ചെന്നൈ: ഇന്ത്യൻ സിനിമയിലെ ഏറ്റവും വലിയ സൂപ്പർതാരങ്ങളില്‍ ഒരാളാണ് രജനീകാന്ത്. ഒരുപക്ഷേ ലോക സിനിമയില്‍ തന്നെ ഇത്രയധികം കൊണ്ടാടപ്പെട്ട താരം മറ്റൊരാള്‍ ഉണ്ടോ എന്ന കാര്യം സംശയമാണ്.
പ്രായം 75 കഴിഞ്ഞെങ്കിലും രജനീകാന്ത് എന്ന താരത്തിന്റെ സ്വാഗും സ്‌റ്റൈലും ഒന്നും അദ്ദേഹത്തിനെ ഇതുവരെ വിട്ടുപോയിട്ടില്ല. അതിന്റെ ഏറ്റവും വലിയ ഉദാഹരണമാണ് ഏറ്റവും ഒടുവില്‍ ഇറങ്ങിയ ചിത്രമായ ജയിലർ 2 കാണിക്കുന്നത്.
'
അൻപത് വർഷമായി സിനിമയില്‍ ഒരേ പോലെ നിലനില്‍ക്കുന്ന രജനീകാന്തിന്റെ അഴിഞ്ഞാട്ടം തന്നെയായിരുന്നു ജയിലർ 2വില്‍ കാണാൻ കഴിഞ്ഞത്. രജനിക്ക് പുറമേ മറ്റ് നാല് ഭാഷകളിലെ സൂപ്പർതാരങ്ങള്‍ ക്യാമിയോ വേഷങ്ങള്‍ ചെയ്‌ത ചിത്രത്തിൽ പക്ഷേ മാർക്കറ്റ് ചെയ്യാൻ രജനീകാന്ത് എന്ന പേര് തന്നെ ധാരാളമായിരുന്നു. പറഞ്ഞുവന്നത് സമീപകാല ചിത്രങ്ങളില്‍ ജയിലർ 2 കാഴ്‌ചവച്ച ഞെട്ടിക്കുന്ന പ്രകടനത്തെ കുറിച്ചാണ്.
കളക്ഷൻ റെക്കോർഡുകള്‍ ഭേദിച്ചുകൊണ്ടാണ് രജനീകാന്ത് ചിത്രം മുന്നേറുന്നത്. ആദ്യ ദിനം തന്നെ നൂറു കോടിക്ക് മുകളിലാണ് ആഗോള ബോക്‌സ് ഓഫീസില്‍ നിന്ന് ചിത്രം സ്വന്തമാക്കിയത്. തമിഴ് സിനിമയില്‍ ഈ നേട്ടം സ്വന്തമാക്കുന്നവരില്‍ ഇപ്പോള്‍ രജനി തന്നെയാണ് മുൻപില്‍. വിജയ് ചിത്രങ്ങളും ആഗോള ബോക്‌സ് ഓഫീസില്‍ 100 കോടിക്ക് മുകളില്‍ നേടിയിട്ടുണ്ടെങ്കിലും എണ്ണത്തില്‍ അധികം ഇപ്പോള്‍ രജനീകാന്ത് ചിത്രങ്ങള്‍ തന്നെയാണ്.
ഒക്ടോബർ 15ന് തിയേറ്ററുകളില്‍ എത്തിയ ചിത്രം, വെറും 8 ദിവസങ്ങള്‍ കൊണ്ട് ആഗോള തലത്തില്‍ 616 കോടിയാണ് കളക്ഷൻ നേടിയിരിക്കുന്നത്. ജയിലർ ഒന്നിന്റെ ആജീവനാന്ത കളക്ഷൻ രണ്ടാം ഭാഗം കേവലം ഒരാഴ്‌ച കൊണ്ട് മറികടന്നിരിക്കുകയാണ്. നിലവില്‍ തമിഴ് സിനിമയിലെ കളക്ഷൻ റെക്കോര്ഡുകളില്‍ ഇനി രജനിക്ക് ഭേദിക്കാൻ ഉള്ളത് ലിയോയും അദ്ദേഹത്തിന്റെ തന്നെ 2.0 എന്ന ചിത്രവുമാണ്.
തമിഴ്‌നാട്ടില്‍ നിന്ന് മാത്രം ചിത്രത്തിന് കളക്ഷൻ നൂറ് കോടിക്ക് മുകളിലാണ്. ഇനി ഈ വർഷം ഇറങ്ങിയ ചിത്രങ്ങളില്‍ ജയിലറിന് മുന്നിലുള്ളത് സൂര്യ നായകനായ കറുപ്പ്, വിജയ് നായകനായ ജനനായകൻ എന്നീ ചിത്രങ്ങള്‍ മാത്രമാണ്. ചിത്രം പ്രദർശനം നിർത്തുമ്പോള്‍ ഇരു ചിത്രങ്ങളുടെയും തമിഴ്‌നാട് കളക്ഷൻ ഭേദിക്കുമെന്നാണ് കരുതുന്നത്.
ഇതോടെയാണ് തമിഴ് സിനിമകളുടെ എക്കാലത്തെയും വലിയ സ്വപ്‌നമായ 1000 കോടി എന്ന മാന്ത്രിക നമ്പർ ചിത്രം മറികടക്കുമോ എന്ന ചോദ്യവും ഉയരുന്നത്. നിലവിലെ സ്ഥിതി വച്ച്‌ ചിത്രത്തിന് അത് അസാധ്യമല്ല എന്നാണ് കരുതുന്നത്. പ്രത്യേകിച്ച്‌ ദീപാവലി റിലീസായി സൂര്യ നായകനായ സീൻ, രണ്‍ബീർ-യാഷ് കൂട്ടുകെട്ടിന്റെ രാമായണം എന്നിവ എത്താൻ ഇനിയും രണ്ടാഴ്‌ച്ചയില്‍ അധികം ശേഷിക്കുന്ന സാഹചര്യത്തില്‍.
അതേസമയം, കേരളത്തില്‍ 800 സ്‌ക്രീനുകളിലാണ് ചിത്രം റിലീസ് ചെയ്‌തത്‌. 4000 ഷോകളാണ് ചിത്രം ആദ്യ ദിനം കേരളത്തില്‍ കളിച്ചത്. 12 കോടിയോളം ആണ് ചിത്രം കേരളത്തില്‍ നിന്ന് നേടിയ ആദ്യ ദിന കളക്ഷൻ. സണ്‍ പിക്‌ചേഴ്‌സിന്റെ ബാനറില്‍ കലാനിധി മാരന്‍ നിര്‍മ്മിക്കുന്ന ചിത്രം കേരളത്തില്‍ ഗോകുലം ഗോപാലന്റെ ശ്രീ ഗോകുലം മൂവീസാണ് വിതരണം ചെയ്യുന്നത്. ഇതുവരെ 50 കോടിയില്‍ അധികം കേരളത്തില്‍ നിന്ന് മാത്രം ചിത്രം നേടി. സൂപ്പർതാരം മോഹൻലാല്‍ ഇതിലൊരു ക്യാമിയോ വേഷം ചെയ്‌തത്‌ മലയാളികള്‍ ഏറ്റെടുക്കുകയും ചെയ്‌തിരുന്നു.
