ഒട്ടാവ: കാനഡയിലെ എഡ്മന്റണില് ഇന്ത്യൻ വംശജയെ കൊല്ലപ്പെട്ട നിലയില് കണ്ടെത്തി. പഞ്ചാബ് സ്വദേശിനി ദമൻപ്രീത് കൗർ (23) ആണ് കൊല്ലപ്പെട്ടത്. സംഭവത്തില് ഇവരുടെ പങ്കാളിയായ റിതേഷ് കുമാറി (22)നെ പോലീസ് അറസ്റ്റ് ചെയ്തു.
ജൂലൈ ഒൻപതിന് വൈകുന്നേരം എഡ്മന്റണിലെ സില്വർബെറിയിലുള്ള വസതിയില് ഗുരുതര പരിക്കുകളോടെ അബോധാവസ്ഥയില് ദമൻപ്രീതിനെ കണ്ടെത്തുകയായിരുന്നു.
ഉടൻ തന്നെ ആശുപത്രിയില് എത്തിച്ചെങ്കിലും മൂന്ന് ദിവസത്തോളം നീണ്ട തീവ്രപരിചരണത്തിനൊടുവില് ജൂലൈ 12-ന് മരണത്തിന് കീഴടങ്ങുകയായിരുന്നു.
പിന്നീട് നടന്ന പോസ്റ്റ്മോർട്ടം പരിശോധനയിലാണ് മരണം കൊലപാതകമാണെന്ന് സ്ഥിരീകരിച്ചത്. ഇതേ തുടർന്ന് പോലീസ് നടത്തിയ അന്വേഷണത്തിലാണ് റിതേഷ് ദമൻപ്രീതിനെ കഴുത്തുഞെരിച്ചു കൊലപ്പെടുത്തിയതാണെന്ന് കണ്ടെത്തിയത്.
സംഭവത്തില് പ്രതിയായ റിതേഷ് കുമാറിനെ പോലീസ് അറസ്റ്റ് ചെയ്തത്. കേസില് മറ്റാരും പ്രതികളായി ഇല്ലെന്നും പോലീസ് അറിയിച്ചു.
