ഹൈദരാബാദ്: ഫിന്ലന്ഡില് നിന്നും രണ്ട് മാസം മുന്പ് കാണാതായ ഹൈദരാബാദ് സ്വദേശിയായ വിദ്യാര്ത്ഥിയുടെ മൃതദേഹം കണ്ടെത്തി.
ഫിന്ലന്ഡില് പഠിക്കാന് പോയ മനിദീപ് റെഡ്ഡിയാണ് (18) ദുരൂഹ സാഹചര്യത്തില് മരിച്ചത്. മേയ് 5 നാണ് മനിദീപിനെ കാണാതാവുന്നത്. അന്വേഷണത്തില് ഹെല്സിങ്കിയിലെ ഒരു ഷോപ്പിങ് മാളില് വച്ചാണ് വിദ്യാര്ഥിയെ അവസാനമായി കണ്ടത്. പിന്നീട് മനിദീപിനെ കണ്ടിട്ടില്ലെന്ന് സുഹൃത്തുക്കളും മൊഴി നല്കി.
മനിദീപിന്റെ മൃതദേഹം ഹെല്സിങ്കിയിലെ കടലില്നിന്നും കണ്ടെത്തിയതായി വെള്ളിയാഴ്ചയാണ് ഇന്ത്യന് എംബസി കുടുംബത്തെ അറിയിച്ചത്. മനിദീപിന്റെ മരണത്തില് കുടുംബം ദുരൂഹത ആരോപിച്ചു. മനിദീപിന്റേത് സ്വാഭാവിക മരണമല്ലെന്നും ഒട്ടേറെ സംശയങ്ങള് ഉണ്ടെന്നും കുടുംബം പറഞ്ഞു.
ഫിന്ലന്ഡിലെ ഭരണകൂടം നിര്ണായക വിവരങ്ങള് തങ്ങളില്നിന്നും മറച്ചുവയ്ക്കുന്നതായും കുടുംബം ആരോപിച്ചു. മൃതദേഹം തിരിച്ചറിയുന്നതിനും മരണവുമായി ബന്ധപ്പെട്ട കൂടുതല് വിവരങ്ങള് തേടുന്നതിനും വേണ്ടി ഫിന്ലന്ഡിലേക്കുള്ള യാത്രാ സൗകര്യം ഒരുക്കണമെന്ന് കുടുംബത്തിനുവേണ്ടി അഭിഭാഷകന് കേന്ദ്ര സര്ക്കാരിനോട് ആവശ്യപ്പെട്ടു.
മനിദീപിനെ കാണാതായതിനു ശേഷം വളരെ കുറച്ച് വിവരങ്ങള് മാത്രമാണ് അവിടത്തെ സര്ക്കാര് കുടുംബത്തിനു കൈമാറിയത്. എന്നാല് മേയ് 29നു ശേഷം വിവരങ്ങളൊന്നും കൈമാറിയിട്ടില്ലെന്നും കുടുംബം ആരോപിക്കുന്നു.
