കോട്ടയം: ഇടുക്കി പീരുമേട്ടിലെ ബഥേൽ പ്ലാൻ്റേഷൻ ക്രമരഹിതമായ പ്രവർത്തനങ്ങൾ നടത്തുന്നതായി ആരോപിച്ച് മുഖ്യമന്ത്രിയ്ക്കും ആഭ്യന്തരമന്ത്രിയ്ക്കും പരാതി നൽകി കോട്ടയം മണർകാട് സ്വദേശി.
ഇടുക്കി ജില്ലയിലെ പീരുമേടിലുള്ള ബഥേൽ പ്ലാന്റേഷൻസ്ഇപ്പോൾ ഗോൾഡ് വ്യൂ വ്യാപാർ എന്ന സ്ഥാപനത്തിൻ്റെ പ്രവർത്തനങ്ങൾ സംബന്ധിച്ചാണ് മുഖ്യമന്ത്രിയ്ക്കും ആഭ്യന്തരമന്ത്രിയ്ക്കും റവന്യുമന്ത്രിയ്ക്കും സംസ്ഥാന പൊലീസ് മേധാവിയ്ക്കും ഇടുക്കി ജില്ലാ കളക്ടർക്കും കോട്ടയം മണർകാട് സ്വദേശി പരാതി നൽകിയിരിക്കുന്നത്.
വിവിധ വിഷയങ്ങളിൽ റവന്യു , രജിസ്ട്രേഷൻ വകുപ്പ് മേധാവിമാർക്കും, എഡി.ജി.പിയ്ക്കും പ്രത്യേക പരാതികളും നൽകിയിട്ടുണ്ട്.
മണർകാട് സ്വദേശി കെ. വി. സുരേഷാണ് ഗുരുതരമായ ആരോപണങ്ങൾ അടങ്ങിയ പരാതികൾ നൽകിയിരിക്കുന്നത്.
ഏകദേശം 2,800 ഏക്കർ തേയില തോട്ടഭൂമിയാണ് എസ്റ്റേറ്റിലുള്ളതെന്നും, ഏലപ്പാറ വില്ലേജിലെ തണ്ടപ്പേർ നമ്പർ 2240, പീരുമേട് വില്ലേജിലെ തണ്ടപ്പേർ നമ്പർ 3386 എന്നിവയുമായി ബന്ധപ്പെട്ട ഭൂമിയാണിതെന്നും പരാതിയിൽ പറയുന്നു.
സ്ഥാപനത്തിന്റെ മാനേജിങ് ഡയറക്ടർ പത്തനംതിട്ട സ്വദേശി തോമസ് മാത്യുവിനെതിരെയാണ് പ്രധാന ആരോപണങ്ങൾ.
ഈ ആരോപണങ്ങളിൽ വിശദമായി അന്വേഷണം നടത്തണമെന്നും, ഗുരുതരമായ ക്രമക്കേടുകൾ നടന്നിട്ടുണ്ടെന്നും പരാതിയിൽ പറയുന്നു.
സമഗ്രവും സ്വതന്ത്രവും സമയബന്ധിതവുമായ അന്വേഷണം വിഷയത്തിൽ ആവശ്യമുണ്ടെന്നാണ് പരാതിക്കാരൻ വ്യക്തമാക്കുന്നത്.
റവന്യൂ-ഭൂപരിഷ്കരണ വകുപ്പുകൾ വഴി ഉടമസ്ഥാവകാശം, പട്ടയ വ്യവസ്ഥകൾ, ഇളവ് എന്നിവ പരിശോധിക്കണം
ആഭ്യന്തരമന്ത്രി രമേശ് ചെന്നിത്തലയുടെയും, പൊലീസ് എഡിജിപിയുടെയും വിവിധ ഭരണപക്ഷ നേതാക്കളുടെയും പേരിൽ ഭീഷണിപ്പെടുത്തുന്നതു ഇയാളുടെ പതിവാണ് എന്നും പരാതിയിൽ പറയുന്നുണ്ട്.
ഇൻഡെൽ മണിയിലേക്ക് 1,200 ഏക്കർ കൈമാറ്റം
ബഥേൽ പ്ലാന്റേഷൻസ് കൈവശം വച്ചിരുന്ന 1200 ഏക്കർ ഭൂമി ഇൻ്റൽ മണിയ്ക്ക് കൈമാറിയത് സംബന്ധിച്ചുള്ളതാണ് പ്രധാനപരാതികളിൽ ഒന്നത്.
രാജമാണിക്യം കമ്മിറ്റി റിപ്പോർട്ടിലെ കണ്ടെത്തലുകളുടെ അടിസ്ഥാനത്തിൽ സർക്കാർ ഭൂമിയാണെന്ന് സർക്കാർ കോടതിയിൽ വാദിയ്ക്കുന്ന ഭൂമിയാണ് ഇൻഡൽ മണിയ്ക്ക് വിറ്റതെന്നാണ് ആരോപണം.
ഈ ഭൂമി മുഴുവൻ സർക്കാരിന്റേതാണെന്ന് വാദിച്ച് സംസ്ഥാന സർക്കാർ കട്ടപ്പന സബ് കോടതിയിൽ കേസ് ഫയൽ ചെയ്തിട്ടുണ്ടെന്നും പരാതിയിൽ ചൂണ്ടിക്കാട്ടുന്നു.
ഈ കേസ് നിലനിൽക്കവേ, 1,200 ഏക്കർ ഭൂമി ഇൻഡെൽ മണിയിലേക്ക് കൈമാറ്റം ചെയ്തതായാണ് ആരോപണം.
ഇത് നേരിട്ടുള്ള വിൽപ്പനയാണോ, അവകാശ കൈമാറ്റമാണോ?
രജിസ്ട്രേഷൻ സമയത്ത് കോടതി ഉത്തരവോ നിയമപരമായ നിയന്ത്രണമോ ഉണ്ടായിരുന്നോ, ആധാരത്തിൽ സ്വത്ത് വിവരങ്ങൾ കൃത്യമായി നൽകിയിരുന്നോ, സർക്കാരിന്റെ അവകാശവാദം മറച്ചുവെച്ചിരുന്നോ എന്നിവ അന്വേഷിക്കണമെന്നും ആവശ്യമുണ്ട്.
ജില്ലാ രജിസ്ട്രാർ, ഇടുക്കി, സബ് രജിസ്ട്രാർ, പീരുമേട് എന്നിവരുൾപ്പെടെയുള്ള ഉദ്യോഗസ്ഥരുടെ പങ്കും പരിശോധിക്കണമെന്ന് ഐ.ജിക്ക് നൽകിയ പരാതിയിൽ പറയുന്നു.
ഫാം ഫെഡ് ഗ്രൂപ്പുമായി ബന്ധപ്പെട്ട് ഏകദേശം 600 ഏക്കർ സംബന്ധിച്ച ഇടപാടും പരിശോധിക്കണമെന്ന് മുഖ്യമന്ത്രിക്കുള്ള പരാതിയിൽ ആവശ്യപ്പെട്ടിട്ടുണ്ട്.
തോട്ടഭൂമിയിൽ നിന്നും യൂക്കാലിപ്റ്റസ് ഉൾപ്പെടെയുള്ള മരങ്ങൾ വൻതോതിൽ മുറിച്ച് വാണിജ്യപരമായി വിറ്റ് കോടിക്കണക്കിന് രൂപ സമ്പാദിച്ചതായാണ് മറ്റൊരു ആരോപണം.
2000-ന് മുമ്പുള്ളതും 2019-ന് ശേഷമുള്ളതുമായ ഉപഗ്രഹ ചിത്രങ്ങൾ താരതമ്യം ചെയ്ത്, കേരള സ്റ്റേറ്റ് റിമോട്ട് സെൻസിങ് ആൻഡ് എൻവയോൺമെന്റ് സെന്ററിന്റെ (KSREC) രേഖകളുടെ സഹായത്തോടെ മരങ്ങൾ നശിപ്പിച്ചതിന്റെ വ്യാപ്തി കണ്ടെത്തണമെന്ന് പരാതിയിൽ ആവശ്യമുണ്ട്.
എസ്റ്റേറ്റിലെ മരങ്ങൾ മുറിക്കാൻ ആളുകളെ കാണിക്കുന്നുണ്ടെന്നും പരാതിയിൽ ആരോപിക്കുന്നു.
കേരള ഭൂപരിഷ്കരണ നിയമം 1963-ലെ സെക്ഷൻ 81 പ്രകാരം സീലിങ് വ്യവസ്ഥകളിൽ നിന്ന് ഇളവ് ലഭിച്ച തോട്ടഭൂമി, ചെറിയ പ്ലോട്ടുകളായി തിരിച്ച് വിൽക്കുന്നതായാണ് ആരോപണം.
ഇളവിന്റെ വ്യവസ്ഥകൾ, വിസ്തീർണ്ണം, സർവേ വിവരങ്ങൾ, പിന്നീടുള്ള കൈമാറ്റങ്ങൾ എന്നിവ പരിശോധിച്ച്, എസ്റ്റേറ്റ് ഇപ്പോഴും ഇളവിന് അർഹമാണോ എന്ന് നിർണ്ണയിക്കണമെന്ന് പരാതിക്കാരൻ ആവശ്യപ്പെട്ടു.
ഇത് കൂടാതെ ഈ ഭൂമിയിൽ ഇദ്ദേഹം അനധികൃതമായി ചെക്ക് ഡാം നിർമ്മിച്ചിട്ടുണ്ടെന്നും, ഇത് പൊളിച്ച് കളയണമെന്നും പരാതിയിൽ പറയുന്നു.
ഫാം ഫെഡ് തട്ടിപ്പിൻ്റെ ഭാഗമായി ഈ ഭൂമിയും പെട്ടിട്ടുണ്ടോ എന്ന് പരിശോധിക്കണമെന്നും പരാതിയിൽ പറയുന്നു.
ഫാം ഫെഡ് നടത്തിയ തട്ടിപ്പിൻ്റെ ഭാഗമായുള്ള കോടികളുടെ ഇടപാടുകളുടെ പണം സ്ഥലം ഉടമയുടെ അക്കൌണ്ടിൽ എത്തിയതായും പരിശോധനയിൽ കണ്ടെത്തിയിരുന്നു.
ഫാം ഫെഡ് നടത്തിയ തട്ടിപ്പിന് എതിരെ ബഡ്സ് ആക്ട് പ്രകാരമുള്ള നടപടികൾ ആരംഭിച്ചിരുന്നു.
ഈ പണം വാങ്ങിയ തോമസ് മാത്യുവിനെതിരെ ബഡ്ജ് ആക്ട് പ്രകാരമുള്ള നടപടികൾ നിലവിലുണ്ടോ എന്ന് പരിശോധിക്കണമെന്നും പരാതിയിൽ പറയുന്നു.
തോമസ് മാത്യുവിൻ്റെ പേരിലുള്ളതും, ഉണ്ടായിരുന്നതുമായ ഏതെങ്കിലും സ്ഥലങ്ങൾ ഇത്തരത്തിൽ ബഡ്സ് ആക്ടിൽ ഉൾപ്പെടുത്തിയിട്ടുണ്ടോ എന്നും പരിശോധിക്കണമെന്നും പരാതിയിൽ പറയുന്നു.
ഇത് കൂടാതെ ബഡ്സ് ആക്ടിൽ ഉൾപ്പെടാതെ തോമസ് മാത്യുവിൻ്റെ സ്ഥലം സംരക്ഷിക്കുന്നതിന് ഏതെങ്കിലും ഉദ്യോഗസ്ഥർ കൂട്ട് നിന്നിട്ടുണ്ടോ എന്ന് പരിശോധിക്കണമെന്നും പരാതിയിൽ പറയുന്നു.
ആരെങ്കിലും ബഡ്സ് ആക്ട് ഒഴിവാക്കാൻ സഹായിച്ചിട്ടുണ്ടെങ്കിൽ ആ ഉദ്യോഗസ്ഥന് എതിരെ നടപടിയെടുക്കണമെന്നും പരാതിയിൽ പറയുന്നു.
ഏലം കർഷകരെ കുടിയൊഴിപ്പിച്ചെന്ന ആരോപണം
3-4 വർഷത്തേക്ക് വലിയ അഡ്വാൻസ് വാടക വാങ്ങി, ഏലം കൃഷി ചെയ്യാൻ കർഷകർക്ക് പട്ടയം / കരാർ നൽകിയ ശേഷം, ഏലം ചെടികൾ കായ്ക്കുന്ന ഘട്ടമാകുമ്പോൾ ബലപ്രയോഗത്തിലൂടെ കുടിയൊഴിപ്പിക്കുന്നതായാണ് ആരോപണം.
പിന്നീട് കർഷകരുടെ അധ്വാനത്തിൽ വിളഞ്ഞ ഏലവും മറ്റ് സുഗന്ധവിളകളും എസ്റ്റേറ്റ് വിളവെടുത്ത് വിൽക്കുന്നതായും പരാതിയിൽ പറയുന്നു.
പല വ്യക്തികളിൽ നിന്നും സ്ഥാപനങ്ങളിൽ നിന്നും ഭൂമി വിൽക്കാമെന്ന് പറഞ്ഞ് പണം വാങ്ങി, ഭൂമിയും നൽകാതെ പണവും മടക്കാത്തതായാണ് പരാതിയിലെ പ്രധാന ആരോപണങ്ങളിലൊന്ന്.
തോട്ടഭൂമി മാറ്റവുമായി ബന്ധപ്പെട്ട് മുൻ മുഖ്യമന്ത്രി ഉമ്മൻ ചാണ്ടി, മുൻ റവന്യൂ മന്ത്രി അടൂർ പ്രകാശ് എന്നിവർക്കെതിരെ ഉയർന്ന ആരോപണങ്ങളും വിജിലൻസ് അന്വേഷണവും പരാതിയിൽ പരാമർശിക്കുന്നുണ്ട്.
ഇതിന്റെ ഇപ്പോഴത്തെ സ്ഥിതി പരിശോധിക്കണമെന്ന് ആവശ്യപ്പെട്ടിട്ടുണ്ട്.
