ആലപ്പുഴ: സിപിഎം ജില്ലാ സെക്രട്ടറി ആർ. നാസറിനെതിരെ രൂക്ഷ വിമർശനവുമായി അമ്പലപ്പുഴ എംഎൽഎ ജി. സുധാകരൻ. തനിക്കെതിരെ ഉയർന്ന വിമർശനങ്ങൾക്ക് മറുപടി പറയുന്നതിനിടെയാണ് ജില്ലാ സെക്രട്ടറി ജനങ്ങളിൽ നിന്ന് ഒറ്റപ്പെട്ട നേതാവാണെന്നും ജനപിന്തുണ തിരിച്ചുപിടിക്കാനുള്ള കഴിവില്ലാത്തയാളാണെന്നും സുധാകരൻ ആരോപിച്ചത്.
"തന്നെ കൈകാര്യം ചെയ്തോളൂ. ജനങ്ങൾ സിപിഎമ്മിനെ കൈകാര്യം ചെയ്ത് കഴിഞ്ഞു. ഇനി തന്നെ ആരെങ്കിലും ആക്രമിച്ചാൽ അതിന്റെ ഉത്തരവാദി ജില്ലാ സെക്രട്ടറിയായിരിക്കും," എന്ന് ജി. സുധാകരൻ പ്രതികരിച്ചു.
അതേസമയം, പൊതുവേദികളിൽ പാർട്ടിയെയും നേതാക്കളെയും അധിക്ഷേപിക്കുന്നത് അവസാനിപ്പിക്കണമെന്ന് ആവശ്യപ്പെട്ട് ആർ. നാസർ വീണ്ടും മുന്നറിയിപ്പ് നൽകി. രാഷ്ട്രീയ അഭിപ്രായവ്യത്യാസങ്ങൾ ഇത്തരത്തിൽ കൈകാര്യം ചെയ്യാനാകില്ലെന്നും സുധാകരൻ നിലപാട് മാറ്റിയില്ലെങ്കിൽ ക്രമസമാധാന പ്രശ്നങ്ങൾക്ക് ഇടയാകുമെന്നും അദ്ദേഹം പറഞ്ഞു. തുടർച്ചയായ ആക്രമണങ്ങൾ ഉണ്ടായാൽ പാർട്ടിയും പ്രതികരിക്കേണ്ടിവരുമെന്നും ക്ഷമയ്ക്കും പരിധിയുണ്ടെന്നും ജില്ലാ സെക്രട്ടറി കൂട്ടിച്ചേർത്തു.
