ഡൽഹി: മുഖ്യ തിരഞ്ഞെടുപ്പ് കമ്മീഷണർ ഗ്യാനേഷ് കുമാറിനെതിരെ രാജ്യവ്യാപകമായി പ്രതിപക്ഷ പ്രതിഷേധം ശക്തമാകുമ്പോഴും രാജിവയ്ക്കില്ലെന്ന നിലപാടില്‍ ഉറച്ചുനില്‍ക്കുകയാണ് അദ്ദേഹം.
കോണ്‍ഗ്രസിന്റെ നേതൃത്വത്തില്‍ രാജ്യത്തുടനീളം പ്രതിഷേധ മാർച്ചുകള്‍ സംഘടിപ്പിച്ചപ്പോള്‍, സിപിഎം ഉള്‍പ്പെടെയുള്ള ഇടത് പാർട്ടികളും ദില്ലിയില്‍ പ്രതിഷേധവുമായി രംഗത്തെത്തി. ഗ്യാനേഷ് കുമാറിനെതിരെ പുതിയ ഇംപീച്ച്‌മെന്റ് നോട്ടീസ് ഉള്‍പ്പെടെയുള്ള തുടർനടപടികള്‍ സംബന്ധിച്ച്‌ മറ്റന്നാള്‍ ചേരുന്ന ഇന്ത്യ സഖ്യയോഗം തീരുമാനിക്കും.
ഇതിനിടെ, വോട്ടർമാരുടെ പട്ടിക പരിഷ്കരണവുമായി ബന്ധപ്പെട്ട പ്രത്യേക തീവ്ര പരിശോധനയായ എസ്‌ഐആറിനെതിരായ ഹർജികളില്‍ സുപ്രധാന നിരീക്ഷണവുമായി സുപ്രീം കോടതി മുൻ ജഡ്ജി ജസ്റ്റിസ് സുധാൻഷു ധൂലിയ രംഗത്തെത്തി. പൗരത്വം നിർണയിക്കാനുള്ള അധികാരം തിരഞ്ഞെടുപ്പ് കമ്മീഷനില്ലെന്ന് അദ്ദേഹം വ്യക്തമാക്കി. എസ്‌ഐആർ നടപടിക്കെതിരായ ഹർജികള്‍ പരിഗണിച്ച ആദ്യ ബെഞ്ചില്‍ അംഗമായിരുന്ന ജസ്റ്റിസ് ധൂലിയ, ഗോവയില്‍ വോട്ടർമാരെ പട്ടികയില്‍ തിരികെ ഉള്‍പ്പെടുത്താത്ത നടപടി കോടതിയലക്ഷ്യമാണോയെന്ന് ഇപ്പോള്‍ പറയാനാകില്ലെന്നും അഭിപ്രായപ്പെട്ടു. എസ്‌ഐആർ നടപടികള്‍ക്ക് സ്റ്റേ ആവശ്യപ്പെട്ട് ഹർജിക്കാർ കോടതിയെ സമീപിച്ചിരുന്നില്ലെന്നും അദ്ദേഹം ചൂണ്ടിക്കാട്ടി.
പ്രതിഷേധം കടുപ്പിച്ച്‌ കോണ്‍ഗ്രസും ഇടതുപക്ഷവും
തിരഞ്ഞെടുപ്പ് കമ്മീഷന്റെ സമ്പൂർണ യോഗം ചേർന്ന് തർക്കവിഷയങ്ങളില്‍ തീരുമാനങ്ങള്‍ പ്രഖ്യാപിച്ചിട്ടും ഗ്യാനേഷ് കുമാറിനെതിരായ പ്രതിപക്ഷ പ്രതിഷേധത്തിന് അയവില്ല. ഡിസിസികളുടെ നേതൃത്വത്തില്‍ കോണ്‍ഗ്രസ് രാജ്യവ്യാപകമായി പ്രതിഷേധ മാർച്ചുകള്‍ സംഘടിപ്പിച്ചു. ദില്ലിയില്‍ സിപിഎം ആസ്ഥാനമായ എകെജി ഭവന് മുന്നില്‍നിന്ന് ജനറല്‍ സെക്രട്ടറി എം.എ. ബേബിയുടെ നേതൃത്വത്തില്‍ ഇടത് നേതാക്കള്‍ ഭഗത് സിംഗ് സ്മാരകത്തിലേക്ക് മാർച്ച്‌ നടത്തി. മുംബൈയില്‍ ഗാന്ധിജയന്തി ദിനത്തില്‍ നടത്താനിരുന്ന പ്രതിഷേധത്തിന് പൊലീസ് അനുമതി നിഷേധിച്ചതായി കോക്രോച്ച്‌ ജനതാ പാർട്ടിയും അറിയിച്ചു.
അതേസമയം, പ്രതിപക്ഷ ആരോപണങ്ങള്‍ തള്ളിക്കളഞ്ഞ് കേന്ദ്ര സർക്കാരും ബിജെപിയും പ്രതിരോധം ശക്തമാക്കിയിട്ടുണ്ട്. രാഹുല്‍ ഗാന്ധിക്കെതിരെ ബിജെപി മുഖ്യമന്ത്രിമാരെ രംഗത്തിറക്കിയതിന് പിന്നാലെ ദില്ലിയില്‍ ബിജെപി ദേശീയ അധ്യക്ഷൻ ജെ.പി. നദ്ദയും രാജീവ് ചന്ദ്രശേഖറും വാർത്താസമ്മേളനങ്ങള്‍ നടത്തി കോണ്‍ഗ്രസ് ആരോപണങ്ങളെ പ്രതിരോധിച്ചു. നാളെ ചേരുന്ന കോണ്‍ഗ്രസ് പ്രവർത്തക സമിതി യോഗവും ഗ്യാനേഷ് കുമാറിനെതിരായ തുടർനടപടികള്‍ സംബന്ധിച്ച്‌ നിർണായകമാകും.
ഇന്ത്യ സഖ്യയോഗത്തില്‍ നിർണായക തീരുമാനം
മറ്റന്നാള്‍ ചേരുന്ന ഇന്ത്യ സഖ്യയോഗത്തില്‍ ഗ്യാനേഷ് കുമാറിനെതിരെ പുതിയ ഇംപീച്ച്‌മെന്റ് നോട്ടീസ് നല്‍കുന്നതുള്‍പ്പെടെയുള്ള നടപടികള്‍ ചർച്ച ചെയ്യും. എന്നാല്‍ യോഗത്തില്‍ സമാജ്‌വാദി പാർട്ടി അധ്യക്ഷൻ അഖിലേഷ് യാദവ് പങ്കെടുക്കില്ല. പകരം പ്രതിനിധിയെ അയക്കുമെന്നാണ് അദ്ദേഹം അറിയിച്ചിരിക്കുന്നത്. ആം ആദ്മി പാർട്ടിയെയും ഡിഎംകെയെയും വിശാല പ്രതിപക്ഷ സഖ്യത്തിന്റെ ഭാഗമാക്കാനുള്ള നീക്കങ്ങളും ചില പാർട്ടികള്‍ തുടരുകയാണ്.
അതിനിടെ, ഗ്യാനേഷ് കുമാറിനെതിരെ എസ്‌ഐആർ റദ്ദാക്കണമെന്നതടക്കമുള്ള ആവശ്യങ്ങളുമായി മറ്റൊരു ഹർജിയും ഇന്ന് സുപ്രീംകോടതിയിലെത്തി. ഹർജിയില്‍ കോടതി സ്വീകരിക്കുന്ന നിലപാട് തുടർനീക്കങ്ങളില്‍ നിർണായകമായേക്കും. പ്രതിപക്ഷ പ്രതിഷേധം ശക്തമായി തുടരുന്ന സാഹചര്യത്തില്‍ തിരഞ്ഞെടുപ്പ് കമ്മീഷനെതിരായ പോരാട്ടം കൂടുതല്‍ ശക്തമാക്കാനാണ് ഇന്ത്യ സഖ്യത്തിന്റെ നീക്കം.
