അരൂര്: ആലപ്പുഴ തീരദേശ റെയില്പാതയില് കോഴിക്കോട് സ്വദേശിയായ യുവതിയെ മരിച്ചനിലയില് കണ്ടെത്തി.
ഒളവണ്ണ പുല്പ്പറമ്പ് സ്വദേശി കൃഷ്ണൻ്റെ മകള് നേഹ കൃഷ്ണൻ (25) ആണ് മരിച്ചത്.
തിങ്കളാഴ്ച രാവിലെയാണ് അരൂരിനും തുറവൂരിനും ഇടയില് എഴുപുന്ന ശ്രീനാരായണപുരം ലെവല് ക്രോസിന് തെക്കുഭാഗത്തുള്ള ചെറിയ വളവിനോട് ചേർന്ന് യുവതിയുടെ മൃതദേഹം കണ്ടെത്തിയത്. വിവരം ലഭിച്ച ഉടൻ അരൂർ പോലീസ് സ്ഥലത്തെത്തി പരിശോധന നടത്തി.
നേഹ ട്രെയിനില് നിന്ന് വീണതാണെന്നാണ് പൊലീസിന്റെ പ്രാഥമിക നിഗമനം. മൃതദേഹം പോസ്റ്റ്മോർട്ടത്തിനായി ആലപ്പുഴ ജനറല് ആശുപത്രിയിലേക്ക് മാറ്റി. സംഭവത്തില് അരൂർ പൊലീസ് കേസെടുത്ത് അന്വേഷണം ആരംഭിച്ചിട്ടുണ്ട്.
യുവതി ഏത് ട്രെയിനിലാണ് യാത്ര ചെയ്തതെന്നും എങ്ങനെയാണ് വീണതെന്നും ഉള്പ്പെടെയുള്ള വിവരങ്ങള് പൊലീസ് ശേഖരിക്കുന്നുണ്ട്. കുടുംബാംഗങ്ങള്ക്ക് വിവരം നല്കുകയും അവർ സ്ഥലത്തെത്തുകയും ചെയ്തു.
