ചിന്നക്കനാല്‍ : ഇടുക്കിയിലെ ചിന്നക്കനാല്‍ മേഖലയില്‍ ഭീതി പരത്തുന്ന ചക്കക്കൊമ്പൻ ഉള്‍പ്പെടെ രണ്ട് കാട്ടാനാകളെ മയക്കു വെടിവച്ച്‌ പിടിച്ചു മാറ്റുന്ന ദൗത്യം ഇനിയും നീളും.
ഹൈക്കോടതി നി‍ർദ്ദേശം അനുസരിച്ചായിരിക്കും നടപടികളെന്ന് വനംമന്ത്രി ഷിബു ബേബി ജോണ്‍ വ്യക്തമാക്കിയതോടെയാണിത്...ഇടുക്കിയിലെ ചിന്നക്കനാല്‍, ശാന്തൻപാറ എന്നീ പഞ്ചായത്തുകളില്‍ നിരവധി ആക്രമണങ്ങള്‍ നടത്തിയ ചക്കക്കൊമ്പനെയും മുറിവാലൻ പിടിയാനയെയും പിടിച്ച്‌ മാറ്റാനാണ് വനംവകുപ്പ് നടപടികള്‍ തുടങ്ങിയത്.
ചക്കക്കൊമ്പൻ നാലു പേരുടെയും മുറിവാലിപ്പിടി മൂന്നു പേരുടെയും ജീവനെടുത്തിട്ടുണ്ടെന്നാണ് വനംവകുപ്പിൻറെ കണക്ക്. ദേവികുളം റേഞ്ച് ഓഫീസർ ആനകളെ നിരീക്ഷിക്കിനായി നാല് വാച്ചർമാരെ നിയോഗിച്ചിട്ടുണ്ട്. ഇതില്‍ രണ്ടു പേർ ചക്കക്കൊമ്പനെയും രണ്ടു പേർ മുറിവാലിപ്പിടി ഉള്‍പ്പെടുന്ന എട്ട് കാട്ടാനകളുള്ള കൂട്ടത്തെയും നിരീക്ഷിച്ച്‌ സഞ്ചാരപഥം രേഖപ്പെടുത്തും. നിലവില്‍ ചക്കക്കൊമ്പൻ മതികെട്ടാനിലും മുറിവാലിപ്പിടി 301 കോളനി ഭാഗത്തുമാണുള്ളത്. ചക്കക്കൊമ്പന് മദപ്പാടും തുടങ്ങിയിട്ടുണ്ട്. കാട്ടാന ആക്രമണത്തിൻറെ കാരണങ്ങളും പരിഹാര മാർഗ്ഗങ്ങളും നിർദ്ദേശിക്കാൻ നാലംഗ വിദഗ്ദ്ധസംഘത്തെ ജില്ല ഭരണകൂടം നിയോഗിച്ചിട്ടുണ്ട്. ഏഷ്യൻ എലിഫൻറ് സെപ്ഷ്യലിസ്റ്റ് ഗ്രൂപ്പ് അംഗം പി എസ് ഈസ, കെ എഫ് ആർ ഐ യിലെ ശാസ്ത്രജ്ഞൻ രാജൻ പിലാക്കണ്ടി, പാല സെൻറ് തോമസ് കോളജ് ബോട്ടണി വിഭാഗം മുൻ മേധാവി ജോമി അഗസ്റ്റിൻ, ചിന്നക്കനാലില്‍ നിന്നുള്ള ആദിവാസി പ്രതിനിധി മുരുകേശൻ എന്നിവരടങ്ങിയ സംഘം അടുത്തയാഴ്ച സ്ഥലത്തെത്തും. ഇവരുടെ റിപ്പോർട്ട് കൂടി പരിഗണിച്ചായിരിക്കും തുടർ നടപടികള്‍.
വിദഗ്ദ്ധ സംഘത്തിൻറെ റിപ്പോർട്ട് കിട്ടിയ ശേഷം മയക്കുവെടി വയ്ക്കേണ്ട ആവശ്യകതയും പദ്ധതിയുമടക്കമുള്ള റിപ്പോർട്ട് ഹൈറേഞ്ച് സർക്കി‌ള്‍ സിസിഎഫ് ചീഫ് വൈല്‍ഡ് ലൈഫ് വാർഡനു സമർപ്പിക്കും. ഇതില്‍ ചീഫ് വൈല്‍ഡ് ലൈഫ് വാർഡൻറെ അനുമതി ലഭിച്ചാല്‍ മാത്രമേ മയക്കു വെടി വെക്കാനാകൂ. കോടതി അനുവദിച്ചാല്‍ വയനാട്ടില്‍ നിന്നും കുങ്കിയാനകളെയും എത്തിക്കും.
