പയ്യന്നൂർ: ഇംഗ്ലണ്ടിലെ ഡോക്ടറാണെന്ന് വിശ്വസിപ്പിച്ച് വാട്സ്ആപ്പിലൂടെ സൗഹൃദം സ്ഥാപിച്ച തട്ടിപ്പുകാരൻ കണ്ണൂർ പയ്യന്നൂർ സ്വദേശിനിയായ 38കാരിയില് നിന്ന് 14 ലക്ഷം രൂപ തട്ടിയെടുത്തു. ചാറ്റിംഗിലൂടെ യുവതിയുമായി അടുപ്പം സ്ഥാപിച്ച തട്ടിപ്പുകാരൻ, കഴിഞ്ഞ ദിവസം യുവതിയെ നേരിട്ട് കാണാനായി ഇന്ത്യയിലേക്ക് എത്തിയിട്ടുണ്ടെന്ന് വിശ്വസിപ്പിക്കുകയായിരുന്നു.
തുടർന്ന് വിമാനത്താവളത്തിലിറങ്ങിയ തന്നെ കസ്റ്റംസ് വിഭാഗം തടഞ്ഞുവെച്ചിരിക്കുകയാണെന്നും, അവിടെ നിന്നും പുറത്തിറങ്ങാൻ അടിയന്തരമായി പണം വേണമെന്നും ആവശ്യപ്പെട്ടു. ഇതനുസരിച്ച് തട്ടിപ്പുകാരൻ നല്കിയ വിവിധ ബാങ്ക് അക്കൗണ്ടുകളിലേക്ക് യുവതി ഘട്ടംഘട്ടമായി 14 ലക്ഷം രൂപ കൈമാറുകയായിരുന്നു. പണം അയച്ചുകൊടുത്തതിന് ശേഷം വാട്സ്ആപ്പ് സന്ദേശങ്ങള്ക്കും ഫോണ് കോളുകള്ക്കും മറുപടി ലഭിക്കാതായതോടെയാണ് താൻ വഞ്ചിക്കപ്പെടുകയായിരുന്നെന്ന് യുവതിക്ക് മനസ്സിലായത്.
സംഭവത്തില് പയ്യന്നൂർ പോലീസ് കേസ് രജിസ്റ്റർ ചെയ്ത് അന്വേഷണം ആരംഭിച്ചിട്ടുണ്ട്. അപരിചിതരില് നിന്നുള്ള ഇത്തരം സന്ദേശങ്ങളിലും സാമ്പത്തിക സഹായ അഭ്യർത്ഥനകളിലും വഞ്ചിക്കപ്പെടരുതെന്ന് പോലീസ് ജനങ്ങള്ക്ക് മുന്നറിയിപ്പ് നല്കി.
