ഡൽഹി: ഡൽഹി പൊലീസ് അടച്ചു പൂട്ടിയ ജന്തര്‍മന്തറില്‍ മിന്നല്‍ സമരവുമായി ക്രോക്കോച്ച്‌ ജനതാ പാര്‍ട്ടി.
പൊലീസിന്‍റെ കണ്ണുവെട്ടിച്ച്‌ ദേശീയ പതാകയുമായി ഉള്ളില്‍ കയറിയ നേതാക്കളെ കസ്റ്റഡിയിലെടുത്ത് നീക്കി. കൊണാട്ട് പ്ലേസില്‍ എന്‍എസ്‍യു, എഐഎസ്‌എഫ്, ദിശ ഉള്‍പ്പെടയുള്ള സംഘടനകള്‍ നടത്തിയ മാർച്ച്‌ സംഘർത്തിനിടയാക്കി.
രാഹുല്‍ ഗാന്ധി പേരെടുത്ത് പറയാത്തതില്‍ പരാതിയില്ലെന്നും ഇന്നലെ നടന്ന മാർച്ചില്‍ പങ്കെടുത്തിരുന്നുവെന്നും ക്രോക്കോച്ച്‌ ജനതാ പാര്‍ട്ടി വ്യക്തമാക്കി.
പൊലീസിന്‍റെയും അര്‍ധ സൈനിക വിഭാഗങ്ങളുടെയും കണ്ണുവെട്ടിച്ച്‌ മിന്നല്‍ പ്രതിഷേധമാണ് ഇന്ന് ഉച്ചയോടെ ജന്തര്‍മന്തറില്‍ ഉണ്ടായത്. പാര്‍ലമെന്‍റ് സ്ട്രീറ്റിന് സമീപമുള്ള ഇടവഴിയിലൂടെ നടന്ന് സമീപമുള്ള മതില്‍ ചാടി കടന്ന് പ്രവര്‍ത്തകര്‍ ഉള്ളില്‍ കടക്കുകയായിരുന്നു.
ദേശീയ പതാക വീശി മുദ്രാവാക്യം വിളിച്ചയുടന്‍ പൊലീസെത്തി പ്രതിഷേധക്കാരെ കസ്റ്റഡിയിലെടുത്ത് നീക്കി. നിരോധനാജ്ഞ ലംഘിച്ചും ജാമ്യ വ്യവസ്ഥ ലംഘിച്ചുമായിരുന്നു സിജെപി നേതാക്കളായ അശുതോഷ് റാങ്ക, സൗരവ് ദാസ്, അഹിങ്ക്യ ഷിന്‍ഡേ എന്നിവരുടെ നീക്കം.
സമാധാനാന്തരീക്ഷത്തിന് വെല്ലുവിളിയാകുന്ന ഒരു നടപടിയും പാടില്ലെന്നായിരുന്നു ജാമ്യ വ്യവസ്ഥ. ജന്തര്‍മന്തര്‍ തിരിച്ചെടുത്തെന്നും ആര്‍ക്കും ഇങ്ങനെ ഇവിടേക്ക് കടക്കാമെന്നും സൗരവ് ദാസ് എക്സില്‍ കുറിച്ചു.
പ്രതിഷേധത്തിന് പിന്നാലെ സിപിഎം ആസ്ഥാനമായ എച്ച്‌കെഎസ് ഭവനില്‍ മാധ്യമങ്ങളെ കണ്ട് സിജെപി പോളിസി വിഭാഗം പ്രതിനിധി മെഹർ പശ്രീച ജന്തർമന്ദർ സമരവേദിയായി തുടരണമെന്ന ആവശ്യത്തില്‍ നിന്നും പിന്നോട്ടില്ലെന്ന് വ്യക്തമാക്കി.
