്രവര്ത്തിക്കുന്ന മാട്രിമോണി ബ്യൂറോയെ സമീപിക്കുന്നത്.
കാസര്കോട് സ്വദേശിയായ ഒരു പെണ്കുട്ടിയുടെ ആലോചനയുണ്ടെന്ന് ആദ്യ ഘട്ടത്തില് അറിയിച്ചെങ്കിലും പിന്നീട് ബ്യൂറോയുടെ ഭാഗത്തുനിന്ന് യാതൊരുവിധ പ്രതികരണവുമുണ്ടായില്ല.
തുടര്ന്ന് പരാതിക്കാരന് ഹാജരാക്കിയ രേഖകള് പരിശോധിച്ച ഉപഭോക്തൃ ഫോറം ജൂണ് 30ന് അന്തിമ ഉത്തരവ് പുറപ്പെടുവിക്കുകയായിരുന്നു.
പരാതിക്കാരന്റെ പിതാവ് കാന്സര് ബാധിതനായിരുന്നു. മകന്റെ വിവാഹം കാണണമെന്ന വലിയ ആഗ്രഹം സാധിക്കാതെ കഴിഞ്ഞ വര്ഷം അദ്ദേഹം അന്തരിച്ചു. ബ്യൂറോയുടെ അനാസ്ഥ മൂലം തന്റെ വിലപ്പെട്ട സമയവും മനഃസമാധാനവും നഷ്ടപ്പെട്ടതായി കാണിച്ച് യുവാവ് നഷ്ടപരിഹാരം ആവശ്യപ്പെടുകയായിരുന്നു. കോടതി നടപടികളോട് എതിര്കക്ഷിയായ വിവാഹബ്യൂറോ അധികൃതര് സഹകരിക്കുകയോ ഹാജരാവുകയോ ചെയ്തില്ല.
