കോട്ടയം: രക്തക്കുഴലുകളില്‍ കൊഴുപ്പ് അടിഞ്ഞുകൂടി തടസമുണ്ടാകുന്നത് ഹൃദയാഘാതം ഉള്‍പ്പെടെയുള്ള ഗുരുതരമായ ആരോഗ്യപ്രശ്‌നങ്ങളിലേക്ക് നയിച്ചേക്കാം.
തുടക്കത്തില്‍ ഒരുപക്ഷെ ലക്ഷണങ്ങള്‍ പ്രകടമായിരിക്കില്ല. എന്നാല്‍ ആരോഗ്യനില മോശമാകുന്നതിന് അനുസരിച്ച്‌ നമ്മുടെ ശരീരം തന്നെ ചില മുന്നറിയിപ്പുകള്‍ നല്‍കും.
ആരോഗ്യവിദഗ്ധര്‍ ചൂണ്ടിക്കാട്ടുന്ന ആ പ്രധാന ലക്ഷണങ്ങള്‍ എന്തൊക്കെയെന്ന് പരിശോധിക്കാം.
നെഞ്ചുവേദന/നെഞ്ചെരിച്ചില്‍ പോലുള്ള അസ്വസ്ഥത: ഹൃദയത്തിലേക്ക് ആവശ്യമായ രക്തം എത്താതിരിക്കുമ്പോള്‍ നെഞ്ചില്‍ ഭാരം അനുഭവപ്പെടാം. ഇത് കടുത്ത നെഞ്ചുവേദനയിലേക്കും നയിച്ചേക്കാം.
ശ്വാസമെടുക്കാന്‍ ബുദ്ധിമുട്ട്: വിശ്രമമേളയില്‍ പോലും ശ്വാസമെടുക്കാന്‍ ബുദ്ധിമുട്ടുകയോ കിതപ്പ് അനുഭവപ്പെടുകയോ ചെയ്യുന്നത് ഹൃദയത്തിലേക്ക് ശരിയായി രക്തം പമ്പ് ചെയ്യുന്നില്ല എന്നതിന്റെ മറ്റൊരു ലക്ഷണമാണ്.
കാല്‍മുട്ടുകളിലും കാലുകളിലുമുണ്ടാകുന്ന വേദന: നടക്കുമ്പോള്‍ കാലില്‍ അനുഭവപ്പെടുന്ന വേദനയും തരിപ്പുമാണ് ഹൃദയാഘാതത്തിന്റെ മറ്റൊരു ലക്ഷണം. പെരിഫറല്‍ ആര്‍ട്ടറി ഡിസീസ് മൂലം കാലുകളിലേക്കുള്ള രക്തയോട്ടം കുറയുമ്പോഴാണ് വേദനയും തരിപ്പും ഉണ്ടാകുന്നത്.
വിട്ടുമാറാത്ത ക്ഷീണം: രക്തക്കുഴലുകളില്‍ തടസമുണ്ടാകുമ്പോള്‍ ശരീരത്തിലെ അവയവങ്ങളിലേക്ക് ആവശ്യമായ ഓക്‌സിജന്‍ എത്താതാകും. ഇത് പെട്ടെന്നുള്ള തലകറക്കത്തിനും ക്ഷീണത്തിനും കാരണമാകുകയും ചെയ്യും.
അമിതമായ വിയര്‍പ്പ്: ശൈത്യകാലത്തും അമിതമായി വിയര്‍ക്കുന്നത് ഹൃദയം കൂടുതല്‍ സമ്മര്‍ദത്തിലാണ് എന്നതിന്റെ ലക്ഷണമാണ്.
കഴുത്തിലും പുറത്തും അനുഭവപ്പെടുന്ന വേദന: രക്തക്കുഴലുകളിലെ തടസം അതികഠിനമായ ശരീരവേദനയിലേക്ക് നയിച്ചേക്കാം. കഴുത്തിലേക്കും താടിയെല്ലുകളിലേക്കും പുറം ഭാഗങ്ങളിലേക്കും ഈ വേദന പടരുന്നുണ്ടെങ്കില്‍ ഉടനെ ആരോഗ്യവിദഗ്ധരെ സമീപിക്കുക. സ്ത്രീകള്‍ ഇക്കാര്യം പ്രത്യേകം ശ്രദ്ധിക്കുക.
