.ജറുസലേം: ഇസ്രായേല്‍ പാർലമെന്റ് തിരഞ്ഞെടുപ്പിന്റെ ഔദ്യോഗിക ഫലം അംഗീകരിച്ച്‌ പ്രസിഡന്റ് ഐസക് ഹെർസോഗ്. ഒക്ടോബർ 27-ന് നടന്ന വോട്ടെടുപ്പില്‍ ക്രമക്കേടുകള്‍ നടന്നിട്ടുണ്ടെന്നും തിരഞ്ഞെടുപ്പ് അട്ടിമറിക്കപ്പെട്ടെന്നുമുള്ള പ്രധാനമന്ത്രി ബെഞ്ചമിൻ നെതന്യാഹുവിന്റെ ആരോപണങ്ങള്‍ തള്ളിക്കളഞ്ഞാണ് പ്രസിഡന്റ് പുതിയ സർക്കാർ രൂപീകരണത്തിനായുള്ള ചർച്ചകള്‍ ആരംഭിച്ചത്.
തിരഞ്ഞെടുപ്പ് പ്രക്രിയ പൂർത്തിയായെന്നും എല്ലാവരും ഇനി യഥാർത്ഥ സാഹചര്യം ഉള്‍ക്കൊള്ളാൻ തയ്യാറാകണമെന്നും ഹെർസോഗ് വ്യക്തമാക്കി.
120 അംഗ നെസറ്റില്‍ ഭൂരിപക്ഷത്തിന് 61 സീറ്റുകള്‍ വേണമെന്നിരിക്കെ, നെതന്യാഹുവിന്റെ മുന്നണിക്ക് 53 സീറ്റുകളും പ്രതിപക്ഷ നേതാവ് ഗാഡി ഐസൻകോട്ടിന്റെ സഖ്യത്തിന് 48 സീറ്റുകളുമാണ് ലഭിച്ചത്. ഇതോടെ 19 സീറ്റുകള്‍ നേടി ചരിത്ര വിജയം കുറിച്ച അറബ് പാർട്ടികളാണ് പുതിയ ഭരണം നിർണ്ണയിക്കുന്നതില്‍ നിർണ്ണായക ശക്തിയായി മാറിയത്. പ്രധാന അറബ് പാർട്ടിയായ ‘റാം’ ഐസൻകോട്ടിനെ പിന്തുണയ്ക്കാൻ തീരുമാനിച്ചതോടെ അദ്ദേഹത്തിന് പിന്തുണ നല്‍കുന്ന എം.പിമാരുടെ എണ്ണം 56 ആയി ഉയർന്നു. 11 സീറ്റുകളുള്ള ജോയിന്റ് ലിസ്റ്റും പിന്തുണച്ചാല്‍ ഐസൻകോട്ടിന് കേവലഭൂരിപക്ഷം കടക്കാനാകും.
മറുവശത്ത് നെതന്യാഹുവിന്റെ മുന്നണിയിലും വിള്ളലുകള്‍ പ്രത്യക്ഷപ്പെട്ടു തുടങ്ങിയിട്ടുണ്ട്. ഹരേദി വിഭാഗക്കാർക്ക് സൈനിക സേവനത്തില്‍ ഇളവ് നല്‍കുന്ന നിയമം പാസാക്കാൻ സാധിക്കാത്തതില്‍ പ്രതിഷേധിച്ച്‌ ഡെഗല്‍ ഹാതോറ പാർട്ടി നെതന്യാഹുവിനെ പിന്തുണയ്ക്കില്ലെന്ന് അറിയിച്ചു. അതേസമയം വോട്ടെടുപ്പില്‍ അട്ടിമറി നടന്നിട്ടുണ്ടെന്ന നെതന്യാഹുവിന്റെ ആരോപണങ്ങള്‍ സെൻട്രല്‍ ഇലക്ഷൻ കമ്മീഷനും അറ്റോർണി ജനറലും പൂർണ്ണമായി തള്ളി. വിവിധ പാർട്ടികളുമായുള്ള ചർച്ചകള്‍ പൂർത്തിയാക്കിയ ശേഷം സർക്കാർ രൂപീകരിക്കാൻ കൂടുതല്‍ സാധ്യതയുള്ള നേതാവിനെ പ്രസിഡന്റ് ക്ഷണിക്കും. നിയോഗിക്കപ്പെടുന്ന നേതാവിന് ഭൂരിപക്ഷം തെളിയിക്കാൻ 28 ദിവസത്തെ സമയം ലഭിക്കും. ഭൂരിപക്ഷം തെളിയിക്കാൻ സാധിച്ചില്ലെങ്കില്‍ അടുത്ത വർഷം ആദ്യത്തോടെ ഇസ്രായേല്‍ വീണ്ടുമൊരു തിരഞ്ഞെടുപ്പിനെ നേരിടേണ്ടി വരും.
