ഡല്ഹി: ഹിന്ദുമതത്തില് നിന്ന്, സിഖ്, ബുദ്ധ മതങ്ങളൊഴിച്ചു മറ്റേത് മതത്തിലേക്കു മാറിയാലും പട്ടിക ജാതി പദവി നഷ്ടമാകുമെന്ന 2026 മാര്ച്ച് 24ലെ ഉത്തരവ് സുപ്രീം കോടതി ശരിവച്ചു.
വിധി പുനഃപരിശോധിക്കണമെന്നാവശ്യപ്പെട്ട ഹര്ജി തള്ളിയ ജസ്റ്റിസ് പ്രശാന്ത് കുമാര് മിശ്ര, ജസ്റ്റിസ് മന്മോഹന് എന്നിവര്, മുന് വിധിയില് ഇടപെടാന് കാരണമില്ലെന്നും അതില് തെറ്റില്ലെന്നും വ്യക്തമാക്കി. മതം മാറിയാല് പട്ടിക ജാതി സംവരണവും നഷ്ടമാകുമെന്നാണു വിധി സൂചിപ്പിക്കുന്നത്. കേസില് ഒന്നു കൂടി വാദം കേള്ക്കണമെന്ന ആവശ്യവും തള്ളി.
പട്ടിക ജാതിക്കാര് ക്രിസ്തു മതത്തിലേക്കു മാറിയാല് ഉടന് പട്ടിക ജാതിക്കാരല്ലാതാകുമെന്നും മൂന്ന് വ്യവസ്ഥകള് പാലിച്ചാല്, പുനഃപരിവര്ത്തനം ചെയ്തു വീണ്ടും പട്ടിക ജാതി പദവി നേടാമെന്നുമാണ് മുമ്പത്തെ വിധി.
ഒന്ന്- പട്ടിക ജാതിയില്ത്തന്നെയായിരിക്കണം ജനിച്ചത്. രണ്ട്- ഹിന്ദു, സിഖ്, ബുദ്ധ മതത്തിലേക്കുള്ള പരാവര്ത്തനം യഥാര്ത്ഥമായിരിക്കണം. മൂന്ന്- ഏതു ജാതിയിലാണോ ജനിച്ചത് ആ സമൂഹം അവരെ മടക്കി സ്വീകരിക്കണം. ഇവയില് ഒരു വ്യവസ്ഥ പോലും
പാലിക്കാനായില്ലെങ്കില് പുനഃപരിവര്ത്തനം (പരാവര്ത്തനം) ചെയ്തെന്ന വാദം അസ്വീകാര്യമാണെന്നും സുപ്രീംകോടതി വ്യക്തമാക്കിയിരുന്നു.
ആന്ധ്രയില് പട്ടിക ജാതിയില് ജനിച്ചയാള് പിന്നീട് മതം മാറി പാസ്റ്ററായി. ചില നാട്ടുകാര് ജാതി പറഞ്ഞ് ആക്ഷേപിച്ചെന്നു കാട്ടി, പട്ടിക ജാതി, വര്ഗക്കാരോടുള്ള അക്രമം തടയല് നിയമ പ്രകാരം പരാതി നല്കി. പോലീസ് കേസുമെടുത്തു.
എന്നാല് മതം മാറിയതിനാല് പട്ടിക ജാതി വര്ഗക്കാരോടുള്ള അക്രമം തടയല് നിയമം ഇയാള്ക്ക് ബാധകല്ലെന്നു കാണിച്ച് പ്രതി ഹൈക്കോടതിയില് ഹര്ജി നല്കി. ഹര്ജി അംഗീകരിച്ച ഹൈക്കോടതി പോലീസ് കേസ് റദ്ദാക്കി. ഇതു ചോദ്യം ചെയ്ത അപ്പീലില് സുപ്രീംകോടതി ഹൈക്കോടതി വിധി ശരിവച്ചു. ക്രിസ്ത്യാനിക്ക് പട്ടിക ജാതി, വര്ഗക്കാരോടുള്ള അക്രമം തടയല് നിയമ പ്രകാരമുള്ള പരിരക്ഷയില്ലെന്നും സുപ്രീം കോടതി വ്യക്തമാക്കി.
