പാലാ: പാലാ നഗരസഭ പരിധിയിൽ ഇനി ഫ്ലക്സ് ബോർഡ് വേണ്ട കേട്ടോ.
നഗരത്തെ ഫ്ലക്സ് വിമുക്തമാക്കാനുള്ള കർശന നടപടികൾക്ക് തുടക്കമിട്ട് പാലാ നഗരസഭ.
ഇന്നലെ നഗരത്തിലെ വിവിധയിടങ്ങളിൽ സ്ഥാപിച്ചിരുന്ന നൂറിലധികം അനധികൃത ഫ്ലക്സുകൾ നീക്കം ചെയ്തു.
നഗരസഭ ആരോഗ്യവിഭാഗം ഉദ്യോഗസ്ഥരും തൊഴിലാളികളും പ്രത്യേക സംഘങ്ങളായി തിരിഞ്ഞ് ഇന്നലെ രാവിലെ
മുതൽ നടത്തിയ പരിശോധനയിലാണ് പ്രധാന ജംഗ്ഷനുകളിലും റോഡരികുകളിലും സ്ഥാപിച്ചിരുന്ന ഫ്ലക്സുകൾ അഴിച്ചുമാറ്റിയത്.
അനുമതിയില്ലാതെ ഫ്ലക്സുകൾ സ്ഥാപിച്ചവരെ കണ്ടെത്തി പിഴ ഈടാക്കുന്നതിനായി നോട്ടീസുകൾ നൽകുന്നതായും അധികൃതർ അറിയിച്ചു.
ഇന്നലെ മാത്രം 30 ഓളം പേർക്ക് നോട്ടീസ് നൽകി.
പരിശോധന വരും ദിവസങ്ങളിലും കൂടുതൽ കർശനമാക്കുമെന്നും അധികാരികൾ പറയുന്നു.
പാലായെ ഫ്ലക്സ് വിമുക്ത നഗരമാക്കാൻ പൊതുജനങ്ങളും രാഷ്ട്രീയ പാർട്ടികളും സാമൂഹിക, സാംസ്കാരിക
സംഘടനകളും പൂർണ സഹകരണം നൽകണമെന്ന് ചെയർപേഴ്സൺ മായാ രാഹുൽ, വൈസ് ചെയർമാൻ ബിജു മാത്യൂസ്,
ആരോഗ്യ സ്റ്റാൻഡിംഗ് കമ്മിറ്റി ചെയർപേഴ്സൺ രജിത പ്രകാശ് എന്നിവർ അഭ്യർത്ഥിച്ചു.
