തിരുവനന്തപുരം: വെങ്ങാനൂരില് ഓടിക്കൊണ്ടിരുന്ന കാറിന് തീപിടിച്ചുണ്ടായ അപകടത്തില് മരിച്ചയാളെ തിരിച്ചറിഞ്ഞു. കോട്ടയം ഏറ്റുമാനൂര് തെള്ളകം കാക്കനാട്ട് വീട്ടില് വിരമിച്ച വ്യോമസേനാ കോര്പ്പറലായ ടൈറ്റസ് കുര്യന് (65) ആണ് മരിച്ചത്.
തിരുവല്ല ബിലിവേഴ്സ് ചര്ച്ച് മെഡിക്കല് കോളേജിലെ ഡോക്ടറും ടൈറ്റസിന്റെ മകനുമായ ഡെന്നിസ് ടൈറ്റസും ബന്ധുക്കളും ചേര്ന്നാണ് വിഴിഞ്ഞം പോലീസിന്റെ സാന്നിധ്യത്തില് മൃതദേഹം തിരിച്ചറിഞ്ഞത്.
ഞായറാഴ്ച വൈകീട്ട് വീട്ടില്നിന്ന് പുറപ്പെടുമ്പോള് ടൈറ്റസ് കുര്യന് കയ്യില് കരുതിയിരുന്ന വസ്ത്രങ്ങളുടെ കരിഞ്ഞ ഭാഗങ്ങള് കാറിനുള്ളില്നിന്ന് പോലീസ് കണ്ടെത്തിയിരുന്നു.
ഈ വസ്ത്രഭാഗങ്ങള് പരിശോധിച്ച മകന് അത് പിതാവിന്റേതാണെന്ന് സ്ഥിരീകരിക്കുകയായിരുന്നു. ഫിലോമിനയാണ് മരിച്ച ടൈറ്റസ് കുര്യന്റെ ഭാര്യ.
തിങ്കളാഴ്ച പുലര്ച്ചെ 5.10-ഓടെ വെങ്ങാനൂര്-പള്ളിച്ചല് റൂട്ടില് അയ്യങ്കാളി സ്മൃതി മണ്ഡപത്തിന് സമീപത്തുവെച്ചായിരുന്നു അതിദാരുണമായ അപകടം നടന്നത്.
വെങ്ങാനൂര് വഴി പള്ളിച്ചല് ഭാഗത്തേക്ക് പോകുകയായിരുന്ന കാറിന്റെ മുന്ഭാഗത്തുനിന്നാണ് പെട്ടെന്ന് തീ ആളിപ്പടര്ന്നത്.
ഈ സമയം ഭാര്യയോടൊപ്പം ബൈക്കില് അതുവഴി വരികയായിരുന്ന ഒരു യുവാവ് കാറിന്റെ മുന്വശത്ത് തീപിടിക്കുന്നത് കണ്ട് ഉടന്തന്നെ ഡ്രൈവറെ വിളിച്ചുണര്ത്താന് ശ്രമിച്ചു.
എന്നാല് വണ്ടി പെട്ടെന്ന് പിന്നോട്ട് ഉരുണ്ടുനീങ്ങി സമീപത്തെ മതിലിലിടിച്ച് തീ ആളിപ്പടരുകയായിരുന്നുവെന്ന് ഇയാള് പോലീസിന് മൊഴി നല്കിയിട്ടുണ്ട്.
കാറിന് തീപിടിച്ചയുടന് വാതില് തുറന്ന് രക്ഷപ്പെടാന് ടൈറ്റസ് ശ്രമം നടത്തിയിരുന്നെന്നാണ് പോലീസിന്റെ പ്രാഥമിക നിഗമനം.
എന്നാല് ആ സമയത്ത് സീറ്റ് ബെല്റ്റ് കുടുങ്ങിപ്പോയതാകാം ദുരന്തത്തിന്റെ വ്യാപ്തി കൂട്ടിയതെന്ന് സംശയിക്കുന്നു.
ശരീരമാസകലം ഗുരുതരമായി പൊള്ളലേറ്റ നിലയിലായിരുന്നു മൃതദേഹമെന്ന് സംഭവസ്ഥലത്തെത്തിയ വിഴിഞ്ഞം പോലീസ് വ്യക്തമാക്കുന്നു.
അപകടത്തിന്റെ ആഘാതത്തില് ഇയാളുടെ ഇടതുകാല് പൊള്ളലേറ്റ് വേര്പെട്ട നിലയിലും തലയോട് പൊട്ടിയ നിലയിലുമായിരുന്നു കാണപ്പെട്ടത്.
അപകടത്തിന് പിന്നില് സാങ്കേതിക തകരാറുകള്ക്ക് പുറമെ മറ്റെന്തെങ്കിലും അസ്വാഭാവിക കാരണങ്ങളുണ്ടോ എന്ന കാര്യവും പോലീസ് വളരെ ഗൗരവത്തോടെ പരിശോധിച്ചുവരികയാണ്.
അന്വേഷണത്തിന്റെ ഭാഗമായി ഫൊറന്സിക് സംഘം സ്ഥലത്തെത്തി കാറില്നിന്നുള്ള മാംസഭാഗങ്ങളും ഇന്ധനത്തിന്റെ സാന്നിധ്യം പരിശോധിക്കാനുള്ള സാമ്പിളുകളും ശേഖരിച്ചു. ഇതിനുപുറമേ മോട്ടോര് വാഹന വകുപ്പും അപകടത്തെക്കുറിച്ച് സമഗ്രമായ അന്വേഷണം നടത്തും.
