കോഴിക്കോട്: പോലിസ് ഓഫിസര്മാരുടെ ചിത്രങ്ങള് വാട്സാപ്പില് മുഖചിത്രമാക്കി ജോലി വാഗ്ദാനം ചെയ്ത് പണം തട്ടിയ കേസിൽ ഒരാൾ അറസ്റ്റില്.
സിറ്റി പൊലീസ് കമ്മിഷണര് എ.പി. ഷൗക്കത്തലി ഉള്പ്പെടെ വിവിധയിടങ്ങളിലെ പൊലീസ് ഉദ്യോഗസ്ഥരുടെ പ്രൊഫൈല് ഉണ്ടാക്കിയായിരുന്നു വന് തട്ടിപ്പ്. പാലക്കാട് ഒറ്റപ്പാലം സ്വദേശി നല്കിയ പരാതിയില് പാലക്കാട് സ്വദേശി അയൂബ് ആണ് സിറ്റി സൈബര് ക്രൈം പൊലീസിന്റെ പിടിയിലായത്.
തട്ടിപ്പിന് ഇരയായവരുടെ വിശ്വസ്തത പിടിച്ചുപറ്റാന് ഇയാള് കമ്മിഷണര് ഷൗക്കത്തലിയുടെ ചിത്രം തന്റെ വാട്സാപ്പ് മുഖചിത്രം ആക്കിയിരുന്നുവെന്നാണ് കണ്ടെത്തല്. യുഎഇയില് ഉയര്ന്ന ജോലി വാഗ്ദാനം ചെയ്ത് മറ്റൊരാളില് നിന്നും വന് തുക തട്ടിയതായും പരാതി ഉണ്ട്. ആ സമയം വാട്സാപ്പ് മുഖചിത്രം യുഎഇയിലെ പൊലീസ് ഉദ്യോഗസ്ഥന്റെതായിരുന്നു.
പണം ലഭിച്ചതിനു പിന്നാലെ വ്യാജ ഓഫര് ലെറ്ററുകളും, വര്ക്ക് പെര്മിറ്റും, വിമാന ടിക്കറ്റുകളും പ്രതി വാട്സാപ്പ് വഴി ഇരകള്ക്ക് അയച്ചുനല്കി. പിന്നിട് ഇയാളെ പറ്റി യാതൊരു വിവരവും ലഭിച്ചില്ല. തുടര്ന്നാണ് തങ്ങള് കബളിക്കപ്പെട്ടു എന്ന് ഇരകള്ക്ക് മനസിലായത്.
1,22,600 രൂപയാണ് പാലക്കാട് ഒറ്റപ്പാലം സ്വദേശിക്ക് നഷ്ടമായത്. പരാതിയുടെ അടിസ്ഥാനത്തില് സിറ്റി സൈബര് ക്രൈം പൊലീസ് നടത്തിയ അന്വേഷണത്തിലാണ് പാലക്കാട് സ്വദേശിയായ പ്രതി വലയിലായത്.
