ഡല്‍ഹി: രാജ്യത്ത് വാഹനങ്ങള്‍ക്ക് സഞ്ചരിക്കാൻ റോഡുകള്‍ ഉള്ളിടത്തെല്ലാം കാല്‍നടയാത്രക്കാർക്കായി നിർബന്ധമായും നടപ്പാത ഒരുക്കണമെന്ന് സുപ്രീംകോടതിയുടെ സുപ്രധാന നിർദേശം.
ഇതിനായി കേന്ദ്രതലത്തില്‍ ഒരു പ്രത്യേക അതോറിറ്റി രൂപീകരിക്കണമെന്നും കോടതി കേന്ദ്ര സർക്കാരിനോട് നിർദേശിച്ചു. സുപ്രീംകോടതിയുടെ ഈ പുതിയ നിർദേശങ്ങള്‍ രാജ്യത്തെ അഞ്ച് നഗരങ്ങളെ തിരഞ്ഞെടുത്ത് ആദ്യം പരീക്ഷണാടിസ്ഥാനത്തില്‍ നടപ്പിലാക്കാനാണ് കോടതി നിലവില്‍ ആവശ്യപ്പെട്ടിരിക്കുന്നത്.
നടപ്പാത ഒരുക്കാനുള്ള ചുമതല ഏല്‍പ്പിക്കാവുന്ന കേന്ദ്രതല അതോറിറ്റിയെ കണ്ടെത്തി റിപ്പോർട്ട് സമർപ്പിക്കാൻ അഡീഷണല്‍ സോളിസിറ്റർ ജനറല്‍ കെഎം നടരാജനോട് ജസ്റ്റിസുമാരായ പിഎസ് നരസിംഹ, അലോക്ക് അരാധെ എന്നിവരടങ്ങിയ ഡിവിഷൻ ബെഞ്ച് നിർദേശിച്ചു. ഈ വിഷയത്തില്‍ കേന്ദ്ര സർക്കാരിൻ്റെ നിർദേശങ്ങള്‍ തേടി മൂന്ന് ആഴ്ചയ്ക്കകം റിപ്പോർട്ട് നല്‍കണമെന്നും കോടതി കർശനമായി വ്യക്തമാക്കിയിട്ടുണ്ട്.
കാല്‍നടയാത്ര മൗലികാവകാശം
കാല്‍നടയാത്രയ്ക്കുള്ള അവകാശം പൗരൻ്റെ മൗലികാവകാശമാണെന്നും, രാജ്യത്ത് റോഡുകളുള്ളിടത്തെല്ലാം വ്യക്തമായി വേർതിരിച്ച നടപ്പാത കൂടി നിർബന്ധമായും ഉണ്ടായിരിക്കണമെന്നും കോടതി മുൻപ് വ്യക്തമാക്കിയിരുന്നു. കഴിഞ്ഞ ജൂണില്‍ (2026) പുറപ്പെടുവിച്ച ഈ സുപ്രധാന വിധിയിലെ നിർദേശങ്ങള്‍ എത്രത്തോളം നടപ്പിലാക്കുന്നുണ്ടെന്ന് നിരീക്ഷിക്കുന്നതിനിടെയാണ് കോടതി പുതിയ നിർദേശങ്ങളുമായി വീണ്ടും രംഗത്തെത്തിയിരിക്കുന്നത്.
പ്രാദേശിക റോഡുകളിലും ആശ്വാസം
ദേശീയപാതകളില്‍ നടപ്പാതകള്‍ പൂർണമായും നടപ്പിലാക്കുന്നതിനായുള്ള സുപ്രീംകോടതിയുടെ മുൻ ഉത്തരവുകളില്‍ ജില്ലാ ഭരണകൂടങ്ങള്‍ നിലവില്‍ നടപടി സ്വീകരിച്ചു വരുന്നതിനിടയിലാണ്, മറ്റ് റോഡുകളില്‍ കൂടി നടപ്പാത വേണമെന്ന പുതിയ നിർദേശം കോടതിയില്‍ നിന്നുണ്ടായിരിക്കുന്നത്.
ജില്ലയിലെ ദേശീയപാതകളില്‍ ഇനിയും പൂർണമായും നടപ്പാതകള്‍ നിർമിക്കാൻ കഴിയാത്ത അവസ്ഥയുണ്ട്. സ്ഥലമേറ്റെടുപ്പ് ഉള്‍പ്പെടെ പലയിടത്തും പലവിധ തടസ്സങ്ങളുമുണ്ട്.
