ചെന്നൈ: ജയിലില് മിന്നല് പരിശോധനയുമായി തമിഴ്നാട് മുഖ്യമന്ത്രി വിജയ്.
ഇന്ത്യയിലെ ഏറ്റവും വലിയ ജയില് സമുച്ചയങ്ങളിലൊന്നായ പുഴല് സെൻട്രല് ജയിലില് വെള്ളിയാഴ്ചയായിരുന്നു മുഖ്യമന്ത്രിയുടെ സന്ദർശനം. ജയിലിലെ തടവുകാരുമായും അദ്ദേഹം സംസാരിച്ചു.
എഡിജിപി ഡോ. സന്ദീപ് റായ് റാത്തോഡ്, ചെന്നൈ റെയ്ഞ്ച് ഡിഐജി ടി. പളനി, സൂപ്രണ്ട് കൃഷ്ണരാജ് തുടങ്ങിയ മുതിർന്ന പൊലീസ്, ജയില് ഉദ്യോഗസ്ഥരും മുഖ്യമന്ത്രിക്കൊപ്പമുണ്ടായിരുന്നു.
തടവുകാർക്കുള്ള അടിസ്ഥാന സൗകര്യങ്ങള്, ജയിലിലെ ഭക്ഷണത്തിന്റെ നിലവാരം, മെഡിക്കല് സെന്റർ തുടങ്ങിയവയെല്ലാം മുഖ്യമന്ത്രി പരിശോധിച്ചു. ജയിലിലെ സൗകര്യങ്ങളെക്കുറിച്ചും തടവുകാരില്നിന്ന് അഭിപ്രായം തേടി. തടവുകാരുടെ ആവശ്യങ്ങളും ചോദിച്ചറിഞ്ഞു.
ജയിലിലെ ക്ലാസ്മുറികള്, ലെെബ്രറി, കമ്പ്യൂട്ടർ പരിശീലന കേന്ദ്രം, ഐസോലേഷൻ വാർഡ്, സന്ദർശകർക്കുള്ള ഹാള്, ലഹരി വിമുക്ത കേന്ദ്രം തുടങ്ങിയവയും മുഖ്യമന്ത്രി സന്ദർശിച്ചു. പുഴല് ജയിലിലെ അതിസുരക്ഷാ ബ്ലോക്കിലും മുഖ്യമന്ത്രിയെത്തി. ജയില് സന്ദർശനത്തിന് ശേഷം ഇതിനോട് ചേർന്നുള്ള പുഴല് പൊലീസ് സ്റ്റേഷനിലും മുഖ്യമന്ത്രി പരിശോധന നടത്തി. സ്റ്റേഷനിലെ രേഖകളെല്ലാം പരിശോധിച്ച മുഖ്യമന്ത്രി, എസ്ഐയുടെ ഓഫീസ് മുറിയും പരിശോധിച്ചു.
സംസ്ഥാനത്തെ സർക്കാർ സ്ഥാപനങ്ങളില് നടത്തുന്ന മിന്നല് സന്ദർശനങ്ങളുടെ ഭാഗമായിട്ടായിരുന്നു വെള്ളിയാഴ്ച മുഖ്യമന്ത്രിയുടെ ജയിലിലെ പരിശോധന. മൂന്നുമാസം മുൻപ് ഒരു സർക്കാർ ആശുപത്രിയിലും ഇതിനുപിന്നാലെ ചെന്നൈയിലെ ദളിത് വിദ്യാർഥികളുടെ ഹോസ്റ്റലിലും വിജയ് സമാനരീതിയില് അപ്രതീക്ഷിത സന്ദർശനം നടത്തിയിരുന്നു.
