കളമശ്ശേരി: എറണാകുളം ഗവ. മെഡിക്കല്‍ കോളേജില്‍ നിന്നും ഡിസ്ചാര്‍ജ് ചെയ്യാനിരുന്ന ദിവസം രോഗി കുഴഞ്ഞുവീണു മരിച്ചു.
മട്ടാഞ്ചേരി പുളിക്കലത്ത് ഹലീലുല്‍ റഹ്‌മാന്‍ (40) ആണ് ഞായറാഴ്ച രാവിലെ 11.15-ഓടെ മരണപ്പെട്ടത്. ഈ മാസം 22-ന് പുലര്‍ച്ചെ നാലുമണിയോടെ ഇരുചക്ര വാഹനത്തില്‍ സഞ്ചരിക്കവേ, മുന്നിലെത്തിയ മറ്റൊരു വാഹനത്തില്‍ ഇടിക്കാതിരിക്കാന്‍ വെട്ടിച്ചു മാറ്റുന്നതിനിടയിലാണ് ഹലീലുല്‍ റഹ്‌മാന്‍ നിയന്ത്രണം വിട്ട് റോഡില്‍ വീണത്.
ഇടതുകാലിന് മൂന്നിടത്ത് ഗുരുതരമായി ഒടിവു സംഭവിച്ച അദ്ദേഹത്തെ ആദ്യം എറണാകുളം ജനറല്‍ ആശുപത്രിയിലും, തുടര്‍ന്ന് വിദഗ്ധ ചികിത്സയ്ക്കായി എറണാകുളം ഗവ. മെഡിക്കല്‍ കോളേജിലേക്കും മാറ്റുകയായിരുന്നു. 25-ന് ശസ്ത്രക്രിയയ്ക്ക് വിധേയനാക്കിയ അദ്ദേഹത്തിന് ഹൃദയാഘാതം സംഭവിച്ചതാണ് മരണകാരണമെന്നാണ് ആശുപത്രി അധികൃതരുടെ പ്രാഥമിക നിഗമനം.
ചികിത്സയിലായിരുന്ന അദ്ദേഹത്തിന്റെ മരണം ആശുപത്രി അധികൃതരുടെ ചികിത്സാപിഴവും അനാസ്ഥയും മൂലമാണെന്ന് ആരോപിച്ച്‌ സഹോദരന്‍ ഷുഹൈബ് മെഡിക്കല്‍ കോളേജ് സൂപ്രണ്ടിന് പരാതി നല്‍കി. ബന്ധുക്കള്‍ നല്‍കിയ പരാതിയുടെ അടിസ്ഥാനത്തില്‍ മെഡിക്കല്‍ കോളേജ് സൂപ്രണ്ട് ഡോ. അനൂപ് ജോസഫ് അന്വേഷണം പ്രഖ്യാപിച്ചു. ഡെപ്യൂട്ടി സൂപ്രണ്ടിന്റെ നേതൃത്വത്തില്‍ വകുപ്പ് മേധാവികള്‍ അടങ്ങുന്ന സമിതി എത്രയും വേഗം അന്വേഷണ റിപ്പോര്‍ട്ട് സമര്‍പ്പിക്കാന്‍ നിര്‍ദേശിച്ചിട്ടുണ്ട്.
അതിനിടെ, സംഭവം ചികിത്സാപിഴവും അനാസ്ഥയുമാണെന്ന് ആരോപിച്ച്‌ ഡി.വൈ.എഫ്.ഐ. മെഡിക്കല്‍ കോളേജില്‍ പ്രതിഷേധ പ്രകടനം നടത്തി.
