ഏറ്റുമാനൂര്: ചിറക്കുളത്തിന്റെ പ്രൗഡി വീണ്ടെടുക്കുന്നതിനൊപ്പം ഇവിടം കേന്ദ്രീകരിച്ചു വിനോദ, വിശ്രമ കേന്ദ്രം ഒരുക്കണമെന്ന് അവശ്യം.
നൂറ്റാണ്ടുകള് പഴക്കമുള്ള കുളം വര്ഷങ്ങളോളം അവഗണിക്കപ്പെട്ട നിലയിലായിരുന്നു. 2013ല് ജില്ലാ പഞ്ചായത്ത് മെമ്പര് ആയിരുന്ന ജോസ് മോന് മുണ്ടക്കലിന്റെ നേതൃത്വത്തില് 35 ലക്ഷം രൂപ മുടക്കി ചിറക്കുളം നവീകരിച്ചു.
ചിറക്കുളത്തില് കുമിഞ്ഞു കൂടിയിരുന്ന 75 ലോഡ് മാലിന്യ മുഴുവന് ഒരാഴ്ചയില് അധികം നീണ്ടുനിന്ന പ്രവര്ത്തനത്തില് ഹിറ്റാച്ചി ഉപയോഗിച്ചു മാറ്റുവാന് കഴിഞ്ഞു. കുളത്തിന്റെ ആഴം കൂട്ടി സംരക്ഷണ ഭിത്തി കെട്ടി. കുളത്തില് ഇറങ്ങിച്ചെല്ലുവാന് റാംപ് പണിതു. ഭിത്തിയുടെ മുകളില് ചുറ്റിനും കോണ്ക്രീറ്റ് ആര്ട്ട് വര്ക്കു നടത്തി മനോഹരമാക്കി. ചിറക്കുളം നവീകരണത്തിന് ഒപ്പം വിഭാവനം ചെയ്ത പാര്ക്കു പിന്നീട് നിലച്ച അവസ്ഥയായി. കുളം വീണ്ടും അവഗണനയിലേക്കു നീങ്ങുകയും ചെയ്തു. രണ്ടുമാസം മുമ്പു ചിറക്കുളത്തില് ഒരു യുവാവ് മുങ്ങി മരിച്ചതും ദുഃഖകരമായ സംഭവമാണ്. ഏറ്റുമാനൂര് നഗരത്തിന്റെ ഹൃദയഭാഗത്തു സ്ഥിതി ചെയ്യുന്ന ചിറകുളത്തിനു സമീപം മനോഹരമായ ഒരു പാര്ക്കു അനിവാര്യമാണെന്നതു വര്ഷങ്ങളായുള്ള ആവശ്യമാണ്.
അടിക്കടി വികസിച്ചുകൊണ്ടിരിക്കുന്ന നഗരത്തില് ഒരു വിശ്രമ കേന്ദ്രം ഇല്ല എന്നത് വലിയ പോരായ്മ ആണ്. പാര്ക്കിനോട് അനുബന്ധിച്ചുള്ള ചിറക്കുളം വൃത്തിയാക്കി വീണ്ടും നവീകരിക്കണം എന്നാണു നഗരവാസികളുടെ പ്രധാന ആവശ്യം. കുളത്തിന്റെ നടുക്കായി ഫൗണ്ടന് സ്ഥാപിക്കണം. കുട്ടികള്ക്കു കറങ്ങി നടക്കാന് പെഡല് ബോട്ട് സംവിധാനം ഏര്പ്പെടുത്തണം. കുളത്തിനു ചുറ്റിലും ഹൈമാസ്റ്റ് ലൈറ്റുകള് സ്ഥാപിക്കണം. വാഹനങ്ങള്ക്കു പാര്ക്കു ചെയ്യുവാന് ഇപ്പോഴത്തെ, നഗരസഭയുടെ അധീനതയിലുള്ള മൈതാനം ഉപയോഗിക്കണം. മഹാദേവ ക്ഷേത്രത്തിന്റെ ഉത്സവകാലത്തും, ഒന്നര മാസം നീണ്ടുനില്ക്കുന്ന മണ്ഡല വിളക്കു കാലത്തും പതിനായിരങ്ങളാണ് ഏറ്റുമാനൂര് മഹാദേവ ക്ഷേത്രത്തിലെ ദര്ശനത്തിനായി എത്തുന്നത്. ഇവരും ചിറക്കുളത്ത് എത്താന് ആവശ്യമായ നടപടികള് ഉണ്ടാകണമെന്നും നഗരവാസികള് അഭിപ്രായപ്പെടുന്നു. ഇത്തരം ആവശ്യങ്ങള് ഉള്പ്പെടുത്തി ജനകീയ വികസന സമിതി 50 ലക്ഷം രൂപ ചെലവു പ്രതീക്ഷിക്കുന്ന പദ്ധതി തയ്യാറാക്കി മന്ത്രി പി.സി വിഷ്ണുനാഥിനും, ഫ്രാന്സിസ് ജോര്ജ് എം.പിക്കും, നാട്ടകം സുരേഷ് എം.എല്.എയ്ക്കും നല്കിയതായി വികസന സമിതി പ്രസിഡന്റ് ബി. രാജീവ് അറിയിച്ചു.
