കൊച്ചി: കാലടി സർവ്വകലാശാലയില്‍ സസ്പെൻഷനിലായ വിദ്യാർത്ഥികള്‍ക്ക് ഹൈക്കോടതിയില്‍ തിരിച്ചടി.
വിദ്യാർത്ഥികള്‍ക്ക് പരീക്ഷയെഴുതാൻ കോടതി അനുമതി നല്‍കിയില്ല. സിംഗിള്‍ ബെഞ്ച് ഉത്തരവ് ചട്ടവിരുദ്ധമെന്ന് ഡിവിഷൻ ബെഞ്ച് ചൂണ്ടിക്കാട്ടി.
സസ്പെൻഡ് ചെയ്ത വിദ്യാർത്ഥികളെ പരീക്ഷ എഴുതാൻ അനുവദിക്കണമെന്ന ഉത്തരവിനെതിരെ കാലടി സർവകലാശാല നല്‍കിയ അപ്പീലില്‍ ആണ് ഹൈക്കോടതി ഡിവിൻ ബെഞ്ച് വിധി പറഞ്ഞത്.
സസ്പെൻഡ് ചെയ്യപ്പെട്ട 16ല്‍ 10 വിദ്യാർത്ഥികളാണ് പരീക്ഷ എഴുതാനുള്ളത്. നാളെ മുതലാണ് പരീക്ഷ ആരംഭിക്കുന്നത്. 16 വിദ്യാർത്ഥികളെ സസ്പെൻഡ് ചെയ്തിട്ട് ഇന്ന് 65 ദിവസമാവുകയാണ്.
അതേസമയം മാപ്പ് എഴുതി നല്‍കിയാല്‍ കാലടി സർവ്വകലാശാലയിലെ 16ല്‍ 12 വിദ്യാർത്ഥികളുടേയും സസ്‌പെൻഷൻ പിൻവലിക്കാമെന്നായിരുന്നു ഇന്നലെ കൂടിയ സിൻഡിക്കേറ്റ് തീരുമാനം.
മാപ്പ് എഴുതി നല്‍കി കീഴടങ്ങാനില്ലെന്നായിരുന്നു എസ്‌എഫ്‌ഐ പ്രവർത്തകരുടെ പ്രഖ്യാപനം. ഓഗസ്റ്റ് 23ലെ സമരം അക്രമത്തിലേക്ക് എത്തിയെന്നും വിസിയുടെ പ്രതീകാത്മക ശവ ഘോഷയാത്ര നടത്തിയെന്നുമാണ് അന്വേഷണ സമിതി സിൻഡിക്കേറ്റിന് മുന്നില്‍ വെച്ച റിപ്പോർട്ടിലുള്ളത്.
