കോട്ടയം: അഴിച്ചുപണിയും നിര്‍ദേശങ്ങളും മാത്രമല്ല, നേതാക്കളുടെ താഴേത്തട്ടിലുള്ള പ്രവര്‍ത്തനവും നിരീക്ഷണത്തിലാക്കാന്‍ സി.പി.എം.
വിപുലീകൃത ജില്ലാ കമ്മിറ്റിയില്‍ തീരുമാനം. പാര്‍ട്ടിയ്‌ക്കാകെ നാണക്കേടുണ്ടാക്കിയ സഹകരണ മേഖലയിലെ നേതാക്കളുടെ ഇടപെടലില്‍ ഉള്‍പ്പെടെയാണു നിരീക്ഷണം ശക്‌തമാക്കുന്നത്‌.
പതിവില്‍ നിന്നു വ്യത്യസ്‌തമായി സഹകരണ മേഖലയില്‍ ചില നേതാക്കള്‍ക്കു ജാഗ്രതക്കുറവുണ്ടായെന്ന കാര്യം ജില്ലാ നേതൃത്വം പരസ്യമായി പറയുകയും ചെയ്‌തിരുന്നു. കോട്ടയം, അയര്‍ക്കുന്നം,കടുത്തുരുത്തി, പാലാ എന്നിവിടങ്ങളില്‍ നിന്നുള്ള നേതാക്കളാണു സഹകരണ ബാങ്കുകളില്‍ നിന്നു പണം വായ്‌പയെടുത്തു കുടിശികയുള്ളവരില്‍ ഏറെയും. ചെറിയ തുക മുതല്‍ വന്‍ തുക വരെ വായ്‌പയെടുത്തവരുണ്ട്‌.
30നുള്ളില്‍ കുടിശിക അടച്ചില്ലെങ്കില്‍ കര്‍ശന നടപടിയെന്ന തീരുമാനത്തില്‍ ഉറച്ചു നില്‍ക്കുകയാണ്‌ ജില്ലാ, സംസ്‌ഥാന നേതൃത്വം. സാമ്പത്തിക കാര്യങ്ങളില്‍ നേതാക്കള്‍ കൂടുതല്‍ ജാഗ്രത പുലര്‍ത്തണമെന്നും നിര്‍ദേശമുണ്ട്‌.
ജില്ലയില്‍ പാര്‍ട്ടി സാധാരണക്കാരില്‍ നിന്ന്‌ അകന്നുവെന്നതിനാലാണു ജാതിമത ഭേദമെന്യേ ആഘോഷങ്ങളില്‍ നേതൃ പദവിയോടെ സംഘാടകരാകാന്‍ നിര്‍ദേശം നല്‍കിയിരിക്കുന്നത്‌. ഇക്കാര്യത്തില്‍ ജില്ലാ കമ്മിറ്റി അംഗങ്ങള്‍ പ്രത്യേക താത്‌പര്യം എടുക്കണം. ഇവര്‍ രക്ഷാധികാരികളായി ആഘോഷ കമ്മിറ്റികളുണ്ടാകുന്നതില്‍ തെറ്റില്ലെന്നും നിര്‍ദേശമുണ്ട്‌.
സമ്മേളനം ഉള്‍പ്പെടെ നടത്തുമ്പോള്‍ വിവാദ സ്‌ഥലങ്ങള്‍ ഒഴിവാക്കാനും തീരുമാനമുണ്ട്‌. ബസ്‌ സ്‌റ്റാന്റ്‌ ഉള്‍പ്പെടെയുള്ള പൊതു സ്‌ഥലങ്ങള്‍ പരമാവധി ഒഴിവാക്കി സൗകര്യ പ്രദമായ മറ്റു സ്‌ഥലങ്ങളില്‍ പരിപാടികള്‍ നടത്തി വിവാദങ്ങള്‍ ഒഴിവാക്കണം. വിപുലീകൃത ജില്ലാ കമ്മിറ്റിയോട്‌ അനുബന്ധിച്ചുള്ള പൊതുസമ്മേളനത്തിന്റെ കൊട്ടാരമറ്റത്തെ വേദി മാറ്റിയിട്ടും പരസ്യ പ്രതിഷേധത്തിനു മുതിരാതിരുന്നതും ഇതിനാലാണ്‌. പ്രവര്‍ത്തകരെ വെറുപ്പിക്കുന്ന നേതാക്കളുടെ പ്രസംഗത്തിലും നിയന്ത്രണമുണ്ടാകും. ആവശ്യമുള്ള കാര്യങ്ങള്‍ ആവശ്യമുള്ള നേതാക്കള്‍ മാത്രം പറയുക എന്ന രീതിയിലേക്കു പോകണം.
അതേസമയം, സംഘടനയെ കളിപ്പാവയാക്കി ചില നേതാക്കള്‍ പ്രവര്‍ത്തിക്കുന്നുണ്ടോയെന്ന സംശയം പ്രതിനിധികള്‍ സമ്മേളനത്തില്‍ ഉന്നയിച്ചിരുന്നു. വര്‍ഗ ബഹുജന സംഘടനകളെ കൈപ്പിടിയിലൊതുക്കി ഇഷ്‌ടക്കാര്‍ക്കു സ്‌ഥാനങ്ങള്‍ നല്‍കി ഒരു നേതാവ്‌ ചില താത്‌പര്യങ്ങളോടെ പ്രവര്‍ത്തിക്കുന്നുവെന്ന പരാതിയും ഉയര്‍ന്നിരുന്നു.
