പെരുവ : മൂർക്കാട്ടിൽപ്പടിയിൽ വീടിനുള്ളിൽ തീപിടിച്ചു. ഞായറാഴ്ച വൈകീട്ട് 5.30-ഓടെയാണ് സംഭവം.
മൂർക്കാട്ടിപ്പടി മാടപ്പിള്ളി മ്യാലിൽ രാജുവിന്റെ വീട്ടിലെ ഒരു മുറിയിലെ വാൾഫാനിനാണ് ആദ്യം തീപിടിച്ചത്. തീപിടിച്ച ഫാൻ താഴേക്ക് വീണതോടെ കിടക്കയ്ക്കു തീപിടിച്ചു. തുടർന്ന് കട്ടിലും അലമാരകളും മുറിയിലെ വയറിങ്ങും സീലിങ് ഫാനും ഉൾപ്പെടെയുള്ള സാധനങ്ങളെല്ലാം പൂർണമായും കത്തിനശിച്ചു.
സംഭവസമയത്ത് രാജുവിന്റെ ഭാര്യ മാത്രമാണ് സ്ഥലത്തുണ്ടായിരുന്നത്. വീടിനുള്ളിൽനിന്ന് പുക പടരുന്നത് കണ്ടതോടെ ഇവർ ബഹളംവെച്ചു. ഓടിയെത്തിയ നാട്ടുകാരും അയൽക്കാരും ചേർന്ന് തീ മറ്റു മുറികളിലേക്ക് പടരുന്നതിനു മുൻപ് അണയ്ക്കുകയായിരുന്നു.
വിവരമറിഞ്ഞ് കടുത്തുരുത്തിയിൽ നിന്നും അഗ്നിരക്ഷാസേനയും വെള്ളൂർ പോലീസും സ്ഥലത്തെത്തി. ഷോട് സർക്കീറ്റാണ് അപകടകാരണമെന്നാണ് പ്രാഥമിക നിഗമനം. ഏകദേശം രണ്ട് ലക്ഷം രൂപയുടെ നാശനഷ്ടം ഉണ്ടായതായി വീട്ടുടമ രാജു പറഞ്ഞു.
