ഡൽഹി: ഇന്‍ഡിഗോ വിമാന സർവ്വീസുകളുടെ യാത്രാ നിരക്ക് കൂട്ടി.
ആഭ്യന്തര, രാജ്യാന്തര സര്‍വീസുകളിലെ ഇന്ധന ചാര്‍ജാണ് കൂട്ടിയത്. നാളെ മുതല്‍ നിരക്ക് വ‍ർധനവ് പ്രാബല്യത്തില്‍ വരും.
ആഭ്യന്തര യാത്രകള്‍ക്ക് 375 മുതല്‍ 1300 വരെ നിരക്കുയരും. രാജ്യാന്തര യാത്രകള്‍ക്ക് 1000 മുതല്‍ 10,000 രൂപ വരെയാണ് വർധനവുണ്ടാകുക.
അതേസമയം, വിമാന ഇന്ധന വില ഉയർന്നതാണ് നിരക്ക് വർധനയ്ക്ക് കാരണമെന്ന് ഇൻഡിഗോ അറിയിച്ചു. ഉത്സവ സീസണ്‍ അടുത്തിരിക്കെ കമ്പനി നടപ്പിലാക്കുന്ന ഈ തീരുമാനം സാധാരണക്കാരായ യാത്രികർക്ക് വലിയ തിരിച്ചടിയാകും.
ആഭ്യന്തര സർവീസുകളില്‍ ദൂരത്തിനനുസരിച്ചാണ് നിരക്കുകള്‍ നിശ്ചയിച്ചിരിക്കുന്നത്. 500 കിലോമീറ്ററില്‍ താഴെയുള്ള യാത്രകള്‍ക്ക് 425 രൂപയും, 501 മുതല്‍ 1,000 കിലോമീറ്റർ വരെയുള്ള സർവീസുകള്‍ക്ക് 600 രൂപയും നല്‍കണം.
1,001 മുതല്‍ 1,500 കിലോമീറ്റർ വരെയുള്ള ദൂരത്തിന് 900 രൂപയും, 1,501 മുതല്‍ 2,000 കിലോമീറ്റർ വരെ 1,150 രൂപയുമാണ് അധികമായി നല്‍കേണ്ടത്. 2,000 കിലോമീറ്ററിന് മുകളിലുള്ള ദീർഘദൂര ആഭ്യന്തര യാത്രകള്‍ക്ക് 1,300 രൂപ ഫ്യൂവല്‍ സർചാർജ് ഇനത്തില്‍ നല്‍കേണ്ടി വരും.
