കോട്ടയം: എരുമേലി വലിയമ്പലത്തിനു മുന്വശത്തു നീരൊഴുക്കു തടസപ്പെടാനും മലിനീകരണത്തിനും കാരണമായിരുന്ന പഴയ ചെക്ക്ഡാം പൊളിച്ചുനീക്കി ആധുനിക രീതിയില് പുതിയതു നിര്മിക്കാന് പദ്ധതിയായി.
80 ലക്ഷം രൂപ ചെലവഴിച്ചു ചെറുക്കിട ജലസേചന വകുപ്പിന്റെ മേല്നോട്ടത്തിലാണു നിര്മാണം നടപ്പിലാക്കുന്നത്. ടെന്ഡര് നടപടികള് പൂര്ത്തിയായ പദ്ധതിയുടെ നിര്മ്മാണ പ്രവൃത്തികള് ഫെബ്രുവരിയില് ആരംഭിക്കും.
നിലവിലെ ശബരിമല തീര്ഥാടന സീസണില് അയ്യപ്പഭക്തരുടെ ജലഉപയോഗത്തിനു തടസം വരാതിരിക്കാനാണു സീസണ് പൂര്ത്തിയായ ശേഷം പണികള് തുടങ്ങാന് തീരുമാനിച്ചത്.
കുറഞ്ഞ എണ്ണം വെന്റിലേറ്ററുകളും എഫ്.ആര്.പി ഷട്ടറുകളും ഉപയോഗിച്ചാണ് പുതിയ ചെക്ക്ഡാം രൂപകല്പ്പന ചെയ്തിരിക്കുന്നത്. തടികളും മറ്റ് മാലിന്യങ്ങളും അടിഞ്ഞുകൂടുന്നതു തടഞ്ഞ് തോട്ടിലൂടെയുള്ള നീരൊഴുക്ക് എപ്പോഴും സുഗമമാക്കാന് ഇതു സഹായിക്കും.
പദ്ധതി സ്വാഗതാര്ഹമാണെങ്കിലും നിര്മ്മാണവുമായി ബന്ധപ്പെട്ട് പ്രദേശവാസികളും പൊതുപ്രവര്ത്തകരും ചില പ്രധാന ആവശ്യങ്ങള് മുന്നോട്ടുവെക്കുന്നുണ്ട്.
പുതിയ നിര്മാണം കാരണം വെള്ളപ്പൊക്ക സാധ്യതയുണ്ടോ എന്നും സമീപത്തുള്ള രാജാപാലത്തിന് ബലക്ഷയം സംഭവിക്കുമോ എന്നും മുന്കൂട്ടി ശാസ്ത്രീയ പഠനം നടത്തണം.
വലിയമ്പലത്തിന് തൊട്ടുമുന്നിലെ മാലിന്യപ്രശ്നം ഒഴിവാക്കാന് അയ്യപ്പഭക്തര്ക്കായി ചെക്ക്ഡാമിനോട് ചേര്ന്ന് പുതിയ കുളിക്കടവ് നിര്മ്മിക്കണമെന്നും തോട്ടരുകിലുള്ള കക്കൂസ് ടാങ്കുകളും മാലിന്യങ്ങളും പൂര്ണ്ണമായി നീക്കം ചെയ്ത് തോട്ടിലെ ജലമലിനീകരണം അവസാനിപ്പിക്കണമെന്നും പ്രദേശവാസികള് ആവശ്യപ്പെടുന്നു.
ഫെബ്രുവരിയില് ആരംഭിച്ച് വരും സീസണിനു മുന്പായി പ്രവൃത്തികള് പൂര്ത്തിയാക്കി എരുമേലിയിലെ മലിനീകരണ പ്രശ്നത്തിനു ശാശ്വത പരിഹാരം കാണാനാണ് അധികൃതര് ലക്ഷ്യമിടുന്നത്.
