തിരുവനന്തപുരം: ശബരിമല മേല്ശാന്തി തെരഞ്ഞെടുപ്പിന്റെ ഭാഗമായി നടക്കുന്ന നറുക്കെടുപ്പിലും അഭിമുഖ നടപടികളിലും തന്ത്രി കണ്ഠരര് രാജീവരെ ഉള്പ്പെടുത്തില്ലെന്ന് തിരുവിതാംകൂര് ദേവസ്വം ബോര്ഡ് പ്രസിഡന്റ് കെ. ജയകുമാര്. ശബരിമല സ്വര്ണക്കൊള്ള കേസില് പ്രതിചേര്ക്കപ്പെട്ട സാഹചര്യത്തിലാണ് തീരുമാനം.
മേല്ശാന്തി തെരഞ്ഞെടുപ്പിന്റെ ഭാഗമായി നടക്കുന്ന അഭിമുഖത്തില് പരമ്പരാഗതമായി രണ്ട് തന്ത്രിമാര് പങ്കെടുക്കാറുണ്ട്. എന്നാല് കണ്ഠരര് രാജീവരെ ഇത്തവണ അഭിമുഖത്തിന് ക്ഷണിക്കില്ലെന്ന് ദേവസ്വം ബോര്ഡ് വ്യക്തമാക്കി. നിലവില് മേല്ശാന്തി തെരഞ്ഞെടുപ്പിനായുള്ള അഭിമുഖ നടപടികള് പുരോഗമിക്കുകയാണ്.
അതേസമയം, ശബരിമല തന്ത്രി സ്ഥാനത്ത് നിന്ന് തന്നെ ഒഴിവാക്കണമെന്ന് ആവശ്യപ്പെട്ട് കണ്ഠരര് രാജീവര് ദേവസ്വം ബോര്ഡിന് കത്ത് നല്കിയിട്ടുണ്ട്. അനാരോഗ്യം കാരണം തന്ത്രി ചുമതലകള് നിര്വഹിക്കാന് ബുദ്ധിമുട്ടുണ്ടെന്നും, പകരം മകന് കണ്ഠരര് ബ്രഹ്മദത്തനെ തന്ത്രി സ്ഥാനത്തേക്ക് പരിഗണിക്കണമെന്നുമാണ് കത്തില് ആവശ്യപ്പെട്ടിരിക്കുന്നത്.
ശബരിമല സ്വര്ണക്കൊള്ള കേസില് പ്രതിയായതിന് പിന്നാലെ അറസ്റ്റിലായ കണ്ഠരര് രാജീവര് ജാമ്യത്തില് പുറത്തിറങ്ങിയെങ്കിലും ഇതുവരെ സന്നിധാനത്ത് തിരിച്ചെത്തിയിട്ടില്ല. നിലവില് കണ്ഠരര് മഹേഷ് മോഹനരാണ് ശബരിമല തന്ത്രി. ചിങ്ങം മാസം മുതല് തന്ത്രി ചുമതല ഏറ്റെടുക്കേണ്ടത് കണ്ഠരര് രാജീവരായിരുന്നെങ്കിലും കേസിന്റെ പശ്ചാത്തലത്തില് ആ ചുമതലയില് നിന്ന് പിന്മാറുന്നതായി അദ്ദേഹം ദേവസ്വം ബോര്ഡിനെ അറിയിക്കുകയായിരുന്നു.
ശബരിമലയില് താന്ത്രിക അവകാശമുള്ള താഴമണ് മഠത്തിലെ കണ്ഠരര് മോഹനരും കണ്ഠരര് രാജീവരുമായിരുന്നു തന്ത്രി സ്ഥാനം വഹിച്ചിരുന്നത്. പിന്നീട് കണ്ഠരര് മോഹനര് ചുമതല മകന് കണ്ഠരര് മഹേഷ് മോഹനര്ക്ക് കൈമാറി. ഇതിന് പിന്നാലെയാണ് കണ്ഠരര് രാജീവരും തന്ത്രി സ്ഥാനം മകന് കണ്ഠരര് ബ്രഹ്മദത്തന് നല്കണമെന്ന് ദേവസ്വം ബോര്ഡിനോട് ആവശ്യപ്പെട്ടിരിക്കുന്നത്.
