ഡൽഹി: മോട്ടോർ വാഹന നിയമത്തില്‍ നിർണ്ണായക മാറ്റങ്ങളുമായി കേന്ദ്രസർക്കാർ.
100% എഥനോള്‍ വരെ വാഹനങ്ങളില്‍ ഉപയോഗിക്കാൻ അനുമതി നല്‍കിയാണ് ഭേദഗതി നടപ്പാക്കിയത്.
ഇതിനായി കേന്ദ്ര മോട്ടോർ വാഹന ചട്ടങ്ങളില്‍ ഭേദഗതി വരുത്തി ഔദ്യോഗികമായി വിജ്ഞാപനം ഇറക്കി.
ഇന്ധന ഇറക്കുമതി കുറയ്ക്കാനും മലിനീകരണം നിയന്ത്രിക്കാനും ലക്ഷ്യമിട്ടാണ് കേന്ദ്ര സർക്കാറിന്റെ ഈ നിർണ്ണായക നീക്കം. ഇ 100, ഇ 85 തുടങ്ങിയ ഇന്ധനങ്ങള്‍ ഉപയോഗിക്കാൻ കഴിയുന്ന ഫ്ലെക്സ് ഫ്യുവല്‍ വാഹനങ്ങള്‍ക്കാണ് പച്ചക്കൊടി.
നിലവില്‍ ഇ-20 വരെ ഉപയോഗിക്കാനായി നിർമ്മിച്ച വാഹനങ്ങളില്‍ അതില്‍ കൂടുതല്‍ എഥനോള്‍ കലർത്താൻ ആകില്ല. എഥനോള്‍ കൂടുതല്‍ കലർത്തിയ പെട്രോള്‍ ഒഴിക്കാവുന്ന വാഹനങ്ങളുടെ നിർമ്മാണം പ്രോത്സാഹിപ്പിക്കുമെന്ന് കേന്ദ്രം വ്യക്തമാക്കി.
അതേസമയം നിലവിലുള്ള സാധാരണ പെട്രോള്‍ കാറുകളിലോ ഇ20 ഇന്ധനം ഉപയോഗിക്കുന്ന വാഹനങ്ങളിലോ ഇ100 ഉപയോഗിക്കാൻ അനുവാദമില്ല. പുതിയ ഭേദഗതിയോടെ മാരുതി സുസുകി, ടൊയോട്ട, ടാറ്റാ മോട്ടോഴ്സ്, ഹ്യുണ്ടായ് തുടങ്ങിയ പ്രമുഖ വാഹന നിർമ്മാതാക്കള്‍ ഉയർന്ന എഥനോള്‍ മിശ്രിതത്തില്‍ ഓടുന്ന ഫ്ലെക്സ്-ഫ്യുവല്‍ മോഡലുകള്‍ വിപണിയിലിറക്കാൻ സജ്ജമാകുകയാണ്.
