കൊച്ചി: എറണാകുളം ജില്ലാ ഉപഭോക്തൃ തര്ക്ക പരിഹാര കോടതി കല്യാണ് സില്ക്സിന് 31,500 രൂപ പിഴ ചുമത്തിയ സംഭവത്തിന്റെ പശ്ചാത്തലത്തില്, വിശദീകരണവുമായി സ്ഥാപനം.
2023ല് നടപ്പിലാക്കിയ പ്രമോഷണല് ക്യാമ്പയിനുമായി ബന്ധപ്പെട്ട് സമൂഹമാധ്യമങ്ങളില് പ്രചരിക്കുന്ന ചില വാര്ത്തകള് തെറ്റിദ്ധരിപ്പിക്കുന്നതാണെന്നാണ് കല്യാണ് സില്ക്സിന്റെ നിലപാട്.
ഫേസ്ബുക്കില് പങ്കുവെച്ച വിശദീകരണത്തിലാണ് സ്ഥാപനത്തിന്റെ പ്രതികരണം.3,000 രൂപയ്ക്ക് സാധനങ്ങള് വാങ്ങുന്ന ഓരോ ഉപഭോക്താവിനും 500 രൂപ വീതമുള്ള മൂന്ന് ഗിഫ്റ്റ് വൗച്ചറുകളാണ് 2023ലെ പ്രമോഷണല് ഓഫറിന്റെ ഭാഗമായി നല്കിയിരുന്നതെന്ന് കല്യാണ് സില്ക്സ് വിശദീകരിക്കുന്നു.
തുടര്ന്ന് നടത്തുന്ന 1,500 രൂപയോ അതില് കൂടുതലോ വരുന്ന പര്ച്ചേസുകള്ക്ക് ഈ മൂന്ന് വൗച്ചറുകളും ഉപയോഗിക്കാവുന്ന രീതിയിലായിരുന്നു ഓഫര് ക്രമീകരിച്ചിരുന്നതെന്നും സ്ഥാപനം വ്യക്തമാക്കി.
ഓഫറിന്റെ നിബന്ധനകള് ഉപഭോക്താക്കള്ക്ക് നല്കിയ കൂപ്പണുകളിലും അന്നത്തെ പത്രപരസ്യങ്ങളിലും വ്യക്തമായി രേഖപ്പെടുത്തിയിരുന്നുവെന്നും കല്യാണ് സില്ക്സ് അവകാശപ്പെടുന്നു.
എന്നാല്, ഇടപ്പള്ളി സ്വദേശിയുടെ പരാതി പരിഗണിച്ച കേസില് ഉപഭോക്താവിന് നല്കിയ ഓഫറിന്റെ പ്രധാന നിബന്ധനകള് വ്യക്തമായി മനസ്സിലാക്കാന് കഴിയാത്ത വിധം ചെറിയ അക്ഷരങ്ങളിലാണ് പരസ്യത്തില് നല്കിയിരുന്നതെന്ന് ഉപഭോക്തൃ തര്ക്ക പരിഹാര കോടതി നിരീക്ഷിച്ചിരുന്നു.
3,000 രൂപയ്ക്ക് സാധനങ്ങള് വാങ്ങുമ്പോള് 1,500 രൂപയുടെ ഷോപ്പിംഗ് ആനുകൂല്യം ലഭിക്കുമെന്ന പത്രപ്പരസ്യം കണ്ടാണ് പരാതിക്കാരന് കല്യാണ് സില്ക്സിലെത്തിയത്.
തുടര്ന്ന് 4,055 രൂപയ്ക്ക് വസ്ത്രങ്ങള് വാങ്ങിയപ്പോള് 500 രൂപ വീതമുള്ള മൂന്ന് കൂപ്പണുകളാണ് ലഭിച്ചതെന്നും, അവ പിന്നീട് നിശ്ചിത തുകയ്ക്ക് സാധനങ്ങള് വാങ്ങുമ്പോള് മാത്രമേ ഉപയോഗിക്കാനാകൂവെന്നും സ്ഥാപനം അറിയിച്ചെന്നുമാണ് പരാതിയില് പറയുന്നത്.
ഓഫറിന്റെ പ്രധാന നിബന്ധനകള് സാധാരണ ഉപഭോക്താവിന് എളുപ്പത്തില് വായിച്ചും മനസ്സിലാക്കിയും അറിയാന് കഴിയാത്ത തരത്തില് ചെറിയ അക്ഷരങ്ങളില് നല്കിയിരിക്കുന്നത് അന്യായമായ വ്യാപാര രീതിയാണെന്ന് കോടതി വിലയിരുത്തിയിരുന്നു.
