കടുത്തുരുത്തി: കടുത്തുരുത്തി ടൗണിലെ വലിയപാലത്തോട് ചേര്ന്നുള്ള ഒരു വശത്തെ നടപ്പാത അപകടാവസ്ഥയില്. ഇതുവഴിയുള്ള കാല്നടയാത്ര നിരോധിച്ച് ബോര്ഡ് സ്ഥാപിച്ചു.
പാലത്തോട് ചേര്ന്നുള്ള നടപ്പാത അപകടാവസ്ഥയിലായതോടെ പിഡബ്ല്യൂഡിയാണ് നടപ്പാതയുടെ രണ്ടു ഭാഗത്തുനിന്നുമുള്ള കാല്നടയാത്ര നിരോധിച്ചു ബോര്ഡ് സ്ഥാപിച്ചത്.
വലിയപാലത്തിന്റെ കിഴക്കുവശത്തുള്ള നടപ്പാതയാണ് തകര്ന്നത്. നടപ്പാതയുടെ ഇരുമ്പ് കേഡറുകള് പൂര്ണമായും തുരുമ്പെടുത്ത് ദ്രവിച്ചു ബലക്ഷയം നേരിടുകയാണ്. നടപ്പാത താഴേക്ക് ഇരുന്നിട്ടുമുണ്ട്. നടപ്പാതയുടെ പൈപ്പുകളും കമ്പികളുമെല്ലാം തുരുമ്പെടുത്തു ദ്രവിച്ച അവസ്ഥയിലാണ്. വാഹനത്തിരക്കേറിയ കോട്ടയം-എര്ണാകുളം റോഡില് സ്ഥിതി ചെയ്യുന്ന വലിയപാലത്തോട് ചേര്ന്നുള്ള നടപ്പാത അപകടത്തിലായത് കാല്നടയാത്രക്കാരെയും പ്രതിസന്ധിയിലാക്കി. മുമ്പ് പാലത്തിനടിയിലൂടെയായിരുന്നു കാല്നടയാത്രക്കാര് അക്കരെയിക്കരെ കടന്നിരുന്നത്. പിന്നീട് മോന്സ് ജോസഫ് എംഎല്എ ആയിരിക്കുമ്പോളാണ് ഫണ്ട് ലഭ്യമാക്കി പാലത്തിന്റെ ഇരുവശങ്ങളിലും സൗകര്യങ്ങളോടെ നടപ്പാത ക്രമീകരിച്ചത്.
യഥാകാലം അറ്റകുറ്റപണികള് നടത്താന് അധികൃതര് തയാറാകാതിരുന്നതാണ് നടപ്പാതയുടെ തകര്ച്ചയ്ക്കു വഴി വച്ചതെന്നാണ് ആരോപണമുയരുന്നത്. ഒരുവശത്തെ നടപ്പാതയിലൂടെയുള്ള കാല്നടയാത്ര നിരോധിച്ചതോടെ ആളുകള് പാലത്തിലൂടെ അക്കരെ കടക്കാന് ശ്രമിക്കുന്നത് അപകട ഭീഷിണി ഉയര്ത്തുന്നു. പൊതുമരാമത്ത് വകുപ്പിന്റെ ബ്രിഡ്ജസ് വിഭാഗത്തിനാണ് പാലത്തോടു ചേര്ന്നുള്ള നടപാതയുടെ അറ്റകുറ്റപ്പണികള് നടത്തേണ്ട ഉത്തരവാദിത്വമുള്ളത്.
പ്രതികരണങ്ങള്
എപ്പോഴും തിരക്കുള്ള കടുത്തുരുത്തി ടൗണിലെ വലിയപാലത്തോട് ചേര്ന്നുള്ള നടപ്പാത എത്രയും വേഗം ശരിയാക്കണം. ഇതു സമയാസമയങ്ങളില് അറ്റകുറ്റപ്പണികള് നടത്താന് അധികാരികള് ശ്രമിക്കാതിരുന്നതാണ് ഇപ്പോഴത്തെ ദുരവസ്ഥയിലെത്തിച്ചതെന്നും പറയുന്നു.
ആളുകളുടെ സുരക്ഷയെ കരുതി പാലത്തിലെ നടപ്പാതയുടെ തകരാര് പരിഹരിച്ച് അടിയന്തര പ്രാധാന്യത്തോടെ തുറന്ന് കൊടുക്കണം. ആളുകള് പാലത്തിലൂടെ നടക്കുന്നത് അപകടം ക്ഷണിച്ചുവരുത്തുമെന്നും പഞ്ചായത്തംഗം ജിന്സി എലിസബത്ത് പറഞ്ഞു.
പുതുക്കി നിര്മിക്കുമ്പോള് വലിയ ഭാരമില്ലാത്ത നൂതന സംവിധാനങ്ങള് ഉപയോഗപ്പെടുത്തിയുള്ള നടപ്പാത വേണം നിര്മക്കുവാൻ. നടപ്പാത അടഞ്ഞു കിടക്കുന്നത് ആളുകള്ക്ക് വലിയ ബുന്ധിമുട്ടുണ്ടാക്കും. മറുവശത്തെ നടപ്പാതയുടെ അവസ്ഥയും പരിശോധിക്കേണ്ടതുണ്ടന്ന് പഞ്ചായത്തംഗം
എം.ആർ. അനില്കുമാര് പറഞ്ഞു.
