കോട്ടയം: കോടികള്‍ മുടക്കി നിര്‍മിച്ച അയ്‌മനം ഇന്‍ഡോര്‍ സ്‌റ്റേഡിയം കാടുകയറി നശിക്കുന്നു. ഇരവീശ്വരം പാടശേഖരത്തിന്‌ സമീപം 5.16 കോടി രൂപ ചെലവില്‍ നിര്‍മിച്ച ഇന്‍ഡോര്‍ സേ്‌റ്റഡിയമാണ്‌ ആര്‍ക്കും ഉപകാരമില്ലാതെ നശിക്കുന്നത്‌.
കെട്ടിടത്തില്‍ വിള്ളലുകളും തറയില്‍ വിള്ളലും ഉയര്‍ച്ചയും താഴ്‌ചയും ഉള്‍പ്പെടെ നിരവധി പ്രശ്‌നങ്ങള്‍ ഉണ്ടായിട്ടും സേ്‌റ്റഡിയം സംരക്ഷിക്കാന്‍ നടപടികളില്ല. കെട്ടിടത്തിന്റെ നിര്‍മാണവുമായി ബന്ധപ്പെട്ട്‌ വിജിലന്‍സ്‌ അന്വേഷണമുണ്ടായിരുന്നുവെങ്കിലും തുടര്‍ നടപടികള്‍ ഒന്നുമുണ്ടായില്ല.
കിഫ്‌ബി ഫണ്ട്‌ ഉപയോഗിച്ച്‌ സ്‌പോര്‍ട്‌സ് എന്‍ജിനീയറിങ്ങ്‌ വിഭാഗമാണു സ്‌റ്റേഡിയം നിര്‍മിച്ചത്‌. നിര്‍മാണത്തിന്റെ കണ്‍സള്‍ട്ടന്‍സി ചുമതല കിറ്റ്‌കോയ്‌ക്കായിരുന്നു. അടിത്തറ ഉയര്‍ന്നത്‌ മുതല്‍ സ്‌റ്റേഡിയത്തിന്റെ പണി പൂര്‍ത്തിയാകുന്നതും തുറന്നുകൊടുക്കുന്നതും കാത്തിരുന്ന നാട്ടുകാരെ ഞെട്ടിച്ചാണ്‌ നിര്‍മാണം പൂര്‍ത്തിയാകുന്നതിന്‌ മുമ്പേ 2021 ഫെബ്രുവരിയില്‍ ഉദ്‌ഘാടനം നടത്തിയത്‌. ഉദ്‌ഘാടനം കഴിഞ്ഞ്‌ നാല്‌ മാസത്തിനുള്ളില്‍ തന്നെ കെട്ടിടത്തിന്റെ ഭിത്തികളില്‍ പലയിടത്തും വിള്ളലുകള്‍ പ്രത്യക്ഷപ്പെട്ടു.
സ്‌റ്റേഡിയത്തിന്റെ മൂന്നു പ്രവേശനകവാടങ്ങളും പൊട്ടിക്കീറി പ്രധാന ഭിത്തിയില്‍ നിന്ന്‌ അകന്ന നിലയിലാണ്‌. ഇവ തകര്‍ന്നു വീഴാതിരിക്കാന്‍ ഇരുമ്പുതൂണുകള്‍ ഉപയോഗിച്ചു താങ്ങിനിറുത്തിയെങ്കിലും തൂണുകളില്‍ പലതും ഇപ്പോള്‍ തുരുമ്പെടുത്തു. ഇരുമ്പുതൂണുകളെ ചുറ്റി കാട്ടുവള്ളികളും പടര്‍ന്നുകയറി.
സ്‌റ്റേഡിയത്തിന്റെ തറയിലും തകര്‍ച്ചയുണ്ട്‌. 80 സെന്റിമീറ്റര്‍ ഉയരമുള്ള തിണ്ണയിലേക്കു ചാടിക്കയറേണ്ട സ്‌ഥിതിയാണ്‌. തിണ്ണയ്‌ക്കും കെട്ടിടത്തിനുമിടയില്‍ 15 സെന്റിമീറ്റര്‍ വീതിയില്‍ വിടവും രൂപപ്പെട്ടിട്ടുണ്ട്‌. സ്‌റ്റേഡിയത്തിന്റെ മുറ്റത്തു വലിയ മണ്‍കൂനകള്‍ കൂട്ടിയിട്ടിരിക്കുകയാണ്‌. ഒരാള്‍പ്പൊക്കത്തില്‍ കുറ്റിച്ചെടികള്‍ വളര്‍ന്നുപൊങ്ങിയതോടെ കെട്ടിടവും പരിസരവും കാടുമൂടി.
ജനല്‍പ്പാളികളിലെ ചില്ലുകള്‍ പലതും പൊട്ടിത്തകര്‍ന്നു. അഗ്നിരക്ഷാ ഉപകരണങ്ങള്‍ ചിതറിക്കിടക്കുകയാണ്‌. ഭിത്തികളില്‍ പലയിടത്തും കരിഓയിലിന്റെ പാടുകളുമുണ്ട്‌.
ഉപയോഗിക്കാതെ കിടക്കുന്നതിനാല്‍ സ്‌റ്റേഡിയം രാത്രിയില്‍ സാമൂഹികവിരുദ്ധരുടെ താവളമായി. പരിസരത്ത്‌ വിഷപ്പാമ്പുകളുടെ ശല്യവും. കാടുപിടിച്ചുകിടക്കുന്ന പ്രദേശം നാട്ടുകാര്‍ക്കും സമീപവാസികള്‍ക്കും ഭീഷണിയാകുന്നു. ജൂണില്‍ നാട്ടകം സുരേഷ്‌ എം.എല്‍.എ. സ്‌റ്റേഡിയം സന്ദര്‍ശിച്ചിരുന്നു. കെട്ടിടത്തിന്റെ നിലവാരവും തകര്‍ച്ചയും സംബന്ധിച്ചു സമഗ്രമായ അന്വേഷണം നടത്തുന്നതിനുള്ള നടപടികള്‍ സ്വീകരിക്കുമെന്ന്‌ എം.എല്‍.എ. അറിയിച്ചിരുന്നു.
