വയനാട്: വയനാടിന്റെ റെയില്‍വേ സ്വപ്നങ്ങള്‍ വാനോളമുയർത്തി ഇ.ശ്രീധരന്റെ അതിവേഗ റയില്‍പാത സംബന്ധിച്ച അവതരണം പ്രതീക്ഷയ്ക്ക് വക നല്‍കുന്നു.
യാത്രാ പ്രശ്നം കൊണ്ട് പൊറുതി മുട്ടുന്ന വയനാടൻ ജനതയ്ക്ക് പുതിയ പ്രതീക്ഷകള്‍. അതിവേഗപാതയുടെ എക്സ്റ്റൻഷൻ രൂപരേഖ തയാറാക്കി കോർപറേഷൻ സർക്കാരിന് സമർപ്പിച്ചിട്ടുണ്ട്.
എക്സ്റ്റൻഷൻ ഒന്നാംഘട്ടം വയനാട്- കോഴിക്കോട് എന്നാണ് ഡി.എം.ആർ.സി വിഭാവനം ചെയ്യുന്നത്. പാതയുടെ പരിസ്ഥിതി ആഘാതം, സാമ്പത്തികവശങ്ങള്‍ തുടങ്ങിയ വിശദാംശങ്ങള്‍ ഇ.ശ്രീധരൻ അവതരിപ്പിച്ചു.
പാതയുമായി ബന്ധപ്പെട്ട് സംശയനിവാരണത്തിന് പൊതുജനങ്ങള്‍ക്കും വിദ്യാർത്ഥികള്‍ക്കും അവസരം ഉണ്ടായിരുന്നു. അവതരണത്തിന് ശേഷം മാദ്ധ്യമപവർത്തകരുമായി ഡോ.ശ്രീധരൻ കൂടിക്കാഴ്ച നടത്തി.
സുല്‍ത്താൻ ബത്തേരി ടൗണ്‍ഹാളില്‍ തിങ്ങിനിറഞ്ഞ സദസിന് മുമ്പാകെയാണ് കേരളത്തിന്റെ തിരുവനന്തപുരം - കണ്ണൂർ അതിവേഗ റെയില്‍പാത സംബന്ധിച്ചും പാതയുടെ കോഴിക്കോട് സുല്‍ത്താൻ ബത്തേരി ശാഖ സംബന്ധിച്ചും ഡല്‍ഹി മെട്രോ റെയില്‍ കോർപ്പറേഷൻ (ഡി.എംആർസി ) നടത്തിയ പഠനത്തിന്റെ പ്രസക്തഭാഗം അവതരിപ്പിച്ചത്.
തിരുവനന്തപുരം കണ്ണൂർ പാതയ്ക്ക് എല്‍.ഡി.എഫ് സർക്കാർ വിഭാവനം ചെയ്ത കെ. റെയില്‍ പദ്ധതിക്ക് ലക്ഷം കോടിയാണ് ചെലവ് പ്രതീക്ഷിക്കുന്നത്. എന്നാല്‍ ഡി.എം.ആർ.സി തയ്യാറാക്കിയ പദ്ധതി പ്രകാരം ഇത് 60,000 കോടിയാക്കി ചുരുക്കി.
ബ്രോഡ് ഗേജില്‍ നിന്ന് അതിവേഗ പാതയ്ക്ക് പ്രയോഗികമായ സ്റ്റാൻഡേഡ് ഗേജിലേക്ക് മാറ്റിയതോടെ 30% ചെലവ് ലാഭിക്കാനായി. പാത തിരുവനന്തപുരം നഗരത്തിലൊഴികെ മേല്‍പ്പാലങ്ങളിലൂടെയാണ് നിർമ്മിക്കുക. 30 മീറ്റർ അകലത്തിലാണ് തൂണുകള്‍ വേണ്ടിവരിക. പാതയ്ക്ക് 20 മീറ്റർ വീതിയിലേ സ്ഥലം ഏറ്റെടുക്കേണ്ടതുള്ളൂ. ഇതിന് നിലവിലെ നിയമപ്രകാരം നഷ്ടപരിഹാരം ലഭിക്കും.
എന്നാല്‍ പാതയുടെ പണി പൂർത്തിയായാല്‍ സ്ഥലം ഉടമകള്‍ക്ക് തിരികെ നല്‍കും. ഇവിടെ കൃഷിയും അനുവദനീയമായ മറ്റ് പ്രവൃത്തികളും ചെയ്യാം.
