എറണാകുളം : കളമശേരി മെഡിക്കല്‍ കോളജില്‍ ചികിത്സയിലിരുന്ന യുവാവ് മരിച്ചത് ചികിത്സാ പിഴവെന്ന ആരോപണവുമായി ബന്ധുക്കള്‍. ബൈക്ക് അപകടത്തില്‍ പരുക്കേറ്റ് ചികിത്സയിലിരുന്ന മട്ടാഞ്ചേരി സ്വദേശി ഗലീലാണ്, ഇന്ന് ഡിസ്ചാര്‍ജ് ചെയ്യാനിരിക്കെ കുഴഞ്ഞുവീണ് മരിച്ചത്. ശാരീരിക ബുദ്ധിമുട്ട് ഉണ്ടായപ്പോള്‍ ഡോക്ടർമാരോ നഴ്സുമാരോ വാര്‍ഡില്‍ എത്തിയില്ലെന്ന് ബന്ധുക്കള്‍ ആരോപിച്ചു.
'വാര്‍ഡില്‍ ഡോക്ടര്‍മാരോ നഴ്സുമാരോ ആരും ഇല്ലായിരുന്നു. സിപിആര്‍ കൊടുക്കാന്‍ പോലും ആളില്ലാത്ത സ്ഥിതിയിലാണ് ഐസിയുവിലേക്ക് രോഗിയെ മാറ്റാനുള്ള സാഹചര്യം ഉണ്ടായത്. ചികിത്സാ പിഴവ് കാരണമാണോ അനാസ്ഥ കാരണമാണോ എന്നതില്‍ സംശയമുണ്ട്. പരാതി ഡെപ്യൂട്ടി സൂപ്രണ്ടിന് നേരിട്ട് എഴുതി കൊടുത്തിരുന്നു' എന്നും ബന്ധുക്കൾ പറഞ്ഞു. കൂടാതെ കളമശേരി പൊലീസ് സ്റ്റേഷനിലും ബന്ധുക്കള്‍ പരാതി നല്‍കി.
കാലിന് ശസ്ത്രക്രിയ നടത്തിയ ശേഷം യുവാവിനെ വാര്‍ഡിലേക്ക് മാറ്റിയിരുന്നു. ഇന്ന് ഡിസ്ചാര്‍ജ് ചെയ്യാനിരിക്കെയാണ് യുവാവ് കുഴഞ്ഞുവീണ് മരിച്ചത്. വീഴ്ച്ച ഉണ്ടായെങ്കില്‍ നടപടി സ്വീകരിക്കും എന്ന് മെഡിക്കല്‍ കോളേജ് സൂപ്രണ്ട് പറഞ്ഞു. അതേസമയം പോസ്റ്റ്മോര്‍ട്ടം നടപടികള്‍ ഇന്ന് നടക്കും. മെഡിക്കല്‍ കോളേജില്‍ ഡിവൈഎഫ്‌ഐ, എ ഐ വൈ എഫ് പ്രവര്‍ത്തകര്‍ പ്രതിഷേധിച്ചു.
