കാഠ്മണ്ഡു: കമ്പ്യൂട്ടര്‍ കീബോര്‍ഡുകളിലും സ്മാര്‍ട്ട്‌ഫോണ്‍ സ്‌ക്രീനുകളിലും വിരലമര്‍ത്താന്‍ പുതിയ തലമുറ ശീലിച്ച കാലഘട്ടത്തിലാണ്, നേപ്പാളില്‍ നിന്നുള്ള പതിനാലുകാരിയായ പ്രകൃതി മല്ല തന്റെ അതിമനോഹരമായ കൈയക്ഷരം കൊണ്ട് ലോകമെമ്പാടുമുള്ള സോഷ്യല്‍ മീഡിയയില്‍ വൈറലായത്.
അക്ഷരങ്ങളുടെ കൃത്യതയും വരികള്‍ക്കിടയിലെ മിതമായ അകലവും കണ്ട് പലരും ഇതൊരു കമ്പ്യൂട്ടര്‍ ഫോണ്ട് ആയിരിക്കുമെന്നേ കരുതിയുള്ളൂ. ഒരു കൊച്ചു മിടുക്കി സ്വന്തം കൈകൊണ്ട് എഴുതിയതാണെന്ന് വിശ്വസിക്കാന്‍ പോലും ആളുകള്‍ ആദ്യം പ്രയാസപ്പെട്ടു.
നേപ്പാളിലെ ബിരേന്ദ്ര സൈനിക അവശിയ മഹാവിദ്യാലയത്തില്‍ എട്ടാം ക്ലാസില്‍ പഠിക്കുമ്പോള്‍ അസൈന്‍മെന്റായി എഴുതിയ ഒരു പേപ്പറിന്റെ ഫോട്ടോയാണ് അന്താരാഷ്ട്ര തലത്തില്‍ വലിയ ചര്‍ച്ചയായത്. പുസ്തകത്തില്‍ അച്ചടിച്ചതുപോലെ ഒരേപോലെയുള്ള അക്ഷരങ്ങളും കൃത്യമായ വിടവുകളും ഈ കൊച്ചു കുട്ടിയുടെ കൈയക്ഷരത്തെ സമാനതകളില്ലാത്തതാക്കി മാറ്റി. സോഷ്യല്‍ മീഡിയയില്‍ അതിവേഗം പ്രചരിച്ച ഈ ചിത്രങ്ങള്‍ കണ്ട്, പ്രകൃതിയുടെ കൈയക്ഷരം ഒരു കമ്പ്യൂട്ടര്‍ ഫോണ്ട് ആയി മാറ്റണമെന്ന് പോലും പലരും അഭിപ്രായപ്പെട്ടു.
തന്റെ പതിനാലാമത്തെ വയസ്സില്‍ നേപ്പാളില്‍ വലിയ തോതില്‍ ശ്രദ്ധിക്കപ്പെട്ട പ്രകൃതിയുടെ പ്രതിഭ പിന്നീട് അതിര്‍ത്തികള്‍ കടന്ന് ലോകമെങ്ങും ചര്‍ച്ചയാവുകയായിരുന്നു. 'ലോകത്തിലെ ഏറ്റവും മനോഹരമായ കൈയക്ഷരം' എന്ന വിശേഷണമാണ് പിന്നീട് ഇവരുടെ പേരിനൊപ്പം ചേര്‍ത്തുവെക്കപ്പെട്ടത്. വലിയ അലങ്കാരങ്ങളോ ജാഡകളോ ഇല്ലാതെ, അക്ഷരങ്ങളിലെ വ്യക്തതയും ലളിതമായ ഭംഗിയുമാണ് ഈ പെണ്‍കുട്ടിയുടെ എഴുത്തിനെ മറ്റുള്ളവരില്‍ നിന്ന് വ്യത്യസ്തമാക്കിയത്.
2022 ഡിസംബറില്‍ യു.എ.ഇയുടെ 51-ാമത് ദേശീയ ദിനാഘോഷത്തോടനുബന്ധിച്ച്‌ ഭരണാധികാരികള്‍ക്ക് പ്രകൃതി അയച്ച അഭിനന്ദനക്കത്ത് അന്താരാഷ്ട്ര തലത്തില്‍ വീണ്ടും പ്രശംസനേടിക്കൊടുത്തു. നേപ്പാളിലെ യു.എ.ഇ എംബസി ഈ കൊച്ചു മിടുക്കിയുടെ പ്രതിഭയെ നേരിട്ട് ആദരിക്കുകയും ലോകത്തിലെ ഏറ്റവും മികച്ച കൈയക്ഷരമുള്ളവളായി വിശേഷിപ്പിക്കുകയും ചെയ്തു. പെന്‍, പെന്‍സിലുകള്‍ കൊണ്ട് കടലാസില്‍ വിസ്മയം തീര്‍ക്കാന്‍ കഴിയുമെന്ന് ഈ കുട്ടി വീണ്ടും തെളിയിക്കുകയായിരുന്നു.
ഡിജിറ്റല്‍വല്‍ക്കരണത്തിന്റെ അതിവേഗതയില്‍ മനുഷ്യന്റെ കൈയക്ഷരങ്ങളും വ്യക്തിഗത സ്പര്‍ശങ്ങളും നഷ്ടപ്പെട്ടുകൊണ്ടിരിക്കുന്ന ഇക്കാലത്ത് പ്രകൃതി മല്ലയുടെ കഥ വലിയൊരു സന്ദേശമാണ് നല്‍കുന്നത്. എഴുതുന്നവന്റെ വികാരങ്ങളും ആത്മാര്‍ത്ഥതയും ഒരു കൈയക്ഷരത്തില്‍ എങ്ങനെ പ്രതിഫലിക്കുന്നു എന്ന് ഈ കുട്ടി കാണിച്ചുതരുന്നു. സ്മാര്‍ട്ട് യുഗത്തിലും മനുഷ്യന്റെ കൈകള്‍ക്ക് ഇത്രയും മനോഹരമായ സൃഷ്ടികള്‍ നടത്താനാകുമെന്നതിന്റെ ഉത്തമ ഉദാഹരണമായി പ്രകൃതിയുടെ ഈ അസൈന്‍മെന്റ് കാലത്തെ അതിജീവിച്ച്‌ നിലനില്‍ക്കുന്നു.
