ആഗ്ര: ചീഫ് ഇലക്ഷൻ കമ്മീഷണർ (സിഇസി) ഗ്യാനേഷ് കുമാറിന്റെ ആഗ്രയിലുള്ള തറവാട്ടു വീട് ഗംഗാജലം തളിച്ച്‌ ശുദ്ധീകരിച്ച്‌ ബന്ധുക്കളും നാട്ടുകാരും.
ഏതാനും ദിവസങ്ങള്‍ക്ക് മുൻപ് കോണ്‍ഗ്രസ് പ്രവർത്തകർ ഗ്യാനേഷ് കുമാറിന്റെ വീടിന് മുന്നില്‍ നടത്തിയ വൻ പ്രതിഷേധത്തിനും കരി ഓയില്‍ പ്രയോഗത്തിനും ശേഷമാണ് ചൊവ്വാഴ്ച വൈകീട്ടോടെ വീട്ടില്‍ വൻ മതപരമായ ചടങ്ങുകളും ഗംഗാജലം തളിക്കലും നടന്നത്. സെപ്റ്റംബർ 28-ന് നടന്ന പ്രതിഷേധത്തിനിടെ കോണ്‍ഗ്രസ് പ്രവർത്തകർ ഗ്യാനേഷ് കുമാറിന്റെ വിജയ് നഗറിലുള്ള തറവാട്ടു വീടിന്റെ പ്രധാന കവാടത്തിലും മതിലുകളിലും "വോട്ട് ചോരൻ" (വോട്ട് മോഷ്ടാവ്), "ഗദ്ദാർ" (ചതിക്കുന്നവൻ) എന്നെല്ലാം കരി ഓയില്‍ ഉപയോഗിച്ച്‌ എഴുതിവെക്കുകയും കറുത്ത മഷി തളിക്കുകയും ചെയ്തിരുന്നു. ഇതേത്തുടർന്ന് കടുത്ത മനോവിഷമത്തിലായിരുന്ന കുടുംബാംഗങ്ങളും പ്രദേശവാസികളും ചേർന്നാണ് വീടും പരിസരവും ഗംഗാജലം തളിച്ച്‌ ശുദ്ധീകരിക്കാൻ തീരുമാനിച്ചത്.
വിജയ് നഗർ കോളനിയിലെ രാധാ-കൃഷ്ണ ക്ഷേത്രത്തില്‍ നിന്ന് സ്ത്രീകള്‍ കുംഭവും ഗംഗാജലവും ഏന്തി സങ്കീർത്തനങ്ങളോടെയും ശംഖനാദത്തോടെയും ആരംഭിച്ച പ്രത്യേക കളശയാത്ര ഗ്യാനേഷ് കുമാറിന്റെ വസതിയിലാണ് അവസാനിച്ചത്. തുടർന്ന് വേദമന്ത്രോച്ചാരണങ്ങളോടെ വീടിന്റെ പ്രധാന കവാടത്തിലും ഉള്ളിലും ഗംഗാജലം തളിക്കുകയും വീടിന് മുന്നില്‍ സുന്ദരകാണ്ഡ പാരായണവും രാമചരിതമാനസ പ്രാർത്ഥനകളും സംഘടിപ്പിക്കുകയും ചെയ്തു. മാഥുർ വൈശ്യ മഹാസഭയുടെയും വിജയ് നഗർ മഹിളാ മണ്ഡലിന്റെയും നേതൃത്വത്തിലായിരുന്നു ഈ പരിപാടികള്‍. മകൻ രാജ്യത്തെ പരമോന്നത തിരഞ്ഞെടുപ്പ് പദവിയിലിരുന്ന് സേവനം ചെയ്യുമ്പോള്‍, രാഷ്ട്രീയ വൈരാഗ്യത്തിന്റെ പേരില്‍ തങ്ങളുടെ വീടിന് മുന്നിലെത്തി അസഭ്യം പറയുകയും വീട് വൃത്തികേടാക്കുകയുമായിരുന്നെന്ന് ഗ്യാനേഷ് കുമാറിന്റെ മാതാവ് സത്യവതി ഗുപ്ത വിങ്ങിപ്പൊട്ടിക്കൊണ്ട് പറഞ്ഞു. മകന്റെ പേര് ചീത്തയാക്കാനും കുടുംബത്തെ നാണം കെടുത്താനുമാണ് കോണ്‍ഗ്രസ് ശ്രമിച്ചതെന്നും, ആ അശുദ്ധി മാറ്റാനാണ് അയല്‍വാസികളായ സ്ത്രീകളുടെ സഹായത്തോടെ ഗംഗാജലം തളിച്ച്‌ പൂജ നടത്തിയതെന്നും അവർ വ്യക്തമാക്കി.
ഗ്യാനേഷ് കുമാറിന്റെ പിതാവ് ഡോ. സുബോദ് കുമാർ ഗുപ്തയും കോണ്‍ഗ്രസ് പ്രതിഷേധത്തിനെതിരെ അതിരൂക്ഷമായ ഭാഷയിലാണ് പ്രതികരിച്ചത്. തന്റെ മകൻ രാജ്യസേവനം നടത്തുകയാണെന്നും പ്രതിപക്ഷത്തിന് എന്തെങ്കിലും പ്രതിഷേധമുണ്ടെങ്കില്‍ അത് ഡല്‍ഹിയില്‍ അവന്റെ ഓഫീസിനോ വീടിനോ മുന്നിലാണ് കാണിക്കേണ്ടതെന്നും, ഇവിടെ പ്രായമായ മാതാപിതാക്കള്‍ മാത്രം കഴിയുന്ന തറവാട്ടു വീട്ടില്‍ വന്ന് അക്രമം കാണിച്ചത് രാഷ്ട്രീയ തരംതാണ പരിപാടിയാണെന്നും അദ്ദേഹം പറഞ്ഞു. ഇലക്ഷൻ കമ്മീഷന്റെ തീരുമാനങ്ങളെയും വോട്ടർ പട്ടിക പുതുക്കല്‍ നടപടികളെയും കുറ്റപ്പെടുത്തുന്ന പ്രതിപക്ഷം അവർ ജയിക്കുന്ന സംസ്ഥാനങ്ങളില്‍ ഈ സംവിധാനങ്ങളെ ചോദ്യം ചെയ്യാറില്ലെന്നും തോല്‍ക്കുമ്പോള്‍ മാത്രം കമ്മീഷന് നേരെ തിരിയുന്നത് ഇരട്ടത്താപ്പാണെന്നും സുബോദ് ഗുപ്ത തുറന്നടിച്ചു.
നേരത്തെ ഗ്യാനേഷ് കുമാറിന്റെ വീടിന് മുന്നില്‍ അക്രമം കാണിക്കുകയും കരി ഓയില്‍ ഒഴിക്കുകയും ചെയ്ത കേസില്‍ യുപി പോലീസ് അറസ്റ്റ് ചെയ്ത ആറ് കോണ്‍ഗ്രസ് നേതാക്കള്‍ക്ക് കഴിഞ്ഞ ദിവസമാണ് കോടതി ജാമ്യം അനുവദിച്ചത്. ജയിലില്‍ നിന്ന് പുറത്തിറങ്ങിയ കോണ്‍ഗ്രസ് പ്രവർത്തകർ ആഗ്രയില്‍ പ്രകടനം നടത്താൻ ശ്രമിച്ചെങ്കിലും പോലീസ് തടയുകയായിരുന്നു. കേന്ദ്ര തലത്തില്‍ രാഹുല്‍ ഗാന്ധിയും പ്രിയങ്ക ഗാന്ധിയും ഉള്‍പ്പെടെയുള്ള പ്രതിപക്ഷ നേതാക്കള്‍ ചീഫ് ഇലക്ഷൻ കമ്മീഷണർക്കെതിരെ ഡല്‍ഹിയില്‍ വൻ പ്രതിഷേധം തുടരുന്നതിനിടെയാണ്, ഉത്തർപ്രദേശിലെ ആഗ്രയിലുള്ള അദ്ദേഹത്തിന്റെ കുടുംബവീട്ടില്‍ ഗംഗാജല ശുദ്ധീകരണവും സുന്ദരകാണ്ഡ പാരായണവും നടത്തി കുടുംബവും സമുദായ നേതാക്കളും പ്രതിരോധം തീർത്തിരിക്കുന്നത്.
